തിരുവനന്തപുരം: എക്സൈസ് കമ്മീഷണർ സാംബശിവ റാവുവിനെ സ്ഥാനത്തുനിന്ന് മാറ്റണമെന്ന നിലപാടിൽ ഉറച്ചുനിൽക്കുന്നതായി എക്സൈസ് മന്ത്രി എം. ലിജു. കമ്മീഷണറുടെ തുടർച്ചയായ നടപടികൾ ദുരൂഹവും വകുപ്പിന് വലിയ നാണക്കേടുണ്ടാക്കുന്നതുമാണെന്ന് ചൂണ്ടിക്കാണിച്ച മന്ത്രി, അദ്ദേഹത്തെ ചുമതലയിൽ നിന്ന് മാറ്റാൻ മുഖ്യമന്ത്രിയോട് ആവശ്യപ്പെടുമെന്ന സൂചനയും നൽകി. നെടുമ്പാശ്ശേരി വിമാനത്താവളത്തിൽ പുതിയ ബാറുകൾക്ക് അനുമതി നൽകിയ വിവാദത്തിൽ പ്രസ്തുത ലൈസൻസ് റദ്ദാക്കുമെന്നും, ഇതിനായി നിയമോപദേശം തേടിയിട്ടുണ്ടെന്നും മന്ത്രി വ്യക്തമാക്കി.
സർക്കാരുമായോ വകുപ്പ് മന്ത്രിയുമായോ യാതൊരു കൂടിയാലോചനയും നടത്താതെയാണ് കമ്മീഷണർ സുപ്രധാന തീരുമാനങ്ങൾ കൈക്കൊണ്ടത്. സർക്കാർ തലത്തിൽ എടുക്കേണ്ട തീരുമാനങ്ങൾ താഴെത്തട്ടിൽ നടപ്പിലാക്കാനുള്ള അധികാരം നൽകിയത് മുൻ ഇടതു സർക്കാരാണ്.
പ്രസ്തുത പഴുതുകൾ ഉപയോഗിച്ചാണ് മുൻ സർക്കാരിന്റെ കാലത്ത് 428 വൈൻ പാർലറുകൾ ബാറുകളായി മാറിയതെന്ന് മന്ത്രി കുറ്റപ്പെടുത്തി. ഇത്തരം നിയമപരമായ പഴുതുകൾ പൂർണ്ണമായും അടയ്ക്കുമെന്നും, മന്ത്രിയറിയാതെ തീരുമാനങ്ങളെടുക്കുന്ന പ്രവണത അനുവദിക്കില്ലെന്നും അദ്ദേഹം പറഞ്ഞു.
നിലവിലെ വ്യവസ്ഥയനുസരിച്ച് എഫ്.എൽ-7 ലൈസൻസ് നൽകാൻ കമ്മീഷണർക്ക് നിയമപരമായ അധികാരമുണ്ട്. എങ്കിലും, പുതിയ മദ്യനയം ഔദ്യോഗികമായി പ്രഖ്യാപിച്ചതിനുശേഷം മാത്രം ഇത്തരം അപേക്ഷകളിൽ തീരുമാനമെടുക്കാവൂ എന്ന നിർദ്ദേശം മറികടന്നാണ് കമ്മീഷണറുടെ നടപടി. ഇതിൽ വിശദീകരണം ചോദിച്ചിട്ടുണ്ടെന്നും കമ്മീഷണറെ മാറ്റുന്നത് സർക്കാരിന്റെ നയപരമായ തീരുമാനമാണെന്നും മന്ത്രി കൂട്ടിച്ചേർത്തു.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20261103101411.jpg)
-20261103061427.jpg)
