മധ്യപ്രദേശില്‍ ഗോഗ്രവര്‍ഗക്കാരുടെ ആക്രമണത്തില്‍ എഎസ്‌ഐയടക്കം രണ്ടു പേര്‍ കൊല്ലപ്പെട്ടു

MARCH 16, 2025, 5:28 AM

ഭോപ്പാല്‍: മധ്യപ്രദേശിലെ മൗഗഞ്ച് ജില്ലയില്‍ ഒരു കൂട്ടം ആദിവാസികള്‍ നടത്തിയ ആക്രമണത്തില്‍ പൊലീസ് ഉദ്യോഗസ്ഥനടക്കം രണ്ടു പേര്‍ കൊല്ലപ്പെട്ടു. അക്രമികള്‍ ഒരാളെ തട്ടിക്കൊണ്ടുപോയി കൊലപ്പെടുത്തി. ഇയാളെ മോചിപ്പിക്കാനെത്തിയ പൊലീസ് സംഘത്തിനു നേരെയുണ്ടായ ആക്രമണത്തിലാണ് ഒരു അസിസ്റ്റന്റ് സബ് ഇന്‍സ്‌പെക്ടര്‍ (എഎസ്‌ഐ) കൊല്ലപ്പെട്ടത്. സംഭവത്തില്‍ അഞ്ച് പേരെ കസ്റ്റഡിയിലെടുത്തിട്ടുണ്ട്.

രേവ റേഞ്ച് ഡെപ്യൂട്ടി ഇന്‍സ്‌പെക്ടര്‍ ജനറല്‍ ഓഫ് പോലീസ് സാകേത് പാണ്ഡെ പറയുന്നതനുസരിച്ച്, ഒരു എഎസ്‌ഐ ഉള്‍പ്പെടെ രണ്ട് പേര്‍ക്ക് ജീവന്‍ നഷ്ടപ്പെട്ടു, മറ്റ് പോലീസുകാര്‍ക്ക് നിസാര പരിക്കേറ്റു.

ഏതാനും മാസങ്ങള്‍ക്ക് മുമ്പ് അശോക് കുമാര്‍ എന്ന ആദിവാസിയെ കൊലപ്പെടുത്തിയതിന് പ്രതികാരമായി കോള്‍ ഗോത്രക്കാരുടെ ഒരു സംഘം സണ്ണി ദ്വിവേദിയെ തട്ടിക്കൊണ്ടുപോയതായി വൃത്തങ്ങള്‍ പറഞ്ഞു. അശോക് കുമാര്‍ ഒരു റോഡപകടത്തില്‍ മരിച്ചുവെന്നായിരുന്നു പോലീസ് രേഖകള്‍.

മുന്നറിയിപ്പ് ലഭിച്ചതിനെത്തുടര്‍ന്ന്, ഷാപൂര്‍ പോലീസ് സ്റ്റേഷന്‍ ഹൗസ് ഓഫീസര്‍ സന്ദീപ് ഭാരതിയയുടെ നേതൃത്വത്തിലുള്ള സംഘം ദ്വിവേദിയെ രക്ഷിക്കാന്‍ ഗാദ്ര ഗ്രാമത്തിലേക്ക് എത്തി. പൊലീസ് എത്തുമ്പോഴേക്കും ദ്വിവേദിയെ അക്രമികള്‍ മര്‍ദ്ദിച്ച് കൊലപ്പെടുത്തിയിരുന്നു.

പോലീസ് എത്തിയപ്പോള്‍, ഗോത്രവര്‍ഗക്കാര്‍ വടികളും കല്ലുകളും ഉപയോഗിച്ച് അവരെ ആക്രമിക്കുകയും നിരവധി പേര്‍ക്ക് പരിക്കേല്‍ക്കുകയും ചെയ്തു. പരിക്കേറ്റ ഉദ്യോഗസ്ഥരെ ഉടന്‍ തന്നെ ആശുപത്രികളിലേക്ക് കൊണ്ടുപോയി, എന്നാല്‍ പ്രത്യേക സായുധ സേനയിലെ എഎസ്‌ഐ ചരണ്‍ ഗൗതം ചികിത്സയ്ക്കിടെ മരിച്ചു.

ജനക്കൂട്ടത്തെ പിരിച്ചുവിടാന്‍, പോലീസിന് ആകാശത്തേക്ക് വെടിവയ്‌ക്കേണ്ടിവന്നു. സ്ഥലത്ത് സുരക്ഷ ശക്തമാക്കിയിട്ടുണ്ട്.