'ഷട്ട് അപ്പ് ട്രംപ്'; വൈറലായി ട്രംപിനെ പരിഹസിച്ചു കൊണ്ടുള്ള ഇറാന്റെ എഐ വീഡിയോ

APRIL 23, 2026, 3:00 AM

ടെഹ്റാൻ: അമേരിക്കയും ഇറാനും തമ്മിലുള്ള വെടിനിർത്തൽ ചർച്ചകൾ തുടരുന്നതിനിടെ, അമേരിക്കൻ പ്രസിഡന്റ് ഡൊണാൾഡ് ട്രംപ്നെ പരിഹസിച്ച് ഇറാൻ പുറത്തുവിട്ട എഐ വീഡിയോ സോഷ്യൽ മീഡിയയിൽ വൈറലാകുന്നു.

വെടിനിർത്തൽ കരാർ നീട്ടിയതായി ട്രംപ് പ്രഖ്യാപിച്ചതിന് പിന്നാലെയാണ് വീഡിയോ പുറത്ത് വന്നത്. ഹൈദരാബാദിലെ ഇറാനിയൻ കോൺസുലേറ്റ് ട്രംപിനെയും “പാകിസ്ഥാൻ്റെ അഭ്യർഥനപ്രകാരം” കരാർ നീട്ടിയെന്ന തീരുമാനത്തെയും പരിഹസിക്കുന്നതാണ് വീഡിയോയിലെ ഉള്ളടക്കം.

45 സെക്കൻഡ് ദൈർഘ്യമുള്ള വീഡിയോയിൽ ട്രംപും അമേരിക്കൻ വൈസ് പ്രസിഡൻ്റായ ജെ.ഡി. വാൻസ്യും മറ്റ് ഉദ്യോഗസ്ഥരും ഇറാൻ പ്രതിനിധികളെ കാത്തിരിക്കുന്നതായി കാണിക്കുന്നു. “ഇറാനുമായി മികച്ച ചര്‍ച്ചകൾ നടക്കുന്നു” എന്ന് ട്രംപ് പറയുന്നതും, പക്ഷേ ചർച്ചയ്ക്ക് ഇറാൻ ഇല്ലാത്തതിൽ ട്രംപ് നിരാശപ്പെടുന്നതും ദേഷ്യപ്പെടുന്നതുമാണ് വീഡിയോയിലെ പ്രധാന രംഗങ്ങൾ.

വീഡിയോയുടെ അവസാനത്തിൽ “മിണ്ടാതിരിക്കൂ ട്രംപ്” എന്ന സന്ദേശവും, “പാകിസ്ഥാൻ്റെ അഭ്യർഥനപ്രകാരം വെടിനിർത്തൽ കരാർ നീട്ടാം” എന്ന ട്രംപിന്റെ പരിഹാസരൂപത്തിലുള്ള സംഭാഷണവും ഉൾപ്പെടുത്തിയിട്ടുണ്ട്.

“എങ്ങനെയാണ് വെടിനിർത്തൽ നീട്ടിയത്? ഇറാനിൽ വീഡിയോ വൈറലാകുകയാണ്” എന്ന അടിക്കുറിപ്പോടെയാണ് ഈ വീഡിയോ സോഷ്യൽ മീഡിയയിൽ പ്രചരിക്കുന്നത്. ഇറാനുമായി ബന്ധപ്പെട്ട അക്കൗണ്ടുകൾ വഴിയാണ് വീഡിയോ വ്യാപകമായി പ്രചരിച്ചത്.

ഇതിന് മുമ്പും ട്രംപിനെ ലക്ഷ്യമിട്ട് എഐ വീഡിയോകൾ ഇറാൻ പുറത്തുവിട്ടിട്ടുണ്ട്. അതേസമയം, വെടിനിർത്തൽ കരാർ നീട്ടിയിട്ടും അമേരിക്ക-ഇറാൻ സംഘർഷത്തിൽ കാര്യമായ ശമനം ഉണ്ടായിട്ടില്ല.