കിഡ്‌നി സ്റ്റോൺ ; ഈ ലക്ഷണങ്ങൾ ശ്രദ്ധിക്കണം

MAY 27, 2025, 7:52 AM

വൃക്കയിലെ കല്ലുകൾ വളരെ സാധാരണമായ ഒരു രോഗമാണ്. എന്നാൽ അവയെ നിസ്സാരമായി കാണരുത്. കാൽസ്യം, യൂറിക് ആസിഡ് തുടങ്ങിയ ധാതുക്കളുടെയും ലവണങ്ങളുടെയും ശേഖരണം മൂലമാണ് വൃക്കയിലെ കല്ലുകൾ രൂപപ്പെടുന്നത്. അവ ഒരു മണൽത്തരി പോലെ ചെറുതോ - അപൂർവ്വമായി ഒരു ഗോൾഫ് ബോളിനേക്കാൾ വലുതോ ആകാം. വൃക്കയിലെ കല്ലുകളെ റീനൽ കാൽക്കുലി അല്ലെങ്കിൽ നെഫ്രോലിത്തിയാസിസ് എന്നും വിളിക്കുന്നു. കിഡ്‌നി സ്‌റ്റോണിന്‍റെ പ്രധാനപ്പെട്ട ലക്ഷണങ്ങൾ എന്തൊക്കെയാണെന്ന് നോക്കാം.

മനംപിരട്ടലും ഛർദിയും

മനംപിരട്ടലും ഛർദിയും മൂത്രത്തിൽ കല്ലുള്ളവരിൽ പൊതുവായി കണ്ടുവരാറുണ്ട്. എന്നാലിത് വേദന കൊണ്ടും ഉണ്ടാവാം. മൂത്രത്തിൽ കല്ലുള്ളതിന്റെ പ്രധാന ലക്ഷണങ്ങളായി ഇവയെ കാണേണ്ടതില്ല. പനി അടിവയറ്റിലോ നടുവിനോ വേദനയും ഒപ്പം പനിയുമുണ്ടെങ്കിൽ ഉടൻ തന്നെ ഡോക്ടറെ കാണണം. മൂത്രനാളിയിലുള്ള അണുബാധയുടെ പ്രധാനലക്ഷണങ്ങളാണിവ

അടിവയറ്റില്‍ വേദന, പുറം വേദന

അടിവയറ്റില്‍ വേദന തോന്നുന്നതും പുറകില്‍‌ വാരിയെല്ലുകള്‍ക്ക് താഴെ വൃക്കകള്‍ സ്ഥിതി ചെയ്യുന്ന ഇടത്ത് തോന്നുന്ന വേദനയും വൃക്കയിലെ കല്ലിന്‍റെ ഒരു പ്രധാന ലക്ഷണമാണ്.

മൂത്രമൊഴിക്കുമ്പോള്‍ വേദന, മൂത്രത്തിൽ രക്തം

മൂത്രമൊഴിക്കുമ്പോള്‍ വേദന, മൂത്രമൊഴിക്കുന്നതിൽ ബുദ്ധിമുട്ട്, മൂത്രമൊഴിക്കുമ്പോൾ പുകച്ചില്‍, മൂത്രത്തിൽ രക്തം കാണുക തുടങ്ങിയവ കിഡ്‌നി സ്‌റ്റോണിന്‍റെ ലക്ഷണങ്ങളാണ്.