കനത്ത ചൂടിൽ കേരളം വെന്തുരുകുന്നു: പാലക്കാട് 40 ഡിഗ്രി മറികടക്കാൻ സാധ്യത

APRIL 15, 2026, 8:31 PM

തിരുവനന്തപുരം: ഇന്നേവരെ അനുഭവിക്കാത്ത കനത്ത ചൂടിലൂടെയാണ് മലയാളികൾ കടന്നുപോകുന്നത്. അതി തീവ്ര ചൂടിൽ വെന്തുരുകുകയാണ് കേരളം. ഇന്ന് മുതൽ മൂന്ന് ദിവസം 12 ജില്ലകളിൽ ഉയർന്ന താപനില മുന്നറിയിപ്പ് തുടരും.

ഇടുക്കി, വയനാട് ജില്ലകൾ ഒഴികെയുള്ള ജില്ലകളിൽ യെല്ലോ അലർട്ട് തുടരുകയാണ്. ഏറ്റവും ചൂടുള്ള പാലക്കാട്‌ 39.2 ഡിഗ്രി സെൽഷ്യസാണ് ബുധനാഴ്ച രേഖപ്പെടുത്തിയത്.

ജില്ലയിൽ ഏപ്രിൽ 19 വരെ ചൂട് 40 ഡിഗ്രിയിലോ അതിൽ കവിയാനോ സാധ്യതയുണ്ട്. കൊല്ലത്ത് 39 ഡിഗ്രി താപനിലയും കോട്ടയത്തും കണ്ണൂരും 38 ഡിഗ്രി താപനിലയും പ്രതീക്ഷിക്കുന്നു.