നമ്മുടെ വീട്ടിലെ അന്തരീക്ഷം സുരക്ഷിതമാണോ? പുറത്തെ തിരക്കുകളിൽ നിന്നും മലിനീകരണത്തിൽ നിന്നും രക്ഷ നേടാൻ നാം ആശ്രയിക്കുന്ന വീടുകളിലും ഓഫീസുകളിലുമുള്ള വായുവിന്റെ ഗുണനിലവാരം (Indoor Air Quality - IAQ) ഇന്ന് ഒരു വലിയ ആരോഗ്യ വെല്ലുവിളിയായി മാറുകയാണ്. ഒരു വ്യക്തി തൻ്റെ ജീവിതത്തിൻ്റെ 90 ശതമാനം സമയവും കെട്ടിടങ്ങൾക്കുള്ളിലാണ് ചെലവഴിക്കുന്നത് എന്ന കണ്ടെത്തലാണ് അകത്തെ വായു ശുദ്ധിയുടെ പ്രാധാന്യം വർദ്ധിപ്പിക്കുന്നത്. പലപ്പോഴും പുറത്തുള്ളതിനേക്കാൾ 2 മുതൽ 5 ഇരട്ടി വരെ മലിനമായേക്കാം വീടിനകത്തെ വായു.
എന്തുകൊണ്ട് ഈ ഭീഷണി?
പുതിയ കെട്ടിട നിർമ്മാണ രീതികളും ഊർജ്ജക്ഷമത വർദ്ധിപ്പിക്കാനായി ജനലുകളും വാതിലുകളും പൂർണ്ണമായി അടച്ചുപൂട്ടുന്നതും വീടിനകത്തെ വായുസഞ്ചാരം കുറയ്ക്കുന്നു. ഇത് മലിനീകാരികളെ പുറത്തേക്ക് പോകാൻ അനുവദിക്കാതെ അകത്ത് തന്നെ കുടുക്കുന്നു. അടുക്കളയിലെ പാചകം, മെഴുകുതിരികൾ, സിഗരറ്റ് പുക, പഴയ ഫർണിച്ചറുകളിൽ നിന്നും പെയിൻ്റുകളിൽ നിന്നും പുറത്തുവരുന്ന വോളിറ്റൈൽ ഓർഗാനിക് സംയുക്തങ്ങൾ (VOCs), ഈർപ്പം കാരണം വളരുന്ന പൂപ്പൽ (Mold), വളർത്തുമൃഗങ്ങളുടെ രോമം, വൃത്തിയാക്കാനുള്ള രാസവസ്തുക്കൾ എന്നിവയെല്ലാം അകത്തെ വായുവിനെ വിഷലിപ്തമാക്കുന്നു. കാർബൺ മോണോക്സൈഡ് പോലുള്ള മാരകമായ വാതകങ്ങൾ ഉപകരണങ്ങളുടെ തകരാറുമൂലം വീടിനുള്ളിൽ നിറയാനുള്ള സാധ്യതയുമുണ്ട്.
ആരോഗ്യത്തെ എങ്ങനെ ബാധിക്കുന്നു?
അകത്തെ മോശം വായു ഗുണനിലവാരം, പെട്ടെന്നുള്ളതും ദീർഘകാലത്തേക്കുള്ളതുമായ ആരോഗ്യ പ്രശ്നങ്ങൾക്ക് കാരണമാകാം.
അടിയന്തിര ലക്ഷണങ്ങൾ: കണ്ണ്, മൂക്ക്, തൊണ്ട എന്നിവിടങ്ങളിലെ അസ്വസ്ഥത, തലവേദന, തലകറക്കം, തുടർച്ചയായ ക്ഷീണം, അലർജികൾ വർധിക്കുക എന്നിവയാണ് പെട്ടെന്ന് കണ്ടുപിടിക്കാവുന്ന ലക്ഷണങ്ങൾ. ചുമ, ശ്വാസം മുട്ടൽ എന്നിവക്ക് കാരണമാകുന്ന ആസ്ത്മ പോലുള്ള രോഗങ്ങളെ ഇത് കൂടുതൽ വഷളാക്കും.
