പറന്നുയർന്ന് രണ്ട് മണിക്കൂറിനകം എഞ്ചിൻ മുന്നറിയിപ്പ്; ജിദ്ദയിലേക്കുള്ള എയർ ഇന്ത്യ എക്‌സ്പ്രസ് വിമാനം കണ്ണൂരിൽ തിരിച്ചിറക്കി

JUNE 16, 2026, 1:49 AM

കണ്ണൂർ: കണ്ണൂരിൽ നിന്ന് ജിദ്ദയിലേക്ക് പുറപ്പെട്ട എയർ ഇന്ത്യ എക്‌സ്പ്രസ് വിമാനം സാങ്കേതിക തകരാറിനെ തുടർന്ന് അടിയന്തരമായി തിരിച്ചിറക്കി. യാത്രയ്ക്കിടെ എഞ്ചിനുമായി ബന്ധപ്പെട്ട മുന്നറിയിപ്പ് ലഭിച്ചതോടെയാണ് പൈലറ്റുമാർ വിമാനം തിരിച്ചെത്തിക്കാൻ തീരുമാനിച്ചത് എന്നാണ് ലഭിക്കുന്ന വിവരം.

180-ലധികം യാത്രക്കാരുമായി ഇന്ന് രാവിലെ 7.40-നാണ് വിമാനം കണ്ണൂർ വിമാനത്താവളത്തിൽ നിന്ന് ജിദ്ദയിലേക്ക് പറന്നുയർന്നത്. യാത്ര ആരംഭിച്ച് ഏകദേശം രണ്ട് മണിക്കൂർ പിന്നിട്ടപ്പോഴാണ് കോക്പിറ്റിൽ എഞ്ചിൻ മുന്നറിയിപ്പ് ലൈറ്റ് തെളിഞ്ഞത്. ഇതോടെ സുരക്ഷ മുൻനിർത്തി വിമാനം തിരിച്ചിറക്കാനുള്ള നടപടികൾ ആരംഭിക്കുകയായിരുന്നു.

ആദ്യം വിമാനം മംഗളൂരു വിമാനത്താവളത്തിൽ ഇറക്കാനുള്ള സാധ്യത പരിശോധിച്ചെങ്കിലും അത് സാധ്യമായില്ല. തുടർന്ന് വിമാനം കണ്ണൂരിലേക്ക് തിരിച്ചുവിടുകയായിരുന്നു. സുരക്ഷാ മാനദണ്ഡങ്ങളുടെ ഭാഗമായി ആകാശത്ത് കുറച്ചുസമയം വട്ടമിട്ട് പറന്ന് ഇന്ധനത്തിന്റെ അളവ് കുറച്ച ശേഷമാണ് വിമാനം ലാൻഡ് ചെയ്തത്.

വിമാനം കണ്ണൂർ വിമാനത്താവളത്തിൽ സുരക്ഷിതമായി ഇറക്കിയതായും എല്ലാ യാത്രക്കാരും സുരക്ഷിതരാണെന്നും വിമാനത്താവള അധികൃതർ അറിയിച്ചു. യാത്രക്കാർക്ക് യാതൊരു പരിക്കോ ആരോഗ്യപ്രശ്നമോ റിപ്പോർട്ട് ചെയ്തിട്ടില്ല.

തുടർന്ന് നടത്തിയ സാങ്കേതിക പരിശോധനയിൽ ഇന്ധന ഫിൽട്ടറുമായി ബന്ധപ്പെട്ട തകരാർ കണ്ടെത്തിയതായാണ് പ്രാഥമിക വിവരം. പ്രശ്നം പരിഹരിക്കുന്നതിനുള്ള നടപടികൾ ആരംഭിച്ചതായും ആശങ്കപ്പെടേണ്ട സാഹചര്യമില്ലെന്നും അധികൃതർ വ്യക്തമാക്കി.

സംഭവത്തെ തുടർന്ന് യാത്രക്കാരുടെ തുടർയാത്രയ്ക്ക് പകരം ക്രമീകരണങ്ങൾ ഏർപ്പെടുത്താനുള്ള നടപടികളും എയർ ഇന്ത്യ എക്‌സ്പ്രസ് ആരംഭിച്ചിട്ടുണ്ട്.