ഇന്ത്യയും ചൈനയും പരസ്പര നേട്ടങ്ങളുടെ പങ്കാളികളാകുക: ഷി ജിന്‍പിംഗ്

APRIL 1, 2025, 7:49 AM

ബീജിങ്: ഇന്ത്യയും ചൈനയും പരസ്പര നേട്ടങ്ങളുടെ പങ്കാളികളാകുക എന്നതാണ് ശരിയായ തിരഞ്ഞെടുപ്പെന്ന് ചൈനീസ് പ്രസിഡന്റ് ഷി ജിന്‍പിംഗ്. ഉഭയകക്ഷി ബന്ധങ്ങളുടെ വികാസം ഇതിന് തെളിവാണ്.

2020 ല്‍ കിഴക്കന്‍ ലഡാക്ക് സൈനിക സംഘര്‍ഷത്തെത്തുടര്‍ന്ന് നാല് വര്‍ഷത്തിലേറെയായി നിലനിന്നിരുന്ന ബന്ധം പുനസ്ഥാപിക്കാന്‍ ഇന്ത്യയും ചൈനയും നടത്തുന്ന ശ്രമങ്ങള്‍ക്കിടയില്‍ ഷിയുടെ പരാമര്‍ശങ്ങള്‍ക്ക് പ്രാധാന്യം ലഭിച്ചു. ഇരു രാജ്യങ്ങളും തന്ത്രപരമായ ഉന്നതിയും ദീര്‍ഘകാല വീക്ഷണകോണും അടിസ്ഥാനമാക്കി ഉഭയകക്ഷി ബന്ധങ്ങള്‍ കൈകാര്യം ചെയ്യണമെന്നും സമാധാനപരമായ സഹവര്‍ത്തിത്വം, പരസ്പര വിശ്വാസം, പരസ്പര നേട്ടം, പൊതു വികസനം എന്നിവ ഉറപ്പാക്കണമെന്നും ഷി പറഞ്ഞു.

ഇരു രാജ്യങ്ങളും തമ്മിലുള്ള നയതന്ത്ര ബന്ധത്തിന്റെ 75-ാം വാര്‍ഷികത്തില്‍ പ്രസിഡന്റ് ദ്രൗപതി മുര്‍മുവിന് അയച്ച അഭിനന്ദന സന്ദേശത്തില്‍, ഇന്ത്യ-ചൈന ബന്ധം 'ഡ്രാഗണ്‍-ആന ടാംഗോ'യുടെ രൂപത്തിലായിരിക്കണമെന്ന് പ്രസിഡന്റ് ഷി ജിന്‍പിംഗ് പറഞ്ഞു- ഇരുരാജ്യങ്ങളുടേയും പ്രതീകാത്മക മൃഗങ്ങള്‍ തമ്മിലുള്ള നൃത്തം.

ഇരു രാജ്യങ്ങളും സംയുക്തമായി ഒരു ബഹുധ്രുവ ലോകത്തെയും അന്താരാഷ്ട്ര ബന്ധങ്ങളില്‍ കൂടുതല്‍ ജനാധിപത്യത്തെയും പ്രോത്സാഹിപ്പിക്കണമെന്ന് ഷി കൂട്ടിച്ചേര്‍ത്തു.