വിഖ്യാത സംവിധായകൻ ക്രിസ്റ്റഫർ നോളൻ്റെ ഏറ്റവും പുതിയ ചിത്രം ദി ഒഡീസി  ചിത്രീകരണം പൂർത്തിയായി. ഹോമറിൻ്റെ വിഖ്യാത ഇതിഹാസ കാവ്യത്തെ ആസ്പദമാക്കി ഒരുക്കുന്ന ഈ ചിത്രം സിനിമാ ചരിത്രത്തിലാദ്യമായി പൂർണ്ണമായും ഐമാക്സ് (IMAX) 70mm ഫിലിം ഫോർമാറ്റിൽ ചിത്രീകരിച്ച ആദ്യ ഫീച്ചർ ഫിലിം എന്ന ഖ്യാതി സ്വന്തമാക്കി. 

കഴിഞ്ഞ ദിവസം നടന്ന എട്ടാമത് കൊഡാക് ഫിലിം അവാർഡ്‌സിൽ സംസാരിക്കവെയാണ് തൻ്റെ ഐമാക്സ് സ്വപ്നങ്ങൾ യാഥാർത്ഥ്യമാക്കാൻ സഹായിച്ചവരെ നോളൻ നന്ദിയോടെ സ്മരിച്ചത്. 2026 ജൂലൈ 17-നാണ് ചിത്രം തീയേറ്ററുകളിൽ എത്തുക.

തൻ്റെ ഐമാക്സ് യാത്രയിലെ മാർഗ്ഗദർശിയും സുഹൃത്തുമായിരുന്ന അന്തരിച്ച ഐമാക്സ് ക്വാളിറ്റി ഓഫീസർ ഡേവിഡ് കെയ്‌ലിയെ നോളൻ ചടങ്ങിൽ അനുസ്മരിച്ചു. "ഹോളിവുഡ് സിനിമകൾ ഐമാക്സ് ഫിലിമിൽ ഷൂട്ട് ചെയ്യുക എന്ന എൻ്റെ ഭ്രാന്തൻ സ്വപ്നത്തെ ഗൗരവമായി കാണുകയും അത് സാധ്യമാക്കുകയും ചെയ്ത ആദ്യ വ്യക്തി ഡേവിഡ് ആയിരുന്നു," നോളൻ പറഞ്ഞു. 

2025-ൽ ക്യാൻസർ ബാധിതനായി അന്തരിച്ച ഡേവിഡ് കെയ്‌ലിക്ക് പകരമായി അദ്ദേഹത്തിൻ്റെ പങ്കാളി പട്രീഷ്യയ്ക്ക് കെയ്‌ലി അവാർഡ് നോളൻ സമ്മാനിച്ചു. റയാൻ കൂഗ്ലറുടെ സിന്നേഴ്സ് (Sinners), നോളൻ്റെ ദി ഒഡീസി എന്നിവയാണ് ഡേവിഡ് കെയ്‌ലി അവസാനമായി മേൽനോട്ടം വഹിച്ച ചിത്രങ്ങൾ.

ചിത്രീകരണത്തിനായി ഏകദേശം രണ്ട് ദശലക്ഷത്തിലധികം അടി ഫിലിമാണ് (Over 2 million feet of film) നോളൻ ഉപയോഗിച്ചത്. മൊറോക്കോ, ഗ്രീസ്, ഇറ്റലി, ഐസ്‌ലാന്റ്, സ്കോട്ട്‌ലൻഡ് എന്നിവിടങ്ങളിലായി 91 ദിവസം നീണ്ടുനിന്ന ചിത്രീകരണത്തിൽ ഭൂരിഭാഗവും കടലിലായിരുന്നു. 

ഒഡീഷ്യസായി എത്തുന്ന മാറ്റ് ഡാമണും കപ്പലിലെ മറ്റ് ജീവനക്കാരായി അഭിനയിച്ച താരങ്ങളും യഥാർത്ഥ കടൽത്തിരമാലകളെ അതിജീവിച്ചാണ് അഭിനയിച്ചതെന്ന് നോളൻ വെളിപ്പെടുത്തി. നോളൻ്റെ സ്ഥിരം ഛായാഗ്രാഹകൻ ഹോയ്റ്റെ വാൻ ഹോയ്റ്റെമയാണ് ഐമാക്സ് ക്യാമറകൾക്ക് പിന്നിൽ പ്രവർത്തിച്ചത്.

സാധാരണയായി ഐമാക്സ് ക്യാമറകളുടെ വലിയ ശബ്ദം കാരണം സംഭാഷണ രംഗങ്ങൾ ചിത്രീകരിക്കാൻ പ്രയാസമായിരുന്നു. എന്നാൽ ദി ഒഡീസിക്ക് വേണ്ടി ഐമാക്സ് ടീം 30% ഭാരം കുറഞ്ഞതും ശബ്ദം തീരെയില്ലാത്തതുമായ പുതിയ ബ്ലിംപ് (Blimp) സിസ്റ്റം വികസിപ്പിച്ചെടുത്തു. ഇത് അഭിനേതാക്കളുടെ മുഖത്തിന് തൊട്ടടുത്ത് വെച്ച് പോലും ശബ്ദ തടസ്സമില്ലാതെ ദൃശ്യങ്ങൾ പകർത്താൻ സഹായിച്ചു. മാറ്റ് ഡാമണിനെ കൂടാതെ ടോം ഹോളണ്ട് ,ആൻ ഹാതവേ, സെൻഡയ, റോബർട്ട് പാറ്റിൻസൺ തുടങ്ങിയ വൻ താരനിരയാണ് ഈ ചിത്രത്തിലുള്ളത്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്