കഫ് സിറപ്പുകൾക്ക് ഇനി ഡോക്ടറുടെ കുറിപ്പടി നിർബന്ധം; നിയന്ത്രണം കടുപ്പിച്ച് കേന്ദ്ര സർക്കാർ

JUNE 16, 2026, 12:18 AM

ന്യൂഡൽഹി: ചുമയ്ക്കുള്ള കഫ് സിറപ്പുകൾ ഉൾപ്പെടെയുള്ള എല്ലാത്തരം സിറപ്പുകളുടെയും വിപണനത്തിന് രാജ്യത്ത് കർശന നിയന്ത്രണം ഏർപ്പെടുത്തി കേന്ദ്ര സർക്കാർ. ഇനി മുതൽ ഡോക്ടറുടെ ഔദ്യോഗികമായ കുറിപ്പടി (പ്രിസ്‌ക്രിപ്ഷൻ) ഉണ്ടെങ്കിൽ മാത്രമേ ഫാർമസികളിൽ നിന്ന് ഇത്തരം സിറപ്പുകൾ വാങ്ങാൻ സാധിക്കൂ. ഇതുസംബന്ധിച്ച് ഡ്രഗ്‌സ് റൂൾസ് 1945 ഭേദഗതി ചെയ്തുകൊണ്ട് കേന്ദ്ര ആരോഗ്യ-കുടുംബക്ഷേമ മന്ത്രാലയം ഔദ്യോഗിക വിജ്ഞാപനം പുറത്തിറക്കി.

കേന്ദ്ര ആരോഗ്യ മന്ത്രാലയം ജൂൺ 9-ന് പുറപ്പെടുവിച്ച വിജ്ഞാപനത്തിലൂടെ 'ഡ്രഗ്‌സ് (ഫിഫ്ത് അമൻഡ്‌മെന്റ്) റൂൾസ് 2026' നിലവിൽ വന്നതോടെയാണ് പുതിയ നിയമം പ്രാബല്യത്തിലായത്. നിലവിൽ ഫാർമസികളിൽ നിന്ന് നേരിട്ട് (ഓവർ ദി കൗണ്ടർ) വാങ്ങാൻ സാധിക്കുന്ന മരുന്നുകളുടെ പട്ടികയിൽ നിന്നാണ് 'സിറപ്പുകൾ' എന്ന വിഭാഗത്തെ കേന്ദ്രം നീക്കം ചെയ്തത്. ഡ്രഗ്‌സ് നിയമത്തിലെ 'ഷെഡ്യൂൾ കെ' എന്ന വിഭാഗത്തിൽ വരുത്തിയ ഭേദഗതിയിലൂടെയാണ് സിറപ്പുകളുടെ നേരിട്ടുള്ള വിൽപ്പനയ്ക്ക് സർക്കാർ കടുത്ത നിയന്ത്രണമേർപ്പെടുത്തിയത്.

ഡ്രഗ്‌സ് ആൻഡ് കോസ്മെറ്റിക്സ് ആക്ട് 1940-ലെ 12, 33 വകുപ്പുകൾ നൽകുന്ന അധികാരം ഉപയോഗിച്ചാണ് കേന്ദ്ര സർക്കാർ ഡ്രഗ്‌സ് റൂൾസ് 1945 ഭേദഗതി ചെയ്തിരിക്കുന്നത്. ഔദ്യോഗിക ഗസറ്റിൽ പ്രസിദ്ധീകരിക്കുന്ന തീയതി മുതൽ പുതിയ നിയമം പ്രാബല്യത്തിൽ വരുമെന്ന് വിജ്ഞാപനത്തിൽ വ്യക്തമാക്കുന്നു.

ഡ്രഗ്‌സ് നിയമത്തിലെ 'ഷെഡ്യൂൾ കെ'-ൽ 'ക്ലാസ് ഓഫ് ഡ്രഗ്സ്' എന്ന തലക്കെട്ടിന് കീഴിലുള്ള ഏഴാം നമ്പറിലെ 'സിറപ്പുകൾ' എന്ന വാക്ക് പൂർണ്ണമായും ഒഴിവാക്കുന്നതായാണ് പുതിയ ഭേദഗതി. ആരോഗ്യ മന്ത്രാലയം ജോയിന്റ് സെക്രട്ടറി ഹർഷ് മംഗ്ലയാണ് ഇത് സംബന്ധിച്ച ഉത്തരവ് പുറപ്പെടുവിച്ചത്.

പുതിയ നിയമ ഭേദഗതിയോടെ, സാധാരണയായി വീടുകളിൽ ചെറിയ അസുഖങ്ങൾ വരുമ്പോൾ ഫാർമസികളിൽ നിന്ന് നേരിട്ട് വാങ്ങിയിരുന്ന കഫ് സിറപ്പുകളും മറ്റ് ഔഷധ സിറപ്പുകളും ഇനി മുതൽ അങ്ങനെ വാങ്ങാൻ സാധിക്കില്ല. രജിസ്റ്റർ ചെയ്ത ഒരു മെഡിക്കൽ പ്രാക്ടീഷണറുടെ സാക്ഷ്യപ്പെടുത്തിയ കുറിപ്പടി ഉണ്ടെങ്കിൽ മാത്രമേ ഫാർമസികൾ സിറപ്പുകൾ വിതരണം ചെയ്യാൻ പാടുള്ളൂ. കഫ് സിറപ്പുകളുടെ അമിത ഉപയോഗവും ദുരുപയോഗവും തടയുന്നതിന്റെ ഭാഗമായാണ് കേന്ദ്രത്തിന്റെ ഈ നിർണ്ണായക നീക്കം.