രാം ചരൺ ചിത്രം 'പെഡി' ഉടൻ എത്തില്ല

APRIL 7, 2026, 8:51 PM

മെഗാ പവർ സ്റ്റാർ രാം ചരൺ നായകനാകുന്ന ബിഗ് ബജറ്റ് ചിത്രം 'പെഡി' (Peddi) നിശ്ചയിച്ച തീയതിയിൽ റിലീസ് ചെയ്യില്ലെന്ന് റിപ്പോർട്ടുകൾ. ഏപ്രിൽ 30-ന് തിയേറ്ററുകളിൽ എത്തുമെന്ന് പ്രഖ്യാപിച്ചിരുന്ന ചിത്രം സാങ്കേതിക കാരണങ്ങളാൽ വീണ്ടും നീട്ടിവെക്കാനാണ് നിർമ്മാതാക്കളുടെ തീരുമാനം. പുതിയ റിലീസ് തീയതി വരും ദിവസങ്ങളിൽ ഔദ്യോഗികമായി പ്രഖ്യാപിക്കുമെന്നാണ് സൂചന.

ചിത്രത്തിന്റെ നിർമ്മാണം പൂർത്തിയാക്കാൻ ഇനിയും സമയം ആവശ്യമാണെന്നാണ് അണിയറ പ്രവർത്തകർ നൽകുന്ന വിവരം. രണ്ട് പാട്ടുകളുടെ ചിത്രീകരണവും ഏതാനും പ്രധാന രംഗങ്ങളും ഇനിയും പൂർത്തിയാകാനുണ്ട്.

ഇത് കൂടാതെ, നിലവിൽ നടക്കുന്ന ഐപിഎൽ (IPL) ആവേശവും റിലീസ് മാറ്റാൻ കാരണമായിട്ടുണ്ട്. വൈകുന്നേരങ്ങളിൽ ആരാധകർ ക്രിക്കറ്റ് മത്സരങ്ങളുടെ തിരക്കിലായതിനാൽ, സിനിമയുടെ കളക്ഷനെ അത് ബാധിക്കുമെന്ന് കണക്കിലെടുത്താണ് മെയ് മാസത്തിന് ശേഷമുള്ള റിലീസിനെക്കുറിച്ച് അണിയറ പ്രവർത്തകർ ആലോചിക്കുന്നത്.

ആദ്യം മാർച്ച് 27-ന് റിലീസ് ചെയ്യാനിരുന്ന ചിത്രം പിന്നീട് ഏപ്രിൽ 30-ലേക്ക് മാറ്റിയിരുന്നു. ഇപ്പോൾ വീണ്ടും മാറ്റുന്നതോടെ ചിത്രം ജൂണിൽ റിലീസ് ചെയ്യാനാണ് സാധ്യത. വേനലവധി സീസൺ കൂടി കണക്കിലെടുക്കുമ്പോൾ ജൂൺ റിലീസ് ചിത്രത്തിന് ഗുണകരമാകുമെന്നും കരുതപ്പെടുന്നു. ബുച്ചി ബാബു സന സംവിധാനം ചെയ്യുന്ന ഈ ചിത്രത്തിൽ ജാൻവി കപൂർ ആണ് നായിക.

ഗ്രാമീണ പശ്ചാത്തലത്തിൽ ഒരു കായികതാരത്തിന്റെ കഥ പറയുന്ന ചിത്രത്തിലെ രാം ചരണിന്റെ ലുക്കുകൾ ഇതിനോടകം വൈറലായിക്കഴിഞ്ഞു. എ.ആർ. റഹ്മാൻ സംഗീതം നൽകിയ 'ചികിരി ചികിരി', 'റായ് റായ് റാ റാ' എന്നീ ഗാനങ്ങൾ ചാർട്ട്ബസ്റ്ററുകളിൽ ഇടം നേടിയിരുന്നു. അടുത്തിടെ പുറത്തിറങ്ങിയ ''പെഡി പെഹൽവാൻ' എന്ന തീവ്രമായ ലുക്കും സ്പെഷ്യൽ വീഡിയോയും ചിത്രത്തിന് വലിയ ഹൈപ്പാണ് നൽകിയിരിക്കുന്നത്. മൈത്രി മൂവി മേക്കേഴ്സും സുകുമാർ റൈറ്റിംഗ്സും ചേർന്നാണ് ഈ ചിത്രം നിർമ്മിക്കുന്നത്.