ശബരിമല, ഗുരുവായൂർ, കൊട്ടിയൂർ, തിരുവല്ലം ക്ഷേത്രങ്ങളിൽ ‘തിരുപ്പതി മോഡൽ’ വികസന പദ്ധതി

JUNE 19, 2026, 12:11 AM

തിരുവനന്തപുരം: സംസ്ഥാനത്തെ പ്രധാന തീർഥാടന കേന്ദ്രങ്ങളുടെ അടിസ്ഥാന സൗകര്യങ്ങളും തീർഥാടക സേവനങ്ങളും മെച്ചപ്പെടുത്തുന്നതിനായി ശബരിമല, ഗുരുവായൂർ, കൊട്ടിയൂർ, തിരുവല്ലം ക്ഷേത്രങ്ങളിൽ ‘തിരുപ്പതി മോഡൽ’ വികസന പദ്ധതി നടപ്പാക്കുമെന്ന് മുഖ്യമന്ത്രി വി.ഡി. സതീശൻ ബജറ്റ് അവതരണത്തിൽ പ്രഖ്യാപിച്ചു.

ആന്ധ്രാപ്രദേശിലെ പ്രശസ്തമായ തിരുമല തിരുപ്പതി ദേവസ്ഥാനം മാതൃകയിൽ തീർഥാടകർക്കുള്ള സൗകര്യങ്ങൾ വിപുലീകരിക്കുക, ദർശന സംവിധാനങ്ങൾ ആധുനികവത്കരിക്കുക, ശുചിത്വം, താമസം, ഗതാഗതം, സുരക്ഷ എന്നിവ മെച്ചപ്പെടുത്തുക തുടങ്ങിയ ലക്ഷ്യങ്ങളോടെയാണ് പദ്ധതി നടപ്പാക്കുന്നത്.

ശബരിമല ശ്രീ ധർമ്മശാസ്താ ക്ഷേത്രം, ഗുരുവായൂർ ശ്രീകൃഷ്ണ ക്ഷേത്രം, കൊട്ടിയൂർ ക്ഷേത്രം, തിരുവല്ലം പരശുരാമ ക്ഷേത്രം എന്നിവിടങ്ങളിൽ തീർഥാടക അനുഭവം കൂടുതൽ സൗകര്യപ്രദമാക്കുന്നതിനുള്ള പ്രത്യേക വികസന പ്രവർത്തനങ്ങൾ പദ്ധതിയുടെ ഭാഗമായി നടപ്പാക്കും.