കൊട്ടാരക്കര: ആ പത്ത് മിനിറ്റ് ബസ് വൈകിയില്ലായിരുന്നെങ്കില് നീലേശ്വരം മുക്കോണിമുക്കിലെ ബസ് സ്റ്റോപ്പ് ഒരുപക്ഷേ ഒരു കൂട്ടമരണത്തിന് സാക്ഷിയാകുമായിരുന്നു. എന്നാല്, ആ കാത്തിരിപ്പ് ദുരന്തത്തിലേക്ക് വഴിമാറിയപ്പോള് സ്വന്തം ജീവന് മാത്രമല്ല, കൂടെയുണ്ടായിരുന്ന രണ്ട് പിഞ്ചുകുട്ടികളുടെ ജീവന് കൂടി രക്ഷിച്ച ധീരതയുടെ പേരായി മാറുകയാണ് അഞ്ജലി എന്ന ഇരുപത്തിനാലുകാരി.
പതിവുപോലെ ക്ഷേത്രത്തില് പോകാന് ഏഴുമണി ബസ് കാത്തുനില്ക്കുകയായിരുന്നു അഞ്ജലി. ഒപ്പം കളിച്ചിരിച്ചും സംസാരിച്ചും ഒരു കൂട്ടം സ്കൂള് കുട്ടികളും. പെട്ടെന്നാണ് അന്തരീക്ഷമാകെ മാറിമറിഞ്ഞത്. കുന്നിറങ്ങി അമിതവേഗതയില് പാഞ്ഞുവന്ന ടിപ്പര് ലോറി എതിരെ വന്ന ബൈക്കിലിടിച്ച് നേരെ ബസ് സ്റ്റോപ്പിലേക്ക് പാഞ്ഞുകയറി.
'ഒരു നിമിഷം എല്ലാം ബ്ലാങ്ക് ആയിപ്പോയി. പക്ഷേ, ആ ടിപ്പറിന്റെ വരവ് കണ്ടപ്പോള്ത്തന്നെ അപകടം മണത്തു. ഓടാന് നോക്കുമ്പോള് തൊട്ടടുത്ത് രണ്ട് പെണ്കുട്ടികള് നില്ക്കുന്നുണ്ടായിരുന്നു. അവരുടെ കൈകളില് ബലമായി പിടിച്ച് ഒരൊറ്റ വലിപ്പായിരുന്നു. ഞങ്ങള് മാറി വീണതും ടിപ്പര് മറിഞ്ഞതും ഒപ്പമായിരുന്നു,' അഞ്ജലി ആ ഭീകരനിമിഷം ഓര്ത്തെടുത്തു.
മണ്ണടിയില്പ്പെട്ട കുട്ടികളെ പുറത്തെടുക്കാന് നാട്ടുകാര്ക്കൊപ്പം അഞ്ജലിയും മുന്നിലുണ്ടായിരുന്നു. പോലീസിനെയും ഫയര്ഫോഴ്സിനെയും കൃത്യസമയത്ത് വിളിച്ച് വിവരമറിയിച്ചതും ഈ യുവതിയാണ്. അപകടത്തില് ഒരു വിദ്യാര്ത്ഥിയടക്കം മൂന്ന് പേരുടെ ജീവന് നഷ്ടപ്പെട്ടതിന്റെ ഞെട്ടലിലാണ് നാട്. പുലര്ച്ചെ മൂന്ന് മണി മുതല് ഈ റൂട്ടില് ടിപ്പര് ലോറികള് മരണപ്പാച്ചില് നടത്താറുണ്ടെന്ന് നാട്ടുകാര് ആരോപിക്കുന്നു. ഈ നിയമവിരുദ്ധ മണ്ണുകടത്തിനെതിരെ ശക്തമായ നടപടി വേണമെന്നാണ് ഇപ്പോള് നാട്ടുകാരുടെ ആവശ്യം.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260623070247.jpg)
