'സ്വാമി ശരണം..,താന്‍ കുറ്റമൊന്നും ചെയ്തിട്ടില്ല'; ശബരിമല സ്വര്‍ണക്കൊള്ളയില്‍ പ്രതികരിച്ച് തന്ത്രി കണ്ഠരര് രാജീവര്

JANUARY 9, 2026, 7:07 AM

തിരുവനന്തപുരം: താന്‍ കുറ്റമൊന്നും ചെയ്തിട്ടില്ലെന്ന് ശബരിമല സ്വര്‍ണക്കൊള്ള കേസില്‍ അറസ്റ്റിലായ തന്ത്രി കണ്ഠരര് രാജീവര്. അദ്ദേഹത്തിന്റെ വൈദ്യ പരിശോധന പൂര്‍ത്തിയായി. വൈദ്യ പരിശോധനക്ക് എത്തിച്ചപ്പോള്‍ മാധ്യമങ്ങളോട് പ്രതികരിക്കവെയാണ് താന്‍ തെറ്റൊന്നും ചെയ്തില്ലെന്ന് പറഞ്ഞത്.

മാധ്യമങ്ങളൂടെ കൂടുതല്‍ ചോദ്യങ്ങളോട് സ്വാമി ശരണമെന്ന മറുപടിയുമാണ് തന്ത്രി നല്‍കിയത്. ആരെങ്കിലും കുടുക്കിയതാണോയെന്ന് മാധ്യമങ്ങള്‍ ചോദ്യത്തിനും തന്ത്രി പ്രതികരിച്ചില്ല. തിരുവനന്തപുരം ജനറല്‍ ആശുപത്രിയിലെ വൈദ്യ പരിശോധനക്കുശേഷം തന്ത്രിയുമായി എസ്‌ഐടി സംഘം കൊല്ലത്തേക്കാണ് പോയത്. തന്ത്രിയെ കൊട്ടാരക്കരയിലെ കൊല്ലം വിജിലന്‍സ് കോടതിയിലായില്‍ ഹാജരാക്കി. തന്ത്രിക്ക് ആരോഗ്യപ്രശ്‌നങ്ങളില്ലെന്ന് എസ്‌ഐടി കോടതിയെ അറിയിച്ചു. ബിപി, പ്രമേഹം എന്നിവക്ക് മരുന്ന് കഴിക്കുന്നുണ്ടെന്നും അറിയിച്ചു.

ശബരിമല സ്വര്‍ണക്കൊള്ള കേസില്‍ ഇന്നാണ് തന്ത്രി രാജീവരെ എസ്‌ഐടി അറസ്റ്റ് ചെയ്യുന്നത്. കേസിലെ നിര്‍ണായക അറസ്റ്റാണ് തന്ത്രി കണ്ഠരര് രാജീവരുടേത്. കേസിലെ പ്രതി എ. പത്മകുമാറിന്റെ ദൈവതുല്യര്‍ പ്രയോഗത്തോടെ അത് തന്ത്രിയാണോ മന്ത്രിയാണോയെന്ന സംശയം അന്ന് മുതലെ ഉടലെടുത്തിരുന്നു.