ദീർഘകാല പ്രശ്നങ്ങൾ: ദീർഘകാലമായി മോശം വായു ശ്വസിക്കുന്നത് ശ്വാസകോശ രോഗങ്ങൾ (സി.ഒ.പി.ഡി, ശ്വാസകോശ അർബുദം), ഹൃദയസംബന്ധമായ രോഗങ്ങൾ (ഹാർട്ട് അറ്റാക്ക്, സ്ട്രോക്ക്) എന്നിവയ്ക്ക് സാധ്യത വർദ്ധിപ്പിക്കുന്നു. കൂടാതെ, കുട്ടികളിലും മുതിർന്നവരിലും ഇത് ശ്രദ്ധക്കുറവ്, ഓർമ്മക്കുറവ്, കാര്യങ്ങൾ തീരുമാനമെടുക്കുന്നതിനുള്ള ബുദ്ധിമുട്ട് തുടങ്ങിയ മാനസികാരോഗ്യ പ്രശ്നങ്ങൾക്കും കാരണമാകുമെന്നും പഠനങ്ങൾ പറയുന്നു. ഗർഭിണികൾ, കുട്ടികൾ, പ്രായമായവർ, മറ്റ് രോഗങ്ങളുള്ളവർ എന്നിവരാണ് ഈ ഭീഷണിയിൽ ഏറ്റവും മുന്നിൽ.
വായു ശുദ്ധിയാക്കാൻ എന്തുചെയ്യണം?
അകത്തെ വായുവിൻ്റെ ഗുണനിലവാരം മെച്ചപ്പെടുത്താൻ ലളിതമായ ചില കാര്യങ്ങൾ ശ്രദ്ധിച്ചാൽ മതി.
വായു സഞ്ചാരം ഉറപ്പാക്കുക: ദിവസവും കുറഞ്ഞത് 15 മിനിറ്റെങ്കിലും ജനലുകളും വാതിലുകളും തുറന്നിട്ട് ശുദ്ധവായു അകത്തേക്ക് കടത്തിവിടുക. പാചകം ചെയ്യുമ്പോഴും വൃത്തിയാക്കുമ്പോഴും എക്‌സ്‌ഹോസ്റ്റ് ഫാനുകൾ ഉപയോഗിക്കുക.
മലിനീകരണ സ്രോതസ്സുകൾ നിയന്ത്രിക്കുക: പുകവലി പൂർണ്ണമായും ഒഴിവാക്കുക, വിഷാംശമില്ലാത്ത ക്ലീനിംഗ് ഉൽപ്പന്നങ്ങൾ ഉപയോഗിക്കുക. ഈർപ്പം തങ്ങിനിൽക്കുന്ന ഇടങ്ങൾ വൃത്തിയാക്കി പൂപ്പൽ വളർച്ച തടയുക.
എയർ പ്യൂരിഫയറുകൾ ഉപയോഗിക്കുക: ഹെപ്പ (HEPA) ഫിൽട്ടറുകളുള്ള എയർ പ്യൂരിഫയറുകൾ ഉപയോഗിച്ച് അന്തരീക്ഷത്തിലെ നേർത്ത പൊടിപടലങ്ങളെ നീക്കം ചെയ്യാം.
ചെടികൾ വളർത്തുക: സ്നേക്ക് പ്ലാൻ്റ് (അമ്മായിയമ്മ നാക്ക്), പീസ് ലില്ലി, അരേക പാം തുടങ്ങിയ ചെടികൾ വീട്ടിൽ വെച്ച് വായു ശുദ്ധീകരിക്കാനും സഹായിക്കും.
-20251118105353.jpg)
.jpg)
