'രാഷ്ട്രപദവി ഹമാസിന്റെ ഭീകരതയ്ക്കുള്ള സമ്മാനം'; പാലസ്തീനെ രാഷ്ട്രമായി അംഗീകരിച്ചാല്‍ നടപടിയുണ്ടാകുമെന്ന് ഇസ്രായേല്‍

MAY 11, 2025, 8:22 PM

ജറുസലേം: പാലസ്തീന്റെ രാഷ്ട്രപദവി അംഗീകരിക്കുന്ന രാജ്യങ്ങള്‍ക്കെതിരേ ഏകപക്ഷീയമായ നടപടിയുണ്ടാകുമെന്ന് ഇസ്രായേല്‍ വിദേശകാര്യമന്ത്രി ഗിദയോന്‍ സറിന്റെ മുന്നറിയിപ്പ്. പാലസ്തീനെ ഔദ്യോഗികമായി അംഗീകരിക്കുമെന്ന് ചില രാജ്യങ്ങള്‍ പറഞ്ഞ സാഹചര്യത്തിലായിരുന്നു പ്രതികരണം. ജറുസലേമില്‍ ജര്‍മന്‍ വിദേശകാര്യമന്ത്രി ജൊഹാന്‍ വദേഫുലുമായിച്ചേര്‍ന്ന് നടത്തിയ പത്രസമ്മേളനത്തില്‍ സംസാരിക്കുകയായിരുന്നു അദേഹം.

പാലസ്തീന് രാഷ്ട്രപദവി നല്‍കുന്നത് ഹമാസിന്റെ ഭീകരതയ്ക്കുള്ള സമ്മാനമായി ഇസ്രായേല്‍ കണക്കാക്കുമെന്നും അദ്ദേഹം പറഞ്ഞു. പാലസ്തീന്‍-ഇസ്രയേല്‍ പ്രശ്‌നത്തിനുള്ള ശാശ്വതപരിഹാരം ദ്വിരാഷ്ട്രഫോര്‍മുല തന്നെയാണെന്ന് ജര്‍മന്‍ വിദേശകാര്യ മന്ത്രി പറഞ്ഞു. അതിനിടെ ഗാസയില്‍ ശനിയാഴ്ച രാത്രിയും ഞായറാഴ്ചയുമായി ഇസ്രയേല്‍ നടത്തിയ ആക്രമണങ്ങളില്‍ പത്തുപേര്‍ മരിച്ചു.