ഇന്ത്യൻ ക്രിക്കറ്റിൽ പുതിയ ചരിത്രം കുറിച്ച് പതിനഞ്ചുകാരൻ വൈഭവ് സൂര്യവംശി. അയർലൻഡ്, ഇംഗ്ലണ്ട് പര്യടനങ്ങൾക്കും ഏഷ്യൻ ഗെയിംസിനുമുള്ള ഇന്ത്യൻ ടീമിനെ ശനിയാഴ്ച പ്രഖ്യാപിച്ചപ്പോൾ, യുവ ഇടംകയ്യൻ ബാറ്റർ വൈഭവ് ടീമിലിടം നേടി.

ഇതോടെ ഇന്ത്യൻ സീനിയർ ടീമിലേക്ക് തെരഞ്ഞെടുക്കപ്പെടുന്ന ഏറ്റവും പ്രായം കുറഞ്ഞ താരം എന്ന മാസ്റ്റർ ബ്ലാസ്റ്റർ സച്ചിൻ ടെണ്ടുൽക്കറുടെ ദീർഘകാലത്തെ റെക്കോർഡാണ് സൂര്യവംശി തകർത്തത്. 1989ൽ പതിനാറാം വയസ്സിൽ പാകിസ്ഥാനെതിരെ സച്ചിൻ അരങ്ങേറ്റം കുറിച്ചതിനു ശേഷം കഴിഞ്ഞ 36 വർഷമായി തകരാതെ നിന്ന റെക്കോർഡാണ് ഈ ബീഹാർ സ്വദേശി സ്വന്തം പേരിലാക്കിയത്.

ഇന്ത്യൻ പ്രീമിയർ ലീഗിന്റെ 2026 സീസണിൽ കാഴ്ചവെച്ച അസാമാന്യ പ്രകടനമാണ് വൈഭവിന് ഇന്ത്യൻ ടീമിലേക്കുള്ള വഴിതുറന്നത്. സീസണിൽ ഉടനീളം തകർപ്പൻ ഫോമിലായിരുന്ന താരം 776 റൺസോടെ ടൂർണമെന്റിലെ റൺവേട്ടക്കാരിൽ ഒന്നാമനായി. ഓറഞ്ച് ക്യാപ്, മോസ്റ്റ് വാല്യുബിൾ പ്ലെയർ, സൂപ്പർ സ്‌ട്രൈക്കർ ഉൾപ്പെടെ അഞ്ച് പ്രധാന പുരസ്‌കാരങ്ങളാണ് ഈ പതിനഞ്ചുകാരൻ ഐ.പി.എല്ലിൽ വാരിക്കൂട്ടിയത്. ഇതിനുപുറമേ, ഒരു ഐ.പി.എൽ സീസണിൽ ഏറ്റവും കൂടുതൽ സിക്‌സറുകൾ നേടുന്ന താരമെന്ന ക്രിസ് ഗെയിലിന്റെ ചരിത്ര റെക്കോർഡും വൈഭവ് ഇത്തവണ തിരുത്തിക്കുറിച്ചു.

കഴിഞ്ഞ വർഷം രാജസ്ഥാൻ റോയൽസിന് വേണ്ടി ഐ.പി.എല്ലിൽ അരങ്ങേറ്റം കുറിച്ചതു മുതൽ ക്രിക്കറ്റ് ലോകത്തെ സജീവ ചർച്ചാവിഷയമാണ് ഈ ഇടംകയ്യൻ ബാറ്റർ. കഴിഞ്ഞ സീസണിലെ മികച്ച പ്രകടനത്തിന് പിന്നാലെ യൂത്ത് ക്രിക്കറ്റിലും താരം റൺസ് അടിച്ചുകൂട്ടി. ഈ വർഷം ആദ്യം നടന്ന അണ്ടർ19 ലോകകപ്പ് ഫൈനലിൽ ഇംഗ്ലണ്ടിനെതിരെ വൈഭവ് നേടിയ 175 റൺസ് ഏറെ ശ്രദ്ധിക്കപ്പെട്ടിരുന്നു. എന്നാൽ, 2026 സീസൺ ആരംഭിക്കുന്നതിന് മുൻപ് വൈഭവിന്റെ പ്രകടനത്തെക്കുറിച്ച് ക്രിക്കറ്റ് വിദഗ്ധർക്കും ആരാധകർക്കും ചില സംശയങ്ങൾ ഉണ്ടായിരുന്നു.

ആദ്യ സീസണിലെ പുതുമ മാറുന്നതോടെ എതിർ ടീമുകൾ കൃത്യമായ തന്ത്രങ്ങളുമായി വരുമെന്നും, അതുകൊണ്ടുതന്നെ വൈഭവിന് ഇത്തവണ പിടിച്ചുനിൽക്കാൻ പാടാകുമെന്നുമായിരുന്നു പലരുടെയും വിലയിരുത്തൽ. പക്ഷേ, വിമർശകരുടെ എല്ലാ കണക്കുകൂട്ടലുകളും തകിടം മറിക്കുന്ന പ്രകടനമാണ് താരം പുറത്തെടുത്തത്. ജസ്പ്രിത് ബുംറ, ജോഷ് ഹേസൽവുഡ്, പാറ്റ് കമ്മിൻസ്, കാഗിസോ റബാഡ തുടങ്ങിയ ലോകോത്തര ബൗളർമാരെ ഒരു ഭയവുമില്ലാതെയാണ് വൈഭവ് നേരിട്ടത്. ഐ.പി.എല്ലിന്റെ 19-ാം പതിപ്പിൽ സൺറൈസേഴ്‌സ് ഹൈദരാബാദിനെതിരെ താരം സെഞ്ച്വറി നേടി. കൂടാതെ പ്ലേ ഓഫ് മത്സരങ്ങളിലെ രണ്ടെണ്ണം ഉൾപ്പെടെ മൂന്ന് തവണ തൊണ്ണൂറുകളിൽ എത്തി നിൽക്കാനും വൈഭവിന് സാധിച്ചു.

ട്വന്റി20 ടീം പ്രഖ്യാപനത്തിന് പിന്നാലെ, വൈഭവിന്റെ പ്രകടനത്തെ അവഗണിക്കാൻ സെലക്ടർമാർക്ക് സാധിക്കുമായിരുന്നില്ലെന്ന് ചീഫ് സെലക്ടർ അജിത് അഗാർക്കർ തുറന്നുപറഞ്ഞു. വൈഭവ് സ്വന്തം പ്രകടനം കൊണ്ട് സെലക്ഷൻ കമ്മിറ്റിയുടെ വാതിൽ തകർത്ത് അകത്തുകയറുകയായിരുന്നു എന്ന് അദ്ദേഹം വാർത്താ സമ്മേളനത്തിൽ വ്യക്തമാക്കി. അയർലൻഡിനെതിരെയുള്ള ട്വന്റി20 പരമ്പരയ്ക്ക് മുൻപായി, ശ്രീലങ്ക എ, അഫ്ഗാനിസ്ഥാൻ എ ടീമുകൾക്കെതിരായ മത്സരങ്ങളിൽ ഇന്ത്യ എ ടീമിന് വേണ്ടിയാകും വൈഭവ് ഇനി അടുത്തതായി കളത്തിലിറങ്ങുക.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്