ടോം ഹാങ്ക്സ് ഇല്ലെങ്കിലും 'വുഡി' എത്തും! ടോയ് സ്റ്റോറി 6-ൽ വില്ലനാകാൻ എഐ?

JUNE 23, 2026, 11:05 PM

ഹോളിവുഡ് സിനിമാ ലോകത്തെ ഏറ്റവും പ്രിയപ്പെട്ട അനിമേഷൻ ഫ്രാഞ്ചൈസികളിലൊന്നായ 'ടോയ് സ്റ്റോറി' പുതിയൊരു വിവാദത്തിന് നടുവിലാണ്. വരാനിരിക്കുന്ന 'ടോയ് സ്റ്റോറി 6' ചിത്രത്തിൽ തന്റെ ഐക്കോണിക് കഥാപാത്രമായ 'വുഡി'ക്ക് (Woody) ശബ്ദം നൽകാൻ ഡിസ്നി ഒരുപക്ഷേ തന്നെയല്ല, മറിച്ച് കൃത്രിമ ബുദ്ധി അഥവാ എഐ (AI) സാങ്കേതികവിദ്യ ഉപയോഗിച്ചേക്കാമെന്ന് തുറന്നുപറഞ്ഞിരിക്കുകയാണ് വിഖ്യാത നടൻ ടോം ഹാങ്ക്സ്.

ദശകങ്ങളായി വുഡിക്ക് ശബ്ദം നൽകുന്ന ടോം ഹാങ്ക്സിന്റെ ഈ വെളിപ്പെടുത്തൽ ആരാധകരെയും സിനിമാ പ്രവർത്തകരെയും ഒരേപോലെ ഞെട്ടിച്ചിരിക്കുകയാണ്. എന്റർടൈൻമെന്റ് വീക്കിലിക്ക് നൽകിയ അഭിമുഖത്തിലാണ് 69-കാരനായ താരം ഈ ആശങ്ക പങ്കുവെച്ചത്. കഴിഞ്ഞ 30 വർഷമായി താൻ റെക്കോർഡ് ചെയ്ത വുഡിയുടെ ഡിജിറ്റൽ സംഭാഷണങ്ങൾ സ്റ്റുഡിയോകളുടെ പക്കലുണ്ടെന്നും, തന്റെ സാന്നിധ്യമില്ലാതെ തന്നെ പുതിയ ഡയലോഗുകൾ സൃഷ്ടിക്കാൻ എഐക്ക് സാധിക്കുമെന്നും അദ്ദേഹം പറഞ്ഞു.

"സമയം ആർക്കും വേണ്ടി കാത്തുനിൽക്കാറില്ല. എന്നെപ്പോലൊരു പതിപ്പ് അവർക്ക് എഐ വഴി തുന്നിച്ചേർക്കാൻ സാധിക്കുമോ എന്നതാണ് ചോദ്യം. ടോയ് സ്റ്റോറിക്കായി ഞങ്ങൾ ഇതുവരെ റെക്കോർഡ് ചെയ്ത എല്ലാ വാക്കുകളും ഡിജിറ്റൽ മീഡിയയിൽ ലഭ്യമാണ്. അതിനാൽ അവർക്ക് ആവശ്യമുള്ളത് എന്തും നിർമ്മിച്ചെടുക്കാം" — ടോം ഹാങ്ക്സ് വ്യക്തമാക്കി.

തന്റെ സഹതാരവും 'ബസ് ലൈറ്റിയറിന്' ശബ്ദം നൽകുന്നതുമായ ടിം അല്ലനും ഈ ചിന്ത വളരെ ഭയപ്പെടുത്തുന്നതാണെന്ന് സമ്മതിച്ചിട്ടുണ്ട്. ഒരു നടൻ ഇല്ലാത്ത ലോകത്തും എഐയിലൂടെ അയാളുടെ പ്രകടനങ്ങൾ തുടരുന്നത് ആധികാരികതയെ ചോദ്യം ചെയ്യുന്നതാണെന്നും ടോം കൂട്ടിച്ചേർത്തു. നിലവിൽ തിയേറ്ററുകളിൽ തകർപ്പൻ മുന്നേറ്റം നടത്തുന്ന 'ടോയ് സ്റ്റോറി 5' ബോക്സ് ഓഫീസിൽ 312 മില്യൺ ഡോളറിന്റെ വമ്പൻ ഓപ്പണിംഗാണ് സ്വന്തമാക്കിയത്.

കുട്ടികൾ കളിപ്പാട്ടങ്ങൾക്ക് പകരം സ്മാർട്ട് ഡിവൈസുകളിലേക്ക് തിരിയുന്ന ആധുനിക കാലഘട്ടത്തിന്റെ കഥയാണ് ആൻഡ്രൂ സ്റ്റാന്റൺ സംവിധാനം ചെയ്ത ഈ അഞ്ചാം ഭാഗം ചർച്ച ചെയ്യുന്നത്. വൻ വിജയമായതോടെ ആറാം ഭാഗത്തിനായുള്ള ആലോചനകൾ നടക്കുന്നുണ്ടെങ്കിലും, കഥയിൽ പുതുമയില്ലെങ്കിൽ പുതിയ ഭാഗം ചെയ്യുന്നതിൽ അർത്ഥമില്ലെന്നാണ് ടോം ഹാങ്ക്സിന്റെ നിലപാട്.