ഫസൽ വധക്കേസ്: കോടതിയിൽ നിന്ന് കാണാതായ രക്തംപുരണ്ട തൂവാല കണ്ടെത്തി

JULY 6, 2026, 10:47 PM

കൊച്ചി: തലശ്ശേരി ഫസൽ വധക്കേസിൽ കോടതിയുടെ കസ്റ്റഡിയിൽ നിന്ന് കാണാതായ നിർണായക തൊണ്ടിമുതലായ രക്തംപുരണ്ട തൂവാല കണ്ടെത്തി. എറണാകുളം സിജെഎം കോടതിയുടെ കസ്റ്റഡിയിൽ സൂക്ഷിച്ചിരുന്ന തൂവാല കോടതിക്കുള്ളിൽ നിന്നുതന്നെയാണ് കണ്ടെത്തിയത്.

മെയ് 12ന് കേസ് പരിഗണിക്കവെ തൊണ്ടിമുതലായ തൂവാല ഹാജരാക്കാൻ സിബിഐ ആവശ്യപ്പെട്ടിരുന്നു. സിജെഎം കോടതിയിൽ സൂക്ഷിച്ചിരുന്ന സീൽവെച്ച കവർ പ്രത്യേക സിബിഐ കോടതിയിൽ എത്തിച്ചപ്പോഴാണ് തൂവാല കാണാതായതായി കണ്ടെത്തിയത്. കവറിന് മുകളിൽ "തൂവാല കാണുന്നില്ല, എലി കൊണ്ടുപോയി" എന്ന കുറിപ്പും ഉണ്ടായിരുന്നതായി കണ്ടെത്തി.

കേസ് അട്ടിമറിക്കാൻ തൂവാല ആസൂത്രിതമായി നീക്കം ചെയ്തതാണെന്ന് സിബിഐ ആരോപിച്ചിരുന്നു. ഇതിനെ തുടർന്ന് കൊച്ചി സിബിഐ കോടതി വിശദമായ റിപ്പോർട്ട് ആവശ്യപ്പെട്ടിരുന്നു. തുടർന്ന് നടത്തിയ പരിശോധനയിലാണ് തൂവാല കോടതിയിൽ നിന്ന് തന്നെ കണ്ടെത്തിയത്.

ഫസൽ വധക്കേസിലെ പ്രധാന തെളിവുകളിലൊന്നാണ് ഈ രക്തംപുരണ്ട തൂവാല. ധർമ്മടം–അണ്ടല്ലൂർ ഭാഗത്തെ ആർഎസ്എസ് പ്രവർത്തകരുടെ വീടിന് സമീപത്തുനിന്നാണ് ഇത് കണ്ടെടുത്തത്. കൊലപാതകത്തിന്റെ ഉത്തരവാദിത്വം ആർഎസ്എസ് പ്രവർത്തകരിലേക്ക് തിരിച്ചുവിടാനുള്ള ഗൂഢാലോചനയുടെ തെളിവാണിതെന്നാണ് സിബിഐയുടെ കണ്ടെത്തൽ.

2006 ഒക്ടോബർ 22നാണ് എൻഡിഎഫ് പ്രവർത്തകനായ മുഹമ്മദ് ഫസൽ കൊല്ലപ്പെട്ടത്. സിപിഐഎം വിട്ട് എൻഡിഎഫിൽ ചേർന്നതിനെ തുടർന്നാണ് കൊലപാതകം നടന്നതെന്നായിരുന്നു അന്വേഷണസംഘത്തിന്റെ കണ്ടെത്തൽ. തലശ്ശേരി എംഎൽഎ കാരായി രാജൻ, കാരായി ചന്ദ്രശേഖരൻ, കൊടി സുനി ഉൾപ്പെടെ എട്ട് പേരാണ് കേസിലെ പ്രതികൾ.