പുതുച്ചേരി സർക്കാർ ജനഹിതത്തെ പ്രതിനിധീകരിക്കുന്നില്ല, അഴിമതിയിൽ മുങ്ങിയ ഭരണമെന്ന് രാഹുൽ ഗാന്ധി

APRIL 6, 2026, 4:11 AM

പുതുച്ചേരി: പുതുച്ചേരിയിലെ നിലവിലെ സർക്കാർ ജനഹിതത്തെ പ്രതിനിധീകരിക്കുന്നില്ലെന്നും അത് ഡൽഹിയിൽ നിന്ന് അടിച്ചേൽപ്പിച്ചതാണെന്നും ലോക്സഭാ പ്രതിപക്ഷ നേതാവ് രാഹുൽ ഗാന്ധി.

ലോസ്‌പേട്ടിൽ നടന്ന തിരഞ്ഞെടുപ്പ് റാലിയെ അഭിസംബോധന ചെയ്യുകയായിരുന്നു അദ്ദേഹം. പുതുച്ചേരിക്ക് പൂർണ്ണ സംസ്ഥാന പദവി നൽകുമെന്ന് വാഗ്ദാനം നൽകി ബിജെപി ജനങ്ങളെ വഞ്ചിച്ചുവെന്നും പുതുച്ചേരിയെ അദാനിക്ക് വിട്ടുകൊടുക്കാനാണ് അവർ ശ്രമിക്കുന്നതെന്നും രാഹുൽ ആരോപിച്ചു.

തന്ത്രപ്രധാനമായ കാരക്കൽ തുറമുഖം ഇതിനോടകം തന്നെ അദാനിക്ക് വിറ്റുകഴിഞ്ഞു. എല്ലാ കരാറുകളിലും 30 ശതമാനം കമ്മീഷൻ വാങ്ങുന്ന സർക്കാരായി ഇത് മാറിയെന്നും, മദ്യ ലൈസൻസുകൾ നൽകുന്നതിൽ വൻ ക്രമക്കേടുകൾ നടക്കുന്നുണ്ടെന്നും അദ്ദേഹം കുറ്റപ്പെടുത്തി.

ഏപ്രിൽ 9-ന് പുതുച്ചേരി നിയമസഭയിലേക്കുള്ള വോട്ടെടുപ്പ് നടക്കാനിരിക്കെ, കോൺഗ്രസ് സഖ്യം അധികാരത്തിൽ വന്നാൽ നടപ്പിലാക്കുന്ന വികസന പദ്ധതികളും അദ്ദേഹം പ്രഖ്യാപിച്ചു.

തൊഴിൽരഹിതരായ യുവാക്കൾക്ക് മാസം 2000 രൂപ സഹായധനം, 30,000 പുതിയ തൊഴിലവസരങ്ങൾ, സ്ത്രീകൾക്ക് ബസുകളിൽ സൗജന്യ യാത്ര, സർക്കാർ ജോലിക്കുള്ള പ്രായപരിധി 40 വയസ്സായി ഉയർത്തൽ എന്നിവയാണ് പ്രധാന വാഗ്ദാനങ്ങൾ. കൂടാതെ, ഓരോ കുടുംബത്തിനും 20 ലക്ഷം രൂപയുടെ ആരോഗ്യ ഇൻഷുറൻസ് പരിരക്ഷ നൽകുമെന്നും രാഹുൽ ഗാന്ധി ഉറപ്പുനൽകി. മെയ് 4-നാണ് വോട്ടെണ്ണൽ നടക്കുക. നിലവിലെ 30 അംഗ നിയമസഭയുടെ കാലാവധി ജൂൺ 15-നാണ് അവസാനിക്കുന്നത്.