എയർ ഇന്ത്യയിൽ എല്ലാ പൈലറ്റുമാർക്കും നിർബന്ധിത ലഹരിപരിശോധന

AUGUST 14, 2026, 9:44 PM

ന്യൂഡൽഹി: വിമാനത്തിനുള്ളിൽ ഗുരുതരമായ സുരക്ഷാ വീഴ്ചയുണ്ടായ പശ്ചാത്തലത്തിൽ, എല്ലാ പൈലറ്റുമാർക്കും നിർബന്ധിത ലഹരി പരിശോധന നടത്താൻ എയർ ഇന്ത്യ. നിലവിലുള്ള വ്യോമയാന ചട്ടങ്ങൾക്ക് പുറമെ കൂടുതൽ കർശനമായ പരിശോധനകളാണ് വ്യാഴാഴ്ച മുതൽ ആരംഭിക്കുന്നത്. കമ്പനിയുടെ ആഭ്യന്തര കുറിപ്പിലാണ് ഈ നിർണായക വിവരം വ്യക്തമാക്കുന്നത്.

വ്യോമയാന നിയമപ്രകാരം നിരോധിച്ചിട്ടുള്ള ലഹരിവസ്തുക്കളും മരുന്നുകളും കണ്ടെത്താനാണ് ഈ പരിശോധനകൾ ലക്ഷ്യമിടുന്നത്. ഗുരുഗ്രാമിലെ എയർ ഇന്ത്യ അക്കാദമിയിലെ പരിശീലന സമയത്തോ, വിമാന സർവീസുകൾക്ക് ശേഷമുള്ള ബ്രീഫിംഗ് കേന്ദ്രങ്ങളിലോ, ഓഫീസുകളിലോ, പൈലറ്റുമാരുടെ ഹോം ബേസുകൾ നിർദ്ദേശിക്കുന്ന കേന്ദ്രങ്ങളിലോ വെച്ചായിരിക്കും പരിശോധന നടത്തുക. എയർ ഇന്ത്യയുടെ ഉപകമ്പനിയായ എയർ ഇന്ത്യ എക്സ്പ്രസിലെ പൈലറ്റുമാർക്കും ഈ നിയമം ബാധകമായിരിക്കും.

വർഷത്തിൽ കുറഞ്ഞത് പത്ത് ശതമാനം ഫ്ലൈറ്റ് ക്രൂ അംഗങ്ങളെ മാത്രം റാൻഡം പരിശോധനയ്ക്ക് വിധേയമാക്കണമെന്നാണ് നിലവിലെ വ്യോമയാന നിയമം പറയുന്നത്. എന്നാൽ ഇതിലും കർശനമായ നടപടികളിലേക്ക് കടക്കേണ്ടത് അത്യാവശ്യമാണെന്ന് എയർ ഇന്ത്യ തങ്ങളുടെ കുറിപ്പിൽ വ്യക്തമാക്കി. യാത്രാ സുരക്ഷ ഉറപ്പാക്കുന്നതിനും യാത്രക്കാർക്കിടയിൽ വിമാനക്കമ്പനിയോടുള്ള വിശ്വാസ്യത വർദ്ധിപ്പിക്കുന്നതിനുമാണ് ഈ മുൻകരുതൽ നടപടി.

ഓഗസ്റ്റ് നാലാം തീയതി ഫുക്കറ്റിൽ നിന്ന് ഡൽഹിയിലേക്ക് പറന്ന എയർ ഇന്ത്യയുടെ എയർബസ് എ320നിയോ വിമാനം ആകാശത്തുവെച്ച് പെട്ടെന്ന് 300 അടിയോളം താഴേക്ക് പതിച്ച സംഭവം അധികൃതർ അന്വേഷിച്ചു വരികയാണ്. ഈ വിമാനത്തിന്റെ ക്യാപ്റ്റൻ പരിശോധനയിൽ കഞ്ചാവ് ഉപയോഗിച്ചതായി സ്ഥിരീകരിച്ചിരുന്നു. ഇതിന് പിന്നാലെയാണ് എയർ ഇന്ത്യ എല്ലാ പൈലറ്റുമാർക്കും പരിശോധന നിർബന്ധമാക്കാൻ തീരുമാനിച്ചത്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്