പിഎസ്‌സി പരീക്ഷാ ക്രമക്കേട്: ഉദ്യോഗസ്ഥർക്കെതിരെ ക്രൈംബ്രാഞ്ച് എഫ്‌ഐആർ; അന്വേഷണം പുതിയ ഘട്ടത്തിലേക്ക്

JULY 29, 2026, 6:23 AM

തിരുവനന്തപുരം: പിഎസ്‌സി പരീക്ഷാ ക്രമക്കേടുമായി ബന്ധപ്പെട്ട കേസിൽ ക്രൈംബ്രാഞ്ച് ആദ്യ എഫ്‌ഐആർ രജിസ്റ്റർ ചെയ്തു. പിഎസ്‌സിയിലെ ചില ഉദ്യോഗസ്ഥരെ പ്രതിപ്പട്ടികയിൽ ഉൾപ്പെടുത്തിയിട്ടുണ്ടെങ്കിലും വ്യക്തികളുടെ പേരുകൾ എഫ്‌ഐആറിൽ പരാമർശിച്ചിട്ടില്ല എന്നാണ് ലഭിക്കുന്ന റിപ്പോർട്ട്.

സംസ്ഥാന ആസൂത്രണ ബോർഡിലെ നിയമനവുമായി ബന്ധപ്പെട്ട പരീക്ഷാ ക്രമക്കേടാണ് നിലവിലെ കേസിന്റെ അടിസ്ഥാനമായിരിക്കുന്നത്.

അന്വേഷണത്തിന്റെ ഭാഗമായി ആവശ്യപ്പെട്ട രേഖകൾ പിഎസ്‌സി ക്രൈംബ്രാഞ്ചിന് കൈമാറി. ചോദ്യപേപ്പർ, ഉത്തരസൂചിക, അഭിമുഖത്തിന് വിളിച്ച ഉദ്യോഗാർഥികളുടെ വിവരങ്ങൾ, മാർക്ക് ഷീറ്റുകൾ തുടങ്ങിയ പ്രധാന രേഖകളാണ് അന്വേഷണ സംഘത്തിന് കൈമാറിയിരിക്കുന്നത്. ഇവ വിശദമായി പരിശോധിച്ച ശേഷമായിരിക്കും തുടർനടപടികൾ സ്വീകരിക്കുക.

ആസൂത്രണ ബോർഡിലെ നിയമനവുമായി ബന്ധപ്പെട്ട പരീക്ഷയിൽ മൂല്യനിർണയവുമായി ബന്ധപ്പെട്ട ഗുരുതര വീഴ്ചകൾ ഉണ്ടായെന്ന ആരോപണമാണ് വിവാദത്തിന് വഴിവെച്ചത്. ചില ചോദ്യങ്ങൾ വിലയിരുത്താതെ റാങ്ക് പട്ടിക തയ്യാറാക്കിയെന്ന ആരോപണവും റാങ്ക് നിർണയത്തിലെ ക്രമക്കേടുകളുമായി ബന്ധപ്പെട്ട സംശയങ്ങളും ഉയർന്നിരുന്നു.

ഈ സാഹചര്യത്തിലാണ് ക്രൈംബ്രാഞ്ച് കേസെടുത്ത് അന്വേഷണം ആരംഭിച്ചിരിക്കുന്നത്. രേഖകളുടെ പരിശോധനയ്ക്കൊപ്പം ബന്ധപ്പെട്ട ഉദ്യോഗസ്ഥരിൽ നിന്ന് മൊഴിയെടുക്കുന്നതടക്കമുള്ള നടപടികളും വരും ദിവസങ്ങളിൽ പുരോഗമിക്കുമെന്നാണ് വിവരം.