ആവർത്തിച്ചുള്ള വൈദ്യുത തകരാറുകൾ; എയർ ഇന്ത്യയുടെ മുഴുവൻ ബോയിങ് 787 വിമാനങ്ങളും നിലത്തിറക്കണമെന്ന് പൈലറ്റുമാരുടെ സംഘടന

OCTOBER 11, 2025, 12:35 AM

ഡൽഹി: ആവർത്തിച്ചുള്ള വൈദ്യുത തകരാറുകൾ ചൂണ്ടിക്കാട്ടി എല്ലാ എയർ ഇന്ത്യ ബോയിംഗ് 787 വിമാനങ്ങളും ഉടൻ നിലത്തിറക്കണമെന്ന് ആവശ്യപ്പെട്ട് ഫെഡറേഷൻ ഓഫ് ഇന്ത്യൻ പൈലറ്റ്സ് (എഫ്ഐപി) സിവിൽ ഏവിയേഷൻ മന്ത്രി കിഞ്ചരപു റാം മോഹൻ നായിഡുവിന് കത്തെഴുതിയതായി റിപ്പോർട്ട്.

അതേസമയം വിയന്ന-ദില്ലി വിമാനം ഓട്ടോപൈലറ്റ്, സിസ്റ്റം തകരാറുകളെ തുടർന്ന് ദുബായിലേക്ക് തിരിച്ചുവിട്ടതിനെ തുടർന്ന് പ്രത്യേക ഡിജിസിഎ ഓഡിറ്റും ആവശ്യപ്പെട്ടിട്ടുണ്ട്. എയർ ഇന്ത്യയുടെ അഹമ്മദാബാദ്-ലണ്ടൻ AI-171 വിമാന അപകടത്തിന് ശേഷം, എയർ ഇന്ത്യ വിമാനങ്ങളിൽ നിരവധി സാങ്കേതിക പ്രശ്നങ്ങൾ നേരിടുന്നുണ്ടെന്ന് പൈലറ്റുമാരുടെ സംഘം വ്യക്തമാക്കി.

രാജ്യത്ത് B-787 വിമാനങ്ങളുടെ തകരാറുകളുടെ കാരണങ്ങൾ അന്വേഷിക്കാത്തതിനാൽ വിമാന യാത്രയുടെ സുരക്ഷ അപകടത്തിലാണെന്നും എയർ ഇന്ത്യയുടെ എല്ലാ B-787 വിമാനങ്ങളും ഉടൻ നിലത്തിറക്കണമെന്നും വൈദ്യുത സംവിധാനങ്ങൾ സമഗ്രമായി പരിശോധിക്കണമെന്നും മന്ത്രിയോട് അഭ്യർഥിച്ചു ആണ് കത്ത്.