ഓണക്കാലത്തെ യാത്രാച്ചൂഷണം: പ്രവാസി ദുരിതവും കേന്ദ്ര ഇടപെടലിന്റെ അടിയന്തരാവശ്യവും

AUGUST 13, 2026, 7:22 AM

ഓണക്കാലത്ത് കേരളത്തിലേക്ക് മടങ്ങിയെത്താന്‍ ആഗ്രഹിക്കുന്ന ലക്ഷക്കണക്കിന് വരുന്ന പ്രവാസികള്‍ നേരിടുന്ന അമിത വിമാനക്കൂലിയും സീറ്റുകളുടെ ലഭ്യതക്കുറവും വലിയൊരു സാമൂഹിക-സാമ്പത്തിക പ്രതിസന്ധിയായി മാറുകയാണ്. നാട്ടില്‍ കുടുംബത്തോടൊപ്പം ഓണമഘോഷിക്കാന്‍ കൊതിക്കുന്ന സാധാരണക്കാരായ പ്രവാസികളെയും വിദേശങ്ങളിലെയും മറ്റ് ഇന്ത്യന്‍ നഗരങ്ങളിലെയും തൊഴിലാളികളെയും വിദ്യാര്‍ത്ഥികളെയും ഈ നിരക്കുവര്‍ധനവ് കാര്യമായി ബാധിക്കുന്നുണ്ട്. കഷ്ടപ്പെട്ട് സമ്പാദിക്കുന്ന തുകയുടെ വലിയൊരു പങ്കും യാത്രാച്ചെലവുകള്‍ക്കായി മാറ്റിവെക്കേണ്ടി വരുന്നത് ഇവരുടെ ബജറ്റിനെ താറുമാറാക്കുന്നു. ഈ സാഹചര്യത്തിലാണ് കോണ്‍ഗ്രസ് ലോക്സഭാ ചീഫ് വിപ്പ് കൊടിക്കുന്നില്‍ സുരേഷ് എംപി കേന്ദ്ര സിവില്‍ ഏവിയേഷന്‍ മന്ത്രി രാം മോഹന്‍ നായിഡുവിനെ നേരില്‍ കണ്ട് അടിയന്തര ഇടപെടല്‍ ആവശ്യപ്പെട്ട് നിവേദനം നല്‍കിയിരിക്കുന്നത്.

യാത്രാക്കാര്‍ കുത്തനെ ഉയരുന്ന സമയം മുതലാക്കി വിമാനക്കമ്പനികള്‍ നടത്തുന്ന ന്യായരഹിതമായ തുക ഈടാക്കല്‍ പ്രവാസികളുടെ യാത്രാ അവകാശത്തിന്മേലുള്ള കടന്നുകയറ്റമാണ്. ഗള്‍ഫ് രാജ്യങ്ങളില്‍ നിന്നും രാജ്യത്തെ പ്രധാന മെട്രോ നഗരങ്ങളില്‍ നിന്നും തിരുവനന്തപുരം, കൊച്ചി, കോഴിക്കോട്, കണ്ണൂര്‍ എന്നീ വിമാനത്താവളങ്ങളിലേക്ക് സര്‍വീസുകള്‍ വര്‍ധിപ്പിക്കേണ്ടത് പ്രവാസികള്‍ക്ക് ആശ്വാസമേകാന്‍ അത്യാവശ്യമാണ്. ഡൈനാമിക് പ്രൈസിംഗ് സംവിധാനത്തിന്റെ മറവില്‍ നടക്കുന്ന ഈ ചൂഷണം തടയാന്‍ ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷന്റെ (DGCA) ശക്തമായ നിരീക്ഷണവും വിമാനക്കൂലിക്ക് ഒരു യുക്തിസഹമായ പരിധി നിശ്ചയിക്കലും അനിവാര്യമാണ്. കൂടുതല്‍ എയര്‍ലൈന്‍ സ്ലോട്ടുകള്‍ അനുവദിച്ചും അടിയന്തര പ്രത്യേക സര്‍വീസുകള്‍ ഏര്‍പ്പെടുത്തിയും മാത്രമെ പ്രവാസികള്‍ക്ക് തടസ്സമില്ലാത്ത യാത്ര ഉറപ്പാക്കാന്‍ സാധിക്കൂ.

പ്രവാസികള്‍ അനുഭവിക്കുന്ന ഈ യാത്രാദുരിതം അടിയന്തരമായി പരിഹരിക്കാന്‍ പാര്‍ലമെന്റിന്റെ ശൂന്യവേളയില്‍ അദ്ദേഹം നോട്ടീസ് നല്‍കിയതും ശ്രദ്ധേയമാണ്. സീറ്റുകളുടെ ലഭ്യത, നിരക്ക് ഘടന എന്നിവയെക്കുറിച്ചുള്ള വിവരങ്ങള്‍ പ്രവാസികള്‍ക്ക് സുതാര്യമായി ലഭ്യമാക്കാനും വിമാനക്കമ്പനികള്‍ക്ക് കര്‍ശന നിര്‍ദേശം നല്‍കേണ്ടതുണ്ട്. നാടിന്റെ സമ്പദ്‌വ്യവസ്ഥയുടെ നട്ടെല്ലായ പ്രവാസികള്‍ക്ക് ഓണക്കാലത്ത് ജന്മനാട്ടിലേക്ക് എത്താന്‍ തടസ്സമായി നില്‍ക്കുന്ന ഈ പ്രതിസന്ധിക്ക് പരിഹാരം കാണാന്‍ കേന്ദ്ര സര്‍ക്കാരും സിവില്‍ ഏവിയേഷന്‍ മന്ത്രാലയവും എത്രയും വേഗം ഫലപ്രദമായ നടപടികള്‍ സ്വീകരിക്കുമെന്നാണ് പ്രതീക്ഷിക്കുന്നത്.