ഒളിച്ചോടി 'ലിവ്-ഇൻ' ജീവിക്കുന്നത് കുടുംബത്തിന്റെ മാനം കെടുത്തും; സംരക്ഷണം നൽകാൻ കഴിയില്ലെന്ന് കോടതി

JUNE 16, 2026, 12:04 AM

ഡൽഹി : ലിവിൻ റിലേഷൻഷിപ്പ് എന്നത് ഇന്ത്യയിലെ ഒരു വിഭാഗം ആളുകൾ സ്വീകരിച്ചിരിക്കുന്ന ഒരു ആധുനിക ജീവിതശൈലി ആണെന്നും, ഇതിന്റെ പേരിൽ പോലീസ് സംരക്ഷണം നൽകാൻ കഴിയില്ലെന്നും കോടതി. കേവലം കുറച്ചു ദിവസങ്ങൾ ഒരുമിച്ച് താമസിക്കുന്നത് കൊണ്ട് മാത്രം അതൊരു യഥാർത്ഥ 'ലിവിൻ റിലേഷൻഷിപ്പ്' ആകില്ലെന്ന് കോടതി നിരീക്ഷിച്ചു. ഭാവിയിൽ വിവാഹം കഴിക്കാൻ ഉദ്ദേശിക്കുന്നു എന്ന് പറയുന്നതുകൊണ്ട് മാത്രം ഇവർക്ക് സംരക്ഷണം നൽകാനാവില്ല.

ഇത്തരം ബന്ധങ്ങൾക്ക് പോലീസ് സംരക്ഷണം നൽകുന്നത്, നിയമപരമല്ലാത്ത ബന്ധങ്ങൾക്ക് കോടതിയുടെ അംഗീകാരം നൽകുന്നതിന് തുല്യമാകുമെന്ന് കോടതി മുന്നറിയിപ്പ് നൽകി. ഇത് സമൂഹത്തിന്റെ കെട്ടുറപ്പിനെ ബാധിക്കുമെന്നും കോടതി അഭിപ്രായപ്പെട്ടു. മാതാപിതാക്കളെ ഉപേക്ഷിച്ച് വീട് വിട്ടിറങ്ങുന്നത് കുടുംബത്തിന് അപമാനം വരുത്തുമെന്നും, മാതാപിതാക്കൾക്ക് അന്തസ്സോടെ ജീവിക്കാനുള്ള അവകാശത്തെ ഇത് ലംഘിക്കുന്നുവെന്നും ഉത്തരവിൽ പറയുന്നു. ഇന്ത്യൻ സംസ്കാരവും ധാർമ്മിക മൂല്യങ്ങളും ഉയർത്തിപ്പിടിക്കേണ്ടതുണ്ടെന്ന് കോടതി ഓർമ്മിപ്പിച്ചു.

വിവാഹം നിയമപരമായ പ്രത്യാഘാതങ്ങളും വലിയ സാമൂഹിക അംഗീകാരവുമുള്ള ഒരു പവിത്രമായ ബന്ധമാണെന്ന് കോടതി വ്യക്തമാക്കി. എന്നാൽ പാശ്ചാത്യ സംസ്കാരത്തിന്റെ സ്വാധീനം മൂലം സമൂഹം മാറിക്കൊണ്ടിരിക്കുകയാണെന്നും കോടതി ചൂണ്ടിക്കാട്ടി. ഭരണഘടനയുടെ 21-ാം അനുച്ഛേദം അനുസരിച്ച് അന്തസ്സോടെ ജീവിക്കാനുള്ള അവകാശം എല്ലാവർക്കുമുണ്ട്. എന്നാൽ, ഈ അവകാശത്തെ കീഴ്പ്പെടുത്തുന്ന വിധത്തിൽ അമിത സ്വാതന്ത്ര്യം അനുവദിക്കാനാവില്ലെന്നും കോടതി വിലയിരുത്തി.

പ്രായപൂർത്തിയായവരും അവിവാഹിതരുമാണെന്നും, പരസ്പരം ഇഷ്ടപ്പെടുന്നതുകൊണ്ട് ഒരുമിച്ച് താമസിക്കുകയാണെന്നും ഭാവിയിൽ വിവാഹം കഴിക്കുമെന്നും കാണിച്ചാണ് ദമ്പതികൾ ഹൈക്കോടതിയെ സമീപിച്ചത്. ഇതിന്റെ അടിസ്ഥാനത്തിൽ തങ്ങൾക്ക് പോലീസ് സംരക്ഷണം നൽകണമെന്നായിരുന്നു ഇവരുടെ ആവശ്യം. എന്നാൽ, പുരുഷൻ നിയമപരമായ വിവാഹപ്രായത്തിൽ എത്തിയിട്ടില്ലെന്നും, ഈ സാഹചര്യത്തിൽ സംരക്ഷണം നൽകാൻ കഴിയില്ലെന്നും വ്യക്തമാക്കിയാണ് കോടതി ഹർജി തള്ളിയത്.

ഇത്തരം ലിവിൻ റിലേഷൻഷിപ്പുകളിൽ കോടതികൾ നേരത്തെയും പലതവണ സംരക്ഷണം നിഷേധിച്ചിട്ടുണ്ടെന്നും, സാമൂഹിക സുസ്ഥിരത നിലനിർത്താൻ ഇത്തരം കർശന നിലപാടുകൾ ആവശ്യമാണെന്നുമാണ് കോടതിയുടെ പക്ഷം.