ഇംഗ്ലണ്ടിനെതിരായ മാഞ്ചസ്റ്റർ ക്രിക്കറ്റ് ടെസ്റ്റിൽ രവീന്ദ്ര ജഡേജയുടെയും വാഷിംഗ്ടൺ സുന്ദറിന്റെയും വീരോചിത സെഞ്ചുറികളുടെ കരുത്തിൽ സമനില പിടിച്ചതിന് പിന്നാലെ അപൂർവ റെക്കോർഡിട്ട് ഇന്ത്യൻ ടീം.

ഇംഗ്ലണ്ടിനെതിരായ ടെസ്റ്റ് പരമ്പരയിൽ നാല് ഇന്ത്യൻ താരങ്ങൾ 400 റൺസിലേറെ നേടിയാണ് റെക്കോർഡിട്ടത്. ഇന്ത്യയുടെ 91 വർഷത്തെ ടെസ്റ്റ് ചരിത്രത്തിലാദ്യമായാണ് നാല് താരങ്ങൾ ഒരു ടെസ്റ്റ് പരമ്പരയിൽ ഒരേസമയം 400ലേറെ റൺസ് സ്‌കോർ ചെയ്യുന്നത്.

ഇംഗ്ലണ്ടിനെതിരായ ആദ്യ നാലു ടെസ്റ്റുകൾ പൂർത്തിയായപ്പോൾ റൺവേട്ടക്കാരിൽ ആദ്യ നാലു സ്ഥാനങ്ങളിലും ഇന്ത്യക്കാരാണെന്നതും ശ്രദ്ധേയമാണ്. 722 റൺസുമായി ഇന്ത്യൻ ക്യാപ്ടൻ ശുഭ്മാൻ ഗില്ലാണ് റൺവേട്ടയിൽ ഒന്നാമത്. ഒരു ഇരട്ട സെഞ്ചുറി അടക്കം നാലു സെഞ്ചുറികളാണ് ഗിൽ ഈ പരമ്പരയിൽ നിന്ന് മാത്രം നേടിയത്.

511 റൺസുമായി കെ.എൽ. രാഹുലാണ് റൺവേട്ടയിൽ രണ്ടാം സ്ഥാനത്ത്. രണ്ട് സെഞ്ചുറിയും രണ്ട് അർധസെഞ്ചുറികളുമാണ് രാഹുൽ പരമ്പരയിൽ നേടിയത്. 479 റൺസുമായി റിഷഭ് പന്താണ് റൺവേട്ടക്കാരിൽ മൂന്നാമത്. രണ്ട് സെഞ്ചുറിയും മൂന്ന് അർധസെഞ്ചുറികളും റിഷഭ് പന്തിന്റെ പേരിലുണ്ട്.

പരിക്കുമൂലം അവസാന ടെസ്റ്റിൽ കളിക്കാനാവാത്തതിനാൽ റിഷഭ് പന്തിന് 500 റൺസ് പിന്നിടാനാവാനില്ല. അവസാന ടെസ്റ്റിൽ കളിച്ചിരുന്നെങ്കിൽ ഒരു ടെസ്റ്റ് പരമ്പരയിൽ ഏറ്റവും കൂടുതൽ റൺസ് നേടുന്ന വിക്കറ്റ് കീപ്പറെന്ന റെക്കോർഡ് റിഷഭ് പന്തിന് സ്വന്തമാക്കാൻ കഴിയുമായിരുന്നു. 1965ൽ ഇംഗ്ലണ്ടിനെതിരായ പരമ്പരയിൽ 525 റൺസ് നേടിയ ഇന്ത്യയുടെ ബുധി കുന്ദേരന്റെ പേരിലാണ് നിലവിലെ റെക്കോർഡ്.

ഇന്നലെ മാഞ്ചസ്റ്ററിൽ സെഞ്ചുറി നേടിയതോടെ രവീന്ദ്ര ജഡേജ ഇംഗ്ലണ്ടിന്റെ ജാമി സ്മിത്തിനെ പിന്തള്ളി റൺവേട്ടയിൽ നാലാം സ്ഥാനത്തേക്ക് കയറി. നാലു മത്സരങ്ങളിൽ 454 റൺസുമായാണ് ജഡേജ നാലാം സ്ഥാനത്തെത്തിയത്. ഒരു സെഞ്ചുറിയും നാല് അർധസെഞ്ചുറിയുമാണ് ജഡേജയുടെ പേരിലുള്ളത്.

പരമ്പരയിലെ ആദ്യ ടെസ്റ്റിൽ സെഞ്ചുറിയുമായി കരുത്തുകാട്ടിയ ഓപ്പണർ യശസ്വി ജയ്‌സ്വാൾ പിന്നീട് നിറം മങ്ങിയത് മാത്രമാണ് ഇന്ത്യക്ക് തിരിച്ചടിയായത്. നാലു കളികളിൽ ഒരു സെഞ്ചുറിയും ഒരു അർധസെഞ്ചുറിയും അടക്കം 291 റൺസാണ് ജയ്‌സ്വാളിന്റെ നേട്ടം. ഈ പരമ്പരയിലെ റൺവേട്ടക്കാരിൽ പത്താമതാണ് ജയ്‌സ്വാൾ ഇപ്പോൾ.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്