എല്ലാ ദിവസവും പുലര്ച്ചെ അഞ്ച് മണിക്ക് കട്ടി മീശയും മാസ് ലുക്കുമായി ആ ലക്ഷ്വറി ടൊയോട്ട ഫോര്ച്യൂണര് ബിസ്രോഡി ടൗണിലെ പോലീസ് സ്റ്റേഷന് മുന്നില് വന്നു നില്ക്കും. കാറില് നിന്നിറങ്ങുന്നത് ഏതെങ്കിലും വലിയ ബിസിനസുകാരനോ രാഷ്ട്രീയ നേതാവോ ആണെന്ന് കരുതിയെങ്കില് തെറ്റി, കൈയിലൊരു ചൂലുമെടുത്ത് നേരെ തെരുവു വൃത്തിയാക്കാന് ഇറങ്ങുന്ന ശേഷപ്പയാണ് ആ കാറിനുള്ളില്.
അതെ, സോഷ്യല് മീഡിയയില് ഇപ്പോള് ട്രെന്ഡിംഗിന്റെ ടോപ്പ് ഗിയറിലാണ് കര്ണാടക ദക്ഷിണ കന്നഡ സ്വദേശിയായ ശേഷപ്പ. ഏകദേശം 35 ലക്ഷത്തോളം രൂപ വിലമതിക്കുന്ന സ്വന്തം ഫോര്ച്യൂണര് എസ്യുവിയില് വന്നിറങ്ങി തെരുവ് വൃത്തിയാക്കുന്ന ഈ ശുചീകരണ തൊഴിലാളിയുടെ ജീവിതം ഏതൊരു സിനിമാക്കഥയെക്കാളും സൂപ്പര് ഹിറ്റാണ്.
50 രൂപ കൂലിയില് നിന്ന് സ്വന്തം ഫോര്ച്യൂണറിലേക്ക്!
മൂന്ന് പതിറ്റാണ്ട് മുന്പ് വെറും 50 രൂപ പ്രതിദിന കൂലിക്കാണ് ശേഷപ്പ ശുചീകരണ ജോലി തുടങ്ങുന്നത്. ദാരിദ്ര്യവും നിരാശയും നിറഞ്ഞ തുടക്കകാലത്ത് ഒരുവേള മദ്യത്തിന് അടിമയായെങ്കിലും, അവിടെയൊന്നും തോറ്റുകൊടുക്കാന് അദ്ദേഹം തയ്യാറായിരുന്നില്ല. മദ്യം പൂര്ണ്ണമായി ഉപേക്ഷിച്ച് കരുത്തോടെ ജീവിതത്തിലേക്ക് തിരിച്ചെത്തിയ ശേഷപ്പ, ഒഴിവുസമയങ്ങളില് കൃഷിയും പശുവളര്ത്തലുമൊക്കെയായി രാപ്പകലില്ലാതെ അധ്വാനിച്ചു.
ചെറുപ്പം മുതലേ കടുത്ത വാഹനപ്രേമിയായ ശേഷപ്പയുടെ യാത്രകള് സൈക്കിളിലായിരുന്നു തുടങ്ങിയത്. അധ്വാനിച്ച് ഉണ്ടാക്കിയ പണം കൊണ്ട് മാരുതി 800, ഓമ്നി, റിറ്റ്സ്, ആള്ട്ടോ, സ്കോര്പിയോ അങ്ങനെ ഓരോരോ സ്വപ്ന വാഹനങ്ങള് സ്വന്തമാക്കി. ഒടുവിലാണ് തന്റെ ഡ്രീം റൈഡായ ടൊയോട്ട ഫോര്ച്യൂണര് അദ്ദേഹം സ്വന്തമാക്കുന്നത്.
'മറ്റുള്ളവര് എന്തു വിചാരിക്കും എന്നല്ല, നമ്മള് എന്താണ് എന്നതാണ് കാര്യം!'
സാമ്പത്തികമായി ഒരുപാട് ഉയരങ്ങളിലെത്തിയിട്ടും താന് ചെയ്തുപോന്ന ശുചീകരണ തൊഴില് ഉപേക്ഷിക്കാന് ശേഷപ്പ തയ്യാറല്ല. 'ഒരു ജോലിയും ചെറുതോ വലുതോ അല്ല, ചെയ്യുന്ന തൊഴിലിന് അതിന്റേതായ അന്തസ്സുണ്ട്' എന്നാണ് ഈ റിയല് ഹീറോയുടെ നിലപാട്. വന്ന വഴിയും ചെയ്ത ജോലിയും മറക്കില്ലെന്ന ശേഷപ്പയുടെ ഈ ലളിതമായ ജീവിതരീതിക്ക് മുന്നില് ആദരവോടെ തലകുനിക്കുകയാണ് നാട്ടുകാരും സോഷ്യല് മീഡിയയും.
സൂര്യനുയരും മുന്പ് ടൗണ് മുഴുവന് അടിച്ചുവാരി വൃത്തിയാക്കി, ഉച്ചയോടെ ഫോര്ച്യൂണറിന്റെ സ്റ്റിയറിംഗ് പിടിച്ച് ശേഷപ്പ വീട്ടിലേക്ക് മടങ്ങും.
പണം സമ്പാദിക്കാന് മാത്രമല്ല, ചെയ്യുന്ന ജോലിയെയും നടന്നുതീര്ത്ത വഴികളെയും എങ്ങനെ നെഞ്ചോട് ചേര്ക്കണം എന്ന് കാണിച്ചുതരുന്ന ശേഷപ്പയുടെ ഈ കഥയല്ലേ യഥാര്ത്ഥ ലൈഫ് ഗോള്സ്!
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260829104733.jpg)
-20201113033644.jpg)
-20201113033747.jpg)
-(1)-20260827101352.jpg)
-20260824015929.jpg)
