വാരണാസിക്ക് ശേഷം ഹോളിവുഡ് ചിത്രം ചെയ്യാനുള്ള ആഗ്രഹം തുറന്നുപറഞ്ഞ് എസ്.എസ്. രാജമൗലി

OCTOBER 23, 2026, 7:50 AM

പ്രശസ്ത സംവിധായകൻ എസ്.എസ്. രാജമൗലിക്ക് ഹോളിവുഡിൽ ഒരു സിനിമയെങ്കിലും ചെയ്യണമെന്ന് വലിയ ആഗ്രഹമുണ്ടെന്ന് വെളിപ്പെടുത്തി. വാരണാസി എന്ന തന്റെ പുതിയ ചിത്രം പൂർത്തിയാക്കിയ ശേഷം ഈ സാധ്യതയെക്കുറിച്ച് ആലോചിക്കുമെന്നും അദ്ദേഹം ഒരു പോർച്ചുഗീസ് മാധ്യമത്തിന് നൽകിയ അഭിമുഖത്തിൽ വ്യക്തമാക്കി. ഹോളിവുഡിൽ നിന്ന് നിരവധി അവസരങ്ങൾ ലഭിച്ചിരുന്നുവെന്നും അവയിൽ ചിലത് ഇപ്പോഴും നിലവിലുണ്ടെന്നും രാജമൗലി കൂട്ടിച്ചേർത്തു.

അവിടുത്തെ മികച്ച തൊഴിൽ സംസ്കാരത്തിൽ നിന്നും പ്രവർത്തന ഘടനയിൽ നിന്നും ഒരുപാട് കാര്യങ്ങൾ പഠിക്കാൻ കഴിയുമെന്നതാണ് ഹോളിവുഡ് സിനിമയിൽ പ്രവർത്തിക്കാൻ താൽപര്യമുണ്ടാക്കുന്ന പ്രധാന ഘടകമെന്നും അദ്ദേഹം പറഞ്ഞു. ആർ.ആർ.ആർ. റിലീസ് ചെയ്തതിന് ശേഷം തനിക്ക് അവസരങ്ങൾ ലഭിച്ചു തുടങ്ങിയപ്പോഴേക്കും വാരണാസി എന്ന പ്രോജക്ട് ആരംഭിച്ചിരുന്നു എന്നും രാജമൗലി സൂചിപ്പിച്ചു. ഒരേസമയം ഒന്നിലധികം പ്രോജക്റ്റുകളിൽ പ്രവർത്തിക്കാൻ തനിക്ക് കഴിയില്ലെന്നും ഒരു പ്രോജക്റ്റ് പൂർണ്ണമായും തീർത്തതിന് ശേഷം മാത്രമേ അടുത്തതിലേക്ക് ശ്രദ്ധ കേന്ദ്രീകരിക്കാൻ സാധിക്കൂ എന്നും അദ്ദേഹം വ്യക്തമാക്കി.

ഇന്ത്യൻ സിനിമയ്ക്ക് ലോക സിനിമയിൽ ഒരു മേൽവിലാസം ഉണ്ടാക്കിക്കൊടുക്കുന്നതിൽ നിർണായക പങ്കുവഹിച്ച സംവിധായകനാണ് എസ്.എസ്. രാജമൗലി. ബാഹുബലിക്കും ആർ.ആർ.ആറിനും ശേഷം ആയിരം കോടിയിലധികം മുതൽമുടക്കിൽ ഒരുങ്ങുന്ന വാരണാസി എന്ന ചിത്രത്തിന്റെ ഓരോ അപ്ഡേറ്റുകളും പ്രേക്ഷകർ വലിയ ആകാംഷയോടെയാണ് ഏറ്റെടുക്കുന്നത്. വാരണാസി ആഗോളതലത്തിൽ ഏറ്റവും കൂടുതൽ സ്ക്രീനുകളിൽ റിലീസ് ചെയ്യുന്ന ഇന്ത്യൻ ചിത്രമായി മാറാനുള്ള ഒരുക്കത്തിലാണ്.

ഈ ചിത്രത്തിൽ മലയാളികളുടെ പ്രിയതാരം പൃഥ്വിരാജാണ് കുംഭ എന്ന വില്ലൻ കഥാപാത്രത്തെ അവതരിപ്പിക്കുന്നത്. പല ലൊക്കേഷനുകളിലായി ഷൂട്ട് ചെയ്യുന്ന ചിത്രത്തിന് അന്റാർട്ടിക്കയിലും ഷെഡ്യൂൾ ഉണ്ടെന്ന് പറഞ്ഞിരുന്നുവെങ്കിലും പിന്നീട് ഈ പദ്ധതി ഉപേക്ഷിക്കുകയായിരുന്നു.

English Summary: Filmmaker S.S. Rajamouli has expressed his desire to make at least one Hollywood film after completing his upcoming project Varanasi. He stated in an interview with a Portuguese media outlet that he has received several offers from Hollywood, some of which are still active. Rajamouli mentioned that he wishes to learn from the excellent work culture and operational structure in Hollywood.

Tags: Malayalam News, News Malayalam, Latest Malayalam News, Vachakam News, SS Rajamouli, Hollywood, Varanasi, Prithviraj Sukumaran, Indian Cinema, Rajamouli Hollywood film