സംസ്ഥാന സ്കൂൾ കായികമേളക്കിടെയുണ്ടായ അപകടം; കേസെടുത്ത് പൊലീസ്

OCTOBER 12, 2026, 9:47 PM

തൃശ്ശൂര്‍: സംസ്ഥാന സ്കൂൾ കായികമേളക്കിടെയുണ്ടായ അപകടത്തിൽ പൊലീസ് കേസെടുത്തു.അക്വാട്ടിക് കോംപ്ലക്സിൽ താൽക്കാലിക പന്തൽ നിർമ്മിച്ചതിൽ വീഴ്ച എന്നാണ് എഫ്ഐആറിൽ പറയുന്നത്.കൂടാതെ, പന്തൽ നിർമ്മാണത്തിൽ അപാകതകള്‍ ഉണ്ടെന്നും ഷീറ്റുകൾ ഞെട്ടും ബോൾട്ടും ഉപയോഗിച്ച് ഉറപ്പിച്ചില്ലെന്നും എഫ്ഐആറിൽ വ്യക്തമാക്കുന്നു.

അതേസമയം, സ്കൂൾ കായികമേളക്കിടെയുണ്ടായ അപകടത്തിൽ വിചിത്ര ന്യായീകരണമാണ് തൃശ്ശൂർ ഡിഡിഇയുടെ റിപ്പോർട്ടിലുള്ളത്.സംഘാടനത്തിലെ വീഴ്ച മറച്ചുവയ്ക്കുന്ന റിപ്പോർട്ടിൽ പഴി കാറ്റിനും മഴയ്ക്കും ആണ്.അപ്രതീക്ഷിതമായി കാലാവസ്ഥ മാറിയതാണ് അപകടകാരണമെന്നാണ് പൊതുവിദ്യാഭ്യാസ ഡയറക്ടർക്ക് സമർപ്പിച്ച റിപ്പോർട്ടിൽ ചൂണ്ടിക്കാണിക്കുന്നത്.

സംസ്ഥാന സ്കൂൾ ഗെയിംസിനിടെ അക്വാട്ടിക് കോംപ്ലക്സിലെ നീന്തൽക്കുളത്തിന്റെ താൽക്കാലിക മേൽക്കൂര തകർന്നുവീണ് പത്തോളം വിദ്യാർത്ഥികൾക്കും രക്ഷിതാക്കൾക്കുമാണ് പരിക്കേറ്റത്. അപകടത്തിൽ പരിക്കേറ്റവരിൽ നാല് കുട്ടികൾക്ക് തലയ്ക്ക് ഗുരുതരമായി പരിക്കേറ്റിട്ടുണ്ട്.