ടെയ്‌ലർ സ്വിഫ്റ്റും ട്രാവിസ് കെൽസും വിവാഹിതരാകുന്നു? അതിഥികളെ നേരിട്ട് വിളിച്ച് താരം, മാൻഹാട്ടൻ വേദിയായേക്കും

JUNE 6, 2026, 5:40 AM

ആഗോള പോപ്പ് ഗായിക ടെയ്‌ലർ സ്വിഫ്റ്റും അമേരിക്കൻ ഫുട്ബോൾ താരം ട്രാവിസ് കെൽസും തമ്മിലുള്ള വിവാഹ വാർത്തകൾ വീണ്ടും അന്താരാഷ്ട്ര മാധ്യമങ്ങളിൽ സജീവമാകുന്നു. ഇത്തവണ ന്യൂയോർക്ക് നഗരത്തെ കേന്ദ്രീകരിച്ചാണ് അഭ്യൂഹങ്ങൾ ശക്തമായിരിക്കുന്നത്. ഇരുവരുടെയും വിവാഹം വരാനിരിക്കുന്ന ജൂലൈ മാസത്തിൽ ഉണ്ടായേക്കുമെന്നാണ് ആരാധകരുടെ കണ്ടെത്തൽ.

പ്രമുഖ വിനോദ വാർത്താ മാധ്യമമായ 'ടിഎംഇസഡ്' (TMZ) പുറത്തുവിട്ട റിപ്പോർട്ടുകൾ പ്രകാരം, ജൂലൈ 3 ആണ് വിവാഹ തീയതിയായി ഇരുവരും പരിഗണിക്കുന്നത്. ന്യൂയോർക്കിലെ മാൻഹാട്ടൻ ആയിരിക്കും പ്രധാന വേദിയെന്നും റിപ്പോർട്ടുകളിൽ പറയുന്നു. എന്നാൽ, ടെയ്‌ലർ സ്വിഫ്റ്റോ ട്രാവിസ് കെൽസോ ഇതുവരെ ഈ വാർത്തകളോട് ഔദ്യോഗികമായി പ്രതികരിച്ചിട്ടില്ല.

വിവാഹവുമായി ബന്ധപ്പെട്ട കാര്യങ്ങളൊന്നും ഇതുവരെ അന്തിമമായി നിശ്ചയിച്ചിട്ടില്ലെങ്കിലും മാൻഹാട്ടന്റെ മധ്യഭാഗത്തായിരിക്കും ചടങ്ങുകൾ നടക്കുകയെന്ന് ഈ വിഷയത്തിൽ നേരിട്ട് അറിവുള്ള ഒരു ഉറവിടത്തെ ഉദ്ധരിച്ച് ടിഎംഇസഡ് റിപ്പോർട്ട് ചെയ്യുന്നു.

സെൻട്രൽ പാർക്ക്, റോക്ക്ഫെല്ലർ സെന്റർ, റേഡിയോ സിറ്റി മ്യൂസിക് ഹാൾ , ന്യൂയോർക്ക് പബ്ലിക് ലൈബ്രറി തുടങ്ങിയ പ്രമുഖ ന്യൂയോർക്ക് വേദികളാണ് നിലവിൽ അഭ്യൂഹങ്ങളിൽ ഇടംപിടിച്ചിരിക്കുന്നത്. മെഡിസൺ സ്ക്വയർ ഗാർഡന്റെ പേരും ചർച്ചകളിൽ വരുന്നുണ്ടെങ്കിലും ഇത് ഗൗരവമായി പരിഗണിക്കുന്നുണ്ടോ എന്നതിൽ വ്യക്തതയില്ല.

വിവാഹവുമായി ബന്ധപ്പെട്ട കാര്യങ്ങൾ അതീവ രഹസ്യമായി സൂക്ഷിക്കാനാണ് ഇരുവരും താല്പര്യപ്പെടുന്നത്. അതിഥികൾക്കായി ഔദ്യോഗിക ക്ഷണക്കത്തുകൾ അയക്കുന്നതിന് പകരം ടെയ്‌ലർ സ്വിഫ്റ്റ് നേരിട്ടാണ് സുഹൃത്തുക്കളെ ബന്ധപ്പെടുന്നത് എന്നാണ് വിവരം.

മോഡൽ കാർലി ക്ലോസ്, ഗായകൻ ബെൻസൺ ബൂൺ തുടങ്ങിയ പ്രമുഖ സെലിബ്രിറ്റികൾ വിവാഹത്തിൽ പങ്കെടുത്തേക്കുമെന്നാണ് ആദ്യസൂചനകൾ. അതേസമയം, നടൻ മൈൽസ് ടെല്ലറും ഭാര്യ കെല്ലി ടെല്ലറും അതിഥി പട്ടികയിൽ ഇടംപിടിച്ചേക്കില്ലെന്നും റിപ്പോർട്ടുകളുണ്ട്, എന്നാൽ ഇതിലൊന്നും ഔദ്യോഗിക സ്ഥിരീകരണമില്ല.