പഹൽഗാം ആക്രമണം നടത്തിയ ഭീകരരെ നാലു സ്ഥലങ്ങളിൽ സുരക്ഷ സേന കണ്ടെത്തിയെന്ന് റിപ്പോർട്ട്.

APRIL 27, 2025, 8:40 PM

ദില്ലി: പഹൽഗാം ആക്രമണം നടത്തിയ ഭീകരരെ നാലു സ്ഥലങ്ങളിൽ സുരക്ഷ സേന കണ്ടെത്തിയെന്ന് റിപ്പോർട്ട്. രാത്രി ഭക്ഷണം തേടി ഭീകരർ വീടുകളിലെത്തിയെന്നാണ് സൂചന.

ഭീകരർ നിലവിൽ ത്രാൽ കോക്കർനാഗ് മേഖലയിലാണ് ഉള്ളതെന്നും റിപ്പോർട്ട് പുറത്തുവരുന്നുണ്ട്. ഒരിടത്തുവെച്ച് സുരക്ഷ സേനയ്ക്കും ഭീകരർക്കും ഇടയിൽ വെടിവയ്പ് നടന്നു.

അതേസമയം പഹൽഗാം ഭീകരാക്രമണം സംബന്ധിച്ച ചർച്ചകൾക്കായി പ്രത്യേക പാർലമെന്റ് സമ്മേളനം വിളിക്കണമെന്ന് ആവശ്യപ്പെട്ട് കോൺഗ്രസും മറ്റ് പ്രതിപക്ഷ പാർട്ടികളും. ഇത് സംബന്ധിച്ച് കോൺഗ്രസ് കേന്ദ്രസർക്കാരിനു കത്തയയ്ക്കും.

പാർട്ടി നേതൃത്വം ഇതിനകം തന്നെ മറ്റ് പ്രതിപക്ഷ നേതാക്കളുമായി ഇക്കാര്യത്തിൽ കൂടിയാലോചനകൾ നടത്തിവരികയാണെന്ന് ദേശീയ മാധ്യമങ്ങൾ റിപ്പോർട്ട് ചെയ്യുന്നു. ആക്രമണത്തെ കുറിച്ചുളള വിവരങ്ങളും സർക്കാരിന്റെ തുടർ നടപടികളും ചർച്ച ചെയ്യുന്നതിനായാണ് ഇത്തരത്തിലൊരു ആവശ്യം.