ഓപ്പറേഷന്‍ സിന്ദൂര്‍: പാകിസ്ഥാനെ പിന്തുണച്ച് തുര്‍ക്കിയും അസര്‍ബൈജാനും; സംയമനം വേണമെന്ന് ഖത്തര്‍

MAY 7, 2025, 2:28 PM

അങ്കാറ: ഭീകര സംഘടനാ കേന്ദ്രങ്ങള്‍ ലക്ഷ്യമിട്ട് ഇന്ത്യ നടത്തിയ 'ഓപ്പറേഷന്‍ സിന്ദൂര്‍' ആക്രമണത്തിന് ശേഷം, പാകിസ്ഥാനെ പിന്തുണച്ച് തുര്‍ക്കിയും അസര്‍ബൈജാനും രംഗത്തെത്തി.

ഇന്ത്യ നടത്തിയത് സാധാരണക്കാരെ ലക്ഷ്യമിട്ടുള്ള ആക്രമണങ്ങളാണെന്ന് തുര്‍ക്കി വിദേശകാര്യ മന്ത്രാലയം ആരോപിച്ചു. 'പാകിസ്ഥാനും ഇന്ത്യയും തമ്മിലുള്ള സംഭവവികാസങ്ങള്‍ ഞങ്ങള്‍ ആശങ്കയോടെ നിരീക്ഷിക്കുന്നു. മെയ് 6 രാത്രി ഇന്ത്യ നടത്തിയ ആക്രമണം ഒരു സമഗ്ര യുദ്ധത്തിന്റെ അപകടസാധ്യത ഉയര്‍ത്തുന്നു. സാധാരണക്കാരെയും സിവിലിയന്‍ അടിസ്ഥാന സൗകര്യങ്ങളെയും ലക്ഷ്യമിട്ടുള്ള ആക്രമണങ്ങളെയും അത്തരം പ്രകോപനപരമായ നടപടികളെയും ഞങ്ങള്‍ അപലപിക്കുന്നു.' തുര്‍ക്കി വിദേശകാര്യ മന്ത്രാലയം എക്സില്‍ ഒരു പ്രസ്താവനയില്‍ പറഞ്ഞു. പോസ്റ്റ് ചെയ്തു,

പാകിസ്ഥാനിലെയും പാക് അധീന കശ്മീരിലെയും ഭീകര ക്യാമ്പുകള്‍ ലക്ഷ്യമിട്ടുള്ള ഇന്ത്യയുടെ ഓപ്പറേഷന്‍ സിന്ദൂരിന് ആഗോള പിന്തുണ ലഭിച്ചതിനുശേഷം പാകിസ്ഥാനെ പിന്തുണച്ച ചുരുക്കം ചില രാജ്യങ്ങളില്‍ ഒന്നാണ് തുര്‍ക്കി.

അസര്‍ബൈജാനും പാകിസ്ഥാനെതിരായ അക്രമത്തെ അപലപിച്ചുകൊണ്ട് ഒരു പ്രസ്താവന പുറത്തിറക്കി.

'ഇന്ത്യന്‍ റിപ്പബ്ലിക്കും ഇസ്ലാമിക് റിപ്പബ്ലിക് ഓഫ് പാകിസ്ഥാനും തമ്മിലുള്ള സംഘര്‍ഷം കൂടുതല്‍ വഷളാകുന്നതില്‍ അസര്‍ബൈജാന്‍ റിപ്പബ്ലിക് ആശങ്ക പ്രകടിപ്പിക്കുന്നു. ഇസ്ലാമിക് റിപ്പബ്ലിക് ഓഫ് പാകിസ്ഥാനെതിരെ നിരവധി സിവിലിയന്മാരെ കൊല്ലുകയും പരിക്കേല്‍പ്പിക്കുകയും ചെയ്ത സൈനിക ആക്രമണങ്ങളെ ഞങ്ങള്‍ അപലപിക്കുന്നു. പാകിസ്ഥാന്‍ ജനതയോട് ഐക്യദാര്‍ഢ്യം പ്രകടിപ്പിച്ചുകൊണ്ട്, നിരപരാധികളായ ഇരകളുടെ കുടുംബങ്ങള്‍ക്ക് ഞങ്ങള്‍ അനുശോചനം അറിയിക്കുകയും പരിക്കേറ്റവര്‍ക്ക് വേഗത്തില്‍ സുഖം പ്രാപിക്കട്ടെ എന്ന് ആശംസിക്കുകയും ചെയ്യുന്നു' അസര്‍ബൈജാന്‍ വിദേശകാര്യ മന്ത്രാലയം പ്രസ്താവിച്ചു.

സംയമനം പാലിക്കണമെന്ന് ഖത്തര്‍

'ഇന്ത്യന്‍ റിപ്പബ്ലിക്കും ഇസ്ലാമിക് റിപ്പബ്ലിക് ഓഫ് പാകിസ്ഥാനും തമ്മിലുള്ള സംഘര്‍ഷം വര്‍ദ്ധിച്ചുവരുന്നത് ഖത്തര്‍ ആശങ്കയോടെയാണ് നിരീക്ഷിക്കുന്നത്. പരമാവധി സംയമനം പാലിക്കാനും, അറിവിന്റെ ശബ്ദത്തിന് മുന്‍ഗണന നല്‍കാനും, നല്ല അയല്‍പക്ക തത്വങ്ങളെ ബഹുമാനിക്കാനും, നയതന്ത്ര മാര്‍ഗങ്ങളിലൂടെ പ്രതിസന്ധി പരിഹരിക്കാനും ഖത്തര്‍ ഇരു രാജ്യങ്ങളോടും അഭ്യര്‍ത്ഥിക്കുന്നു.' ഓപ്പറേഷന്‍ സിന്ദൂരിനെക്കുറിച്ച് ബുധനാഴ്ച ഖത്തര്‍ വിദേശകാര്യ മന്ത്രാലയം എക്സില്‍ പുറത്തിറക്കിയ പ്രസ്താവനയില്‍ പറഞ്ഞു.

മേഖലയില്‍ സ്ഥിരതയും സമാധാനവും ഉറപ്പാക്കാന്‍ ക്രിയാത്മകമായ സംഭാഷണത്തിലൂടെ തങ്ങളുടെ പ്രശ്‌നങ്ങള്‍ പരിഹരിക്കണമെന്ന് ഖത്തര്‍ വിദേശകാര്യ മന്ത്രാലയം ഇരു രാജ്യങ്ങളോടും അഭ്യര്‍ത്ഥിച്ചു.