200 കോടി തിളക്കത്തിൽ അക്ഷയ് കുമാർ; തകർപ്പൻ കുതിപ്പുമായി 'ഭൂത് ബംഗ്ല'

APRIL 28, 2026, 10:47 PM

ബോളിവുഡ് താരം അക്ഷയ് കുമാറും സംവിധായകൻ പ്രിയദർശനും വർഷങ്ങൾക്ക് ശേഷം ഒന്നിച്ച 'ഭൂത് ബംഗ്ല' ബോക്സ് ഓഫീസിൽ കുതിപ്പ് തുടരുന്നു. റിലീസ് ചെയ്ത് 12 ദിവസത്തിനുള്ളിൽ ചിത്രം ആഗോളതലത്തിൽ 200 കോടി രൂപ എന്ന നാഴികക്കല്ല് പിന്നിട്ടു. മികച്ച കളക്ഷനാണ് പ്രവൃത്തിദിനങ്ങളിലും ചിത്രത്തിന് ലഭിച്ചുകൊണ്ടിരിക്കുന്നത്. 12-ാം ദിവസം മാത്രം 4.35 കോടി രൂപയാണ് ചിത്രം ഇന്ത്യയിൽ നിന്ന് നേടിയത്.

2026 ഏപ്രിൽ 17-ന് തിയേറ്ററുകളിലെത്തിയ 'ഭൂത് ബംഗ്ല' ഏകദേശം 120 കോടി രൂപ ബജറ്റിലാണ് നിർമ്മിച്ചത്. 12 ദിവസം കൊണ്ട് ഇന്ത്യയിൽ നിന്ന് മാത്രം 129.45 കോടി രൂപ ചിത്രം സ്വന്തമാക്കി കഴിഞ്ഞു. ഇതോടെ നിർമ്മാണച്ചെലവ് പൂർണ്ണമായും തിരിച്ചുപിടിക്കുകയും സിനിമ ലാഭത്തിലേക്ക് കടക്കുകയും ചെയ്തു.

നിലവിൽ 7.8 ശതമാനത്തിലധികം ലാഭവിഹിതം ചിത്രം നേടിയിട്ടുണ്ട്. വിദേശ വിപണികളിൽ നിന്ന് മാത്രം 51 കോടി രൂപയാണ് ഇതുവരെ ലഭിച്ചത്. ഇതോടെ ആകെ ആഗോള കളക്ഷൻ 204 കോടി കടന്നു.

ഈ വർഷത്തെ ഏറ്റവും കൂടുതൽ കളക്ഷൻ നേടുന്ന ഇന്ത്യൻ സിനിമകളുടെ പട്ടികയിൽ അഞ്ചാം സ്ഥാനത്തേക്ക് 'ഭൂത് ബംഗ്ല' ഉയർന്നു. മലയാള ചിത്രമായ 'വാഴ 2'-ന്റെ ആകെ കളക്ഷനെ മറികടന്നാണ് അക്ഷയ് കുമാർ ചിത്രം ഈ നേട്ടം സ്വന്തമാക്കിയത്.

1132 കോടിയിലധികം നേടിയ 'ധുരന്ധർ ദ റിവഞ്ച്' ആണ് പട്ടികയിൽ ഒന്നാമത്. 'ബോർഡർ 2', 'ദി രാജ സാബ്' തുടങ്ങിയ വൻകിട ചിത്രങ്ങൾക്കൊപ്പമാണ് ഇപ്പോൾ 'ഭൂത് ബംഗ്ല'യുടെയും സ്ഥാനം. അക്ഷയ് കുമാറിന്റെ കരിയറിൽ 100 കോടി ക്ലബ്ബിൽ ഇടംപിടിക്കുന്ന ഇരുപതാമത്തെ ചിത്രമാണിത്.