കർണാടകയിൽ ചാമുണ്ഡി ഉത്സവത്തിൽ ബലൂൺ വിറ്റ ശേഷം മാതാവിനൊപ്പം ഉറങ്ങിയ ബാലികയെ പീഡിപ്പിച്ച് കൊന്നു

OCTOBER 9, 2025, 9:37 AM

ദസറ ആഘോഷങ്ങള്‍ക്കിടെ മൈസൂരുവില്‍ പെണ്‍കുട്ടി ബലാത്സംഗത്തിനിരയായി കൊല്ലപ്പെട്ടതായി വിവരം. ഇന്നലെ ചാമുണ്ഡേശ്വരി ക്ഷേത്രത്തിലെ തെപ്പോത്സവത്തില്‍ ബലൂണ്‍ വിറ്റ് ക്ഷീണിച്ച് മാതാവിനൊപ്പം കിടന്നുറങ്ങിയ കുട്ടിയെ തട്ടിക്കൊണ്ടുപോയി കൊലപ്പെടുത്തുകയായിരുന്നു.കലബുറുഗി സ്വദേശിനിയായ പത്ത് വയസുകാരിയാണ് ക്രൂര പീഡനത്തിന് ഇരയായി കൊല്ലപ്പെട്ടത്.

സംഭവത്തെക്കുറിച്ച് പൊലീസ് പറയുന്നത് ഇങ്ങനെ: ബുധനാഴ്ച രാത്രിയായിരുന്നു സംഭവം.ദൊഡ്ഡക്കെരെ മൈതാനത്ത് മാതാപിതാക്കള്‍ക്കൊപ്പം ഒരു താല്‍ക്കാലിക ടെന്റിലാണ് കുട്ടിയുടെ കുടുംബം താമസിച്ചിരുന്നത്. ഉത്സവത്തിന് എത്തുന്നവര്‍ ബലൂണുകള്‍ വിറ്റാണ് കുടുംബം ഉപജീവനമാര്‍ഗ്ഗം കണ്ടെത്തിയിരുന്നത്. ചാമുണ്ഡേശ്വരി ക്ഷേത്രത്തിലെ തെപ്പോത്സവത്തിന് പെണ്‍കുട്ടി മാതാപിതാക്കളോടൊപ്പം പോയിരുന്നു. തിരിച്ചെത്തിയ ശേഷം അമ്മക്കൊപ്പം ഉറങ്ങാന്‍ കിടന്ന കുട്ടിയെ രാവിലെ ആയപ്പോള്‍ കാണാതാവുകയായിരുന്നു.ടെന്റിൽ നിന്ന് ഏകദേശം 50 മീറ്റർ അകലെയുള്ള ഒരു മാലിന്യക്കൂനയ്ക്ക് സമീപം കുടുംബം നടത്തിയ തിരച്ചിലിൽ മൃതദേഹം കണ്ടെത്തി.ലൈംഗികാതിക്രമവും തുടർന്ന് കൊലപാതകവും നടന്നതായി സാഹചര്യങ്ങൾ സൂചിപ്പിക്കുന്നു.

പൊലീസ് സംഘം, ഡോഗ് സ്ക്വാഡ്, ഫോറൻസിക് വിദഗ്ധർ എന്നിവർ സ്ഥലത്തെത്തി തെളിവുകൾ ശേഖരിച്ചു.