ഒന്നാം സ്ഥാനം തിരിച്ചുപിടിച്ച് സ്‌പെയിൻ

JULY 21, 2026, 4:04 AM

ലോകകപ്പ് ജേതാക്കളായ സ്‌പെയിൻ, തിങ്കളാഴ്ച പുറത്തുവന്ന ഫിഫ പുരുഷ ഫുട്‌ബോൾ റാങ്കിങിൽ ഒന്നാം സ്ഥാനത്തേക്ക് തിരിച്ചെത്തി. ഫൈനലിൽ നിലവിലെ ചാമ്പ്യന്മാരായ അർജന്റീനയെ എക്‌സ്ട്രാ ടൈമിൽ 1-0 എന്ന സ്‌കോറിന് തോൽപ്പിച്ചാണ് സ്‌പെയിൻ തങ്ങളുടെ രണ്ടാം ലോകകപ്പ് കിരീടം സ്വന്തമാക്കിയത്. ഈ വിജയത്തോടെ അവർ അർജന്റീനയെ പിന്തള്ളി ഒന്നാം സ്ഥാനത്തെത്തി. ഞായറാഴ്ച ന്യൂജേഴ്‌സിയിൽ നടന്ന ഫൈനലിൽ ഫെറാൻ ടോറസ് നേടിയ എക്‌സ്ട്രാ ടൈം ഗോളാണ് സ്‌പെയിനിന്റെ വിജയം ഉറപ്പാക്കിയത്.

കഴിഞ്ഞ ജനുവരിക്ക് ശേഷം ആദ്യമായാണ് ലൂയിസ് ഡി ലാ ഫ്യൂവെന്റെയുടെ സംഘം റാങ്കിങിൽ ഒന്നാമതെത്തുന്നത്. ഫൈനലിൽ തോൽവി വഴങ്ങിയതോടെ അർജന്റീന രണ്ടാം സ്ഥാനത്തേക്ക് പിന്തള്ളപ്പെട്ടു. ലോകകപ്പിലെ പ്രകടനങ്ങളിൽ വ്യത്യാസമുണ്ടായിരുന്നെങ്കിലും ഫ്രാൻസും ഇംഗ്ലണ്ടും യഥാക്രമം മൂന്നും നാലും സ്ഥാനങ്ങൾ നിലനിർത്തി. മൂന്നാം സ്ഥാനത്തിനായുള്ള മൽസരത്തിൽ ഫ്രാൻസിനെ 6-4 ന് പരാജയപ്പെടുത്തിയതോടെ തോമസ് ടുക്കലിന്റെ ഇംഗ്ലണ്ട് നാലാം സ്ഥാനം ഭദ്രമാക്കി. ഫ്രാൻസ് മൂന്നാം സ്ഥാനത്ത് തുടർന്നു.

ബ്രസീൽ ഒരു സ്ഥാനം മെച്ചപ്പെടുത്തി അഞ്ചാമതെത്തിയപ്പോൾ, മൊറോക്കോ ചരിത്രത്തിലാദ്യമായി ആറാം സ്ഥാനത്തെത്തി മികച്ച കുതിപ്പ് തുടർന്നു. ലോകകപ്പിലെ മികച്ച പ്രകടനമാണ് മൊറോക്കോയെ ഈ നേട്ടത്തിലെത്തിച്ചത്. സ്‌പെയിനനോട് പ്രീക്വാർട്ടറിൽ തോറ്റ് പുറത്തായ പോർച്ചുഗൽ രണ്ട് സ്ഥാനം താഴേക്ക് ഇറങ്ങി ഏഴാമതായി. ബെൽജിയം എട്ടാം സ്ഥാനത്തേക്ക് കയറിയപ്പോൾ, നെതർലൻഡ്‌സ് ഒമ്പതാം സ്ഥാനത്തേക്ക് പിന്തള്ളപ്പെട്ടു. പ്രീക്വാർട്ടർ വരെ എത്തിയ മെക്‌സിക്കോ നാല് സ്ഥാനങ്ങൾ ഉയർന്ന് ആദ്യ പത്തിൽ ഇടംപിടിച്ചു.

ലോകകപ്പിൽ ദശാബ്ദങ്ങൾക്കിടയിലെ ഏറ്റവും മികച്ച പ്രകടനം കാഴ്ചവെച്ച് ക്വാർട്ടർ ഫൈനലിൽ എത്തിയ നോർവേ 12 സ്ഥാനം ഉയർന്ന് 19-ാം സ്ഥാനത്തെത്തി. ഇത്തവണത്തെ റാങ്കിംഗിൽ ഏറ്റവും വലിയ മുന്നേറ്റം നടത്തിയതും ഇവരാണ്. മറ്റൊരു നിരാശാജനകമായ ലോകകപ്പ് ക്യാംപയിന് ശേഷം ജർമ്മനി ആദ്യ പത്തിൽ നിന്ന് പുറത്തായി 12-ാം സ്ഥാനത്തെത്തി. ക്രൊയേഷ്യ 11-ാം സ്ഥാനത്തുണ്ട്. തുടർച്ചയായ മൂന്നാം തവണയും ലോകകപ്പിന് യോഗ്യത നേടാനാവാത്ത ഇറ്റലി 15-ാം സ്ഥാനത്തേക്ക് വീണു.

റാങ്കിങിൽ താഴേക്കിടയിൽ, ഗ്രൂപ്പ് ഘട്ടത്തിൽ പുറത്തായ ടൂണീഷ്യ 12 സ്ഥാനം താഴേക്ക് ഇറങ്ങി 57-ാം സ്ഥാനത്തെത്തി. പ്രീക്വാർട്ടറിൽ എത്തിയ ഈജിപ്ത് അഞ്ച് സ്ഥാനം ഉയർന്ന് 24-ാം സ്ഥാനത്തെത്തിയപ്പോൾ, നോക്കൗട്ട് ഘട്ടത്തിൽ കടന്ന പരാഗ്വേ ഏഴ് സ്ഥാനം മെച്ചപ്പെടുത്തി 34-ാം സ്ഥാനത്തെത്തി. ലോകകപ്പിൽ റൗണ്ട് ഓഫ് 32ൽ എത്തിയ കേപ് വേർഡെ മൂന്ന് സ്ഥാനം ഉയർന്ന് 64-ാം സ്ഥാനത്തും, നോക്കൗട്ട് ഘട്ടത്തിൽ കടന്ന ഘാന എട്ട് സ്ഥാനം ഉയർന്ന് 65-ാം സ്ഥാനത്തുമാണ്.