ആര്‍ജെഡിയില്‍ ആഭ്യന്തര ഭിന്നത ശക്തം; മുന്‍ മന്ത്രി വി സുരേന്ദ്രന്‍ പിള്ള പാർട്ടി വിട്ടു

MARCH 19, 2026, 5:41 AM

തിരുവനന്തപുരം: സീറ്റ് വിഭജനത്തിന് പിന്നാലെ എല്‍ഡിഎഫ് ഘടകകക്ഷിയായ ആര്‍ജെഡിയില്‍ ആഭ്യന്തര ഭിന്നത ശക്തമായതായി റിപ്പോർട്ട്. എം.വി. ശ്രേയാംസ് കുമാര്‍ മൂന്ന് സീറ്റുകളില്‍ സ്ഥാനാര്‍ഥികളെ പ്രഖ്യാപിച്ചതിന് പിന്നാലെ, വി. സുരേന്ദ്രന്‍ പിള്ളയുടെ നേതൃത്വത്തിലുള്ള വിഭാഗം രാജിവച്ചു.

ആര്‍ജെഡിക്ക് മതിയായ പരിഗണന ലഭിക്കാത്ത സാഹചര്യത്തില്‍ മത്സരിക്കേണ്ടതില്ലെന്ന നിലപാട് ഉണ്ടായിരുന്നുെന്നും, അതിനെ മറികടന്നാണ് സ്ഥാനാര്‍ഥി പ്രഖ്യാപനമെന്നുമാണ് വിമത വിഭാഗത്തിന്റെ ആരോപണം. പാര്‍ട്ടിക്കുള്ളില്‍ ശീതസമരം തുടരുകയാണെന്നും സുരേന്ദ്രന്‍ പിള്ള വ്യക്തമാക്കി.

മുന്‍പ് ആവശ്യപ്പെട്ട സീറ്റുകള്‍ ലഭിക്കാത്ത പക്ഷം എല്‍ഡിഎഫ് വിടണമെന്ന അഭിപ്രായം സംസ്ഥാന സമിതിയോഗത്തില്‍ ഭൂരിപക്ഷത്തിനുണ്ടായിരുന്നുവെന്നും അദ്ദേഹം കൂട്ടിച്ചേർത്തു. അടുത്ത തെരഞ്ഞെടുപ്പില്‍ കൂടുതല്‍ സീറ്റുകള്‍ നല്‍കാമെന്ന ഉറപ്പും മുമ്പ് ലഭിച്ചിരുന്നുവെന്ന് അദ്ദേഹം കൂട്ടിച്ചേർത്തു. താന്‍ തന്നെ തെരഞ്ഞെടുപ്പില്‍ മത്സരിക്കാനുള്ള സാധ്യതയും സുരേന്ദ്രന്‍ പിള്ള സൂചിപ്പിച്ചു. തിരുവനന്തപുരം സെന്‍ട്രല്‍ മണ്ഡലത്തോട് അടുത്ത ബന്ധമുണ്ടെന്നും അദ്ദേഹം പറഞ്ഞു.