600 ദശലക്ഷം ഡോളർ കടന്ന് 'ദി സൂപ്പർ മാരിയോ ഗാലക്സി മൂവി'

APRIL 13, 2026, 5:30 AM

യൂണിവേഴ്സൽ പിക്ചേഴ്സും ഇല്ല്യൂമിനേഷനും ചേർന്ന് പുറത്തിറക്കിയ 'ദി സൂപ്പർ മാരിയോ ഗാലക്സി മൂവി' ബോക്സ് ഓഫീസിൽ വൻ കുതിപ്പ് തുടരുന്നു. അമേരിക്കയിൽ 300 ദശലക്ഷം ഡോളറും ആഗോളതലത്തിൽ 600 ദശലക്ഷം ഡോളറും പിന്നിട്ടതോടെ, 2026-ൽ ഇതുവരെ പുറത്തിറങ്ങിയ ഹോളിവുഡ് ചിത്രങ്ങളിൽ ഏറ്റവും കൂടുതൽ കളക്ഷൻ നേടുന്ന സിനിമയായി ഇത് മാറി.

നിന്റെൻഡോയുടെ പ്രശസ്തമായ ഗെയിം ഫ്രാഞ്ചൈസിയെ ആസ്പദമാക്കി ഒരുക്കിയ ഈ ആനിമേഷൻ ചിത്രം വരും ആഴ്ചകളിൽ 1 ബില്യൺ ഡോളർ ക്ലബ്ബിൽ ഇടംപിടിക്കുമെന്നാണ് പ്രതീക്ഷിക്കുന്നത്.

വിദേശ വിപണികളിൽ നിന്ന് മാത്രം 321.1 ദശലക്ഷം ഡോളറാണ് ചിത്രം ഇതുവരെ നേടിയത്. ഇതോടെ ആകെ കളക്ഷൻ 628.8 ദശലക്ഷം ഡോളറിലെത്തി. 2023-ൽ പുറത്തിറങ്ങിയ 'ദി സൂപ്പർ മാരിയോ ബ്രദേഴ്സ് മൂവി' 1.3 ബില്യൺ ഡോളർ നേടി ആ വർഷത്തെ ഏറ്റവും വലിയ രണ്ടാമത്തെ വിജയമായി മാറിയിരുന്നു.

ആഗോളതലത്തിൽ 'സ്പൈഡർമാൻ: ബ്രാൻഡ് ന്യൂ ഡേ', 'ടോയ് സ്റ്റോറി 5', 'അവഞ്ചേഴ്സ്: ഡൂംസ്‌ഡേ' തുടങ്ങിയ വരാനിരിക്കുന്ന വമ്പൻ ചിത്രങ്ങളുമായാണ് മാരിയോ ഇപ്പോൾ മത്സരിക്കുന്നത്. ആരോൺ ഹോർവത്തും മൈക്കൽ ജെലെനിക്കും സംവിധാനം ചെയ്ത ചിത്രത്തിൽ പ്രമുഖ താരനിരയാണ് അണിനിരക്കുന്നത്.

മാരിയോയായി ക്രിസ് പ്രാറ്റും (Chris Pratt), പ്രിൻസസ് പീച്ചായി അനിയ ടെയ്‌ലർ ജോയിയും, ലൂയിഗിയായി ചാർലി ഡേയും വേഷമിടുന്നു. ജാക്ക് ബ്ലാക്ക് (ബൗസർ), കീഗൻ-മൈക്കൽ കീ (ടോഡ്) എന്നിവരും തങ്ങളുടെ വേഷങ്ങൾ ആവർത്തിക്കുന്നു. ഗ്ലെൻ പവൽ (ഫോക്സ് മക്ലൗഡ്), ബ്രീ ലാർസൻ (പ്രിൻസസ് റൊസാലിന), ഡൊണാൾഡ് ഗ്ലോവർ (യോഷി), ബെന്നി സഫ്ദി (ബൗസർ ജൂനിയർ) എന്നിവരാണ് രണ്ടാം ഭാഗത്തിലെ പുതുമുഖങ്ങൾ.

ആദ്യ ഭാഗത്തിൽ മഷ്റൂം കിംഗ്ഡത്തെ സംരക്ഷിക്കാൻ മാരിയോയും ലൂയിഗിയും നടത്തുന്ന പോരാട്ടമായിരുന്നു പ്രമേയമെങ്കിൽ, പുതിയ ചിത്രത്തിൽ സാഹസികത ബഹിരാകാശത്തേക്കാണ് മാറുന്നത്. പ്രിൻസസ് റൊസാലിനയെ പരിചയപ്പെടുന്ന മാരിയോയും സംഘവും ബൗസറിനും മകൻ ബൗസർ ജൂനിയറിനും എതിരെ നടത്തുന്ന ബഹിരാകാശ യുദ്ധമാണ് ചിത്രത്തിന്റെ ഇതിവൃത്തം. ചിത്രം നിലവിൽ മികച്ച പ്രതികരണങ്ങളുമായി തിയേറ്ററുകളിൽ പ്രദർശനം തുടരുകയാണ്.