മുഖ്യമന്ത്രിയെ തീരുമാനിക്കുന്നതിൽ പരസ്യ പ്രതിഷേധം വേണ്ട; പ്രവർത്തകർ പക്വത കാണിക്കണമെന്ന് ചാണ്ടി ഉമ്മൻ

MAY 9, 2026, 4:02 AM

തിരുവനന്തപുരം: സംസ്ഥാനത്തെ പുതിയ മുഖ്യമന്ത്രിയെ തിരഞ്ഞെടുക്കുന്നതുമായി ബന്ധപ്പെട്ട് കോൺഗ്രസ് പ്രവർത്തകർ തെരുവിലിറങ്ങി നടത്തുന്ന പരസ്യ പ്രതിഷേധങ്ങളെയും പ്രകടനങ്ങളെയും തള്ളി ചാണ്ടി ഉമ്മൻ എംഎൽഎ. ഇത്തരം പ്രവൃത്തികൾ യഥാർഥ പൊതുജനവികാരമല്ലെന്നും വൈകാരികത പ്രകടിപ്പിക്കുന്ന പ്രവർത്തകർ പക്വത കാണിക്കണമെന്നും അദ്ദേഹം ആവശ്യപ്പെട്ടു.

തെരുവിലെ പ്രതിഷേധങ്ങൾക്ക് പിന്നിൽ ബാഹ്യസമ്മർദങ്ങൾ ഉണ്ടോ എന്ന് പരിശോധിക്കേണ്ടതുണ്ടെന്ന് ചാണ്ടി ഉമ്മൻ പറഞ്ഞു. നേതാക്കളോടുള്ള സ്നേഹം പ്രകടിപ്പിക്കുന്നതിൽ തെറ്റില്ല, എന്നാൽ അതിൽ മിതത്വം പാലിക്കണം. പ്രകടനങ്ങൾക്കിടയിലേക്ക് പുറത്തുനിന്നുള്ളവർ നുഴഞ്ഞുകയറി പ്രശ്നങ്ങൾ സൃഷ്ടിച്ചാൽ അതിന്റെ ഉത്തരവാദിത്തം പാർട്ടിയുടെ മേൽ വരുമെന്നും അദ്ദേഹം മുന്നറിയിപ്പ് നൽകി.

തന്റെ മണ്ഡലമായ പുതുപ്പള്ളിയിലെ പ്രവർത്തകരോട് പരസ്യമായ ചർച്ചകൾക്കോ പ്രതിഷേധങ്ങൾക്കോ നിൽക്കരുതെന്ന് നിർദേശിച്ചിട്ടുണ്ടെന്നും അദ്ദേഹം വ്യക്തമാക്കി. ഉമ്മൻ ചാണ്ടിയെയും എ.കെ. ആന്റണിയെയും പോലുള്ള സമുന്നത നേതാക്കളെ മുഖ്യമന്ത്രിമാരായി തിരഞ്ഞെടുത്ത പാർട്ടിയുടെ പാരമ്പര്യത്തിലും നടപടിക്രമങ്ങളിലും പ്രവർത്തകർ വിശ്വാസമർപ്പിക്കണം.

സോഷ്യൽ മീഡിയയിലെ പ്രചാരണങ്ങളെ പൊതുജനവികാരമായി കാണാൻ കഴിയില്ല. ഇത്തരം ആഭ്യന്തര തർക്കങ്ങൾ മറ്റ് രാഷ്ട്രീയ പാർട്ടികൾ മുതലെടുക്കാൻ ശ്രമിക്കുമെന്നും അദ്ദേഹം ഓർമ്മിപ്പിച്ചു. പുതിയ മുഖ്യമന്ത്രിയെ തീരുമാനിക്കുന്ന കാര്യത്തിൽ കോൺഗ്രസ് ഹൈക്കമാൻഡും മുന്നണിയും ഉചിതമായ തീരുമാനം ഉടൻ കൈക്കൊള്ളുമെന്നും ചാണ്ടി ഉമ്മൻ കൂട്ടിച്ചേർത്തു.

Keywords: Chandy Oommen, Kerala Chief Minister selection, Congress, Oommen Chandy, A.K. Antony, Public protest, High Command.