ടിഎംസി നേതാവ് ആശിഷ് ബാനർജിയെ പാർട്ടി ഓഫീസിൽ മരിച്ച നിലയിൽ കണ്ടെത്തി

AUGUST 16, 2026, 1:30 AM

കൊൽക്കത്ത: പശ്ചിമ ബംഗാൾ മുൻ ഡെപ്യൂട്ടി സ്പീക്കറും തൃണമൂൽ കോൺഗ്രസ് നേതാവുമായ ആശിഷ് ബാനർജിയെ മരിച്ച നിലയിൽ കണ്ടെത്തി. ബിർഭും ജില്ലയിലെ റാംപുർഹട്ടിലെ ടിഎംസി പാർട്ടി ഓഫീസിലാണ് മൃതദേഹം കണ്ടെത്തിയത്. സംഭവത്തിൽ പൊലീസ് അന്വേഷണം ആരംഭിച്ചു. മൃതദേഹം പോസ്റ്റ്മോർട്ടത്തിനായി മാറ്റി.

റാംപുർഹട്ടിലെ ആശിഷ് ബാനർജിയുടെ വസതിക്ക് സമീപമുള്ള ടിഎംസി ഓഫീസിലാണ് മൃതദേഹം കണ്ടെത്തിയത്. സംഭവസ്ഥലത്തുനിന്ന് അദ്ദേഹത്തിന്റേതെന്ന് കരുതുന്ന കുറിപ്പും പൊലീസ് കണ്ടെത്തിയിട്ടുണ്ട്. തനിക്കെതിരെ ഉയർന്ന അഴിമതി ആരോപണങ്ങൾ നിഷേധിക്കുന്നതാണ് കുറിപ്പിലെ ഉള്ളടക്കമെന്നാണ് പ്രാഥമിക വിവരം.

താരാപീഠ്-റാംപുർഹട്ട് ഡെവലപ്‌മെന്റ് അതോറിറ്റിയുമായി (TRDA) ബന്ധപ്പെട്ട ടെൻഡർ നടപടികൾ, ചെക്ക് അനുവദിക്കൽ, പ്ലാൻ അംഗീകാരം, നോ ഒബ്ജക്ഷൻ സർട്ടിഫിക്കറ്റ് എന്നിവയിൽ തനിക്ക് യാതൊരു പങ്കുമില്ലെന്ന് കുറിപ്പിൽ വ്യക്തമാക്കിയിട്ടുണ്ടെന്നാണ് റിപ്പോർട്ടുകൾ. തന്നെ അപകീർത്തിപ്പെടുത്താനും അപമാനിക്കാനും ശ്രമങ്ങൾ നടന്നതായും രാഷ്ട്രീയത്തിലേക്ക് പ്രവേശിച്ചത് തെറ്റായ തീരുമാനമായിരുന്നുവെന്നും കുറിപ്പിൽ പറയുന്നതായാണ് വിവരം.

സംഭവവുമായി ബന്ധപ്പെട്ട സാഹചര്യങ്ങൾ വ്യക്തമാകേണ്ടതുണ്ടെന്നും പൊലീസ് അന്വേഷണം തുടരുകയാണെന്നും അധികൃതർ അറിയിച്ചു. മരണകാരണം ഉൾപ്പെടെയുള്ള കാര്യങ്ങൾ പോസ്റ്റ്മോർട്ടം റിപ്പോർട്ട് ലഭിച്ചതിന് ശേഷമേ വ്യക്തമാകൂ.

2001 മുതൽ 2026 വരെ തുടർച്ചയായി 25 വർഷം റാംപുർഹട്ട് മണ്ഡലത്തെ പ്രതിനിധീകരിച്ച അഞ്ചുതവണ എംഎൽഎയായിരുന്നു ആശിഷ് ബാനർജി. പശ്ചിമ ബംഗാൾ നിയമസഭയുടെ ഡെപ്യൂട്ടി സ്പീക്കർ സ്ഥാനവും മുൻ മന്ത്രിസ്ഥാനവും അദ്ദേഹം വഹിച്ചിട്ടുണ്ട്.

എന്നാൽ 2026ലെ നിയമസഭാ തിരഞ്ഞെടുപ്പിൽ ബിജെപി സ്ഥാനാർഥി ധ്രുബ സാഹയോട് ആശിഷ് ബാനർജി പരാജയപ്പെട്ടു. തിരഞ്ഞെടുപ്പ് പരാജയത്തിന് പിന്നാലെ അദ്ദേഹം സജീവ രാഷ്ട്രീയത്തിൽ നിന്ന് വിട്ടുനിന്നിരുന്നതായി റിപ്പോർട്ടുകളുണ്ട്.

സംഘടനാപരമായ വിഷയങ്ങളിൽ അദ്ദേഹം അതൃപ്തി പ്രകടിപ്പിച്ചിരുന്നതായും അടുത്തിടെ പാർട്ടിയിലെ ഒരു സംഘടനാ പദവിയിൽ നിന്ന് രാജിവച്ചിരുന്നതായും റിപ്പോർട്ടുകളുണ്ടായിരുന്നു. മരണവുമായി ബന്ധപ്പെട്ട മറ്റ് സാഹചര്യങ്ങളും ആരോപണങ്ങളും പൊലീസ് വിശദമായി പരിശോധിച്ചുവരികയാണ്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്