എനിക്കെതിരെ പറഞ്ഞതൊന്നും പിന്‍വലിക്കേണ്ട, ഞങ്ങളുടെ സ്ഥാനാര്‍ത്ഥിയെ അൻവർ പിന്തുണയ്ക്കുന്നുണ്ടോയെന്ന് പറയണം: വിഡി സതീശൻ

MAY 29, 2025, 7:20 AM

കൊച്ചി: യു.ഡി.എഫ് സ്ഥാനാർത്ഥിക്ക് പിന്തുണ നൽകണമോ വേണ്ടയോ എന്ന് അദ്ദേഹമാണ് തീരുമാനിക്കേണ്ടതെന്നാണ് ഏറ്റവും എളിമയോടെയും വിനയത്തോടെയും പറഞ്ഞതെന്ന് പ്രതിപക്ഷ നേതാവ് വിഡി സതീശൻ.

ഞങ്ങളുടെ സ്ഥാനാർത്ഥിക്ക് പിന്തുണ നൽകാൻ അദ്ദേഹം തീരുമാനിച്ചാൽ യു.ഡി.എഫിന്റെ തീരുമാനം അപ്പോൾ പറയാം. ആദ്യം മുതൽക്കെ ഇതല്ലാതെ ഞങ്ങളുടെ കൂട്ടത്തിലുള്ള ആരെങ്കിലും ആരെയെങ്കിലും പ്രകോപിപ്പിച്ചു കൊണ്ട് ഒരു വാക്ക് പോലും പറഞ്ഞിട്ടില്ല.

എന്നെക്കുറിച്ച് അദ്ദേഹം പറയുന്നതിൽ ഒരു കുഴപ്പവുമില്ല. ഈ വിഷയം മാത്രമല്ല തിരഞ്ഞെടുപ്പിലുള്ളത്. സ്ഥാനാർത്ഥിയെ പ്രഖ്യാപിച്ചത് ഉൾപ്പെടെയുള്ള കാര്യങ്ങൾ യു.ഡി.എഫിലെ എല്ലാ നേതാക്കളും പരസ്പരം കൂടിയാലോചന നടത്തിയാണ് തീരുമാനിക്കുന്നത്.

നാളെ വൈകിട്ടോടെ തീരുമാനം എടുക്കുമെന്ന് പി.കെ കുഞ്ഞാലിക്കുട്ടി പറഞ്ഞത് എല്ലാവരുമായി ആലോചിച്ചാണ്.

എനിക്കെതിരെ പറഞ്ഞതൊന്നും പിൻവലിക്കേണ്ട. ഞങ്ങളുടെ സ്ഥാനാർത്ഥിയെ പിന്തുണയ്ക്കുന്നുണ്ടോ ഇല്ലയോ എന്നു മാത്രം അൻവർ വ്യക്തമാക്കിയാൽ മതിയെന്നും വിഡി സതീശൻ പറഞ്ഞു.