'ജയിലർ 2' ചിത്രത്തിനായി രജനികാന്ത് വാങ്ങുന്നത് 110 കോടി രൂപയോ?

OCTOBER 13, 2026, 11:48 PM

സൂപ്പർസ്റ്റാർ രജനികാന്ത് നായകനാകുന്ന ബ്രഹ്മാണ്ഡ ചിത്രം 'ജയിലർ 2' (Jailer 2) തിയേറ്ററുകളിലേക്ക്. 2023-ൽ പുറത്തിറങ്ങിയ മെഗാഹിറ്റ് ചിത്രം 'ജയിലറി'ന്റെ രണ്ടാം ഭാഗമായി എത്തുന്ന ഈ ചിത്രം ഒക്ടോബർ 15-നാണ് തിയേറ്ററുകളിൽ റിലീസ് ചെയ്യുന്നത്. സൺ പിക്ചേഴ്സിന്റെ ബാനറിൽ കലാനിധി മാരൻ നിർമ്മിച്ച് നെൽസൺ ദിലീപ്കുമാർ സംവിധാനം ചെയ്യുന്ന ചിത്രത്തിന്റെ വിശേഷങ്ങളും ബജറ്റും സംബന്ധിച്ച റിപ്പോർട്ടുകൾ ഇപ്പോൾ പുറത്തുവന്നിട്ടുണ്ട്.

രജനികാന്തിന്റെ പ്രതിഫലവും പ്രധാന താരങ്ങളുടെ ശമ്പളവും ഉൾപ്പെടെ 240 കോടി മുതൽ 300 കോടി രൂപ വരെയാണ് ചിത്രത്തിന്റെ ആകെ ബജറ്റ് എന്നാണ് റിപ്പോർട്ടുകൾ സൂചിപ്പിക്കുന്നത്. താരങ്ങളുടെ വലിയ പ്രതിഫലം ഒഴിവാക്കിയാൽ സിനിമയുടെ മറ്റ് പ്രൊഡക്ഷൻ ചെലവുകൾ 100 കോടിക്ക് താഴെയാണ് നിർത്തിയിരിക്കുന്നത്. എങ്കിലും സൺ പിക്ചേഴ്സ് ഇതിന്റെ ഔദ്യോഗിക കണക്കുകൾ പുറത്തുവിട്ടിട്ടില്ല.

ചിത്രത്തിൽ രജനികാന്ത് നായകനായി എത്തുമ്പോൾ അദ്ദേഹത്തിന്റെ പ്രതിഫലം മാത്രം 110 കോടി രൂപയാണെന്ന് 'ഫിലിംബീറ്റ് തമിഴ്' റിപ്പോർട്ട് ചെയ്യുന്നു. ഇതുകൂടാതെ ചിത്രത്തിന്റെ ലാഭവിഹിതവും രജനികാന്തിന് ലഭിക്കുമെന്നും, സിനിമ ബോക്സ് ഓഫീസിൽ വലിയ വിജയം നേടിയാൽ ആകെ വരുമാനം 180 കോടി രൂപ വരെയാകാമെന്നും റിപ്പോർട്ടിൽ പറയുന്നു.

ആദ്യ ഭാഗത്തിലെ പ്രമുഖ താരങ്ങൾക്കൊപ്പം നിരവധി വൻതാരങ്ങളാണ് രണ്ടാം ഭാഗത്തിൽ അണിനിരക്കുന്നത്. രമ്യ കൃഷ്ണൻ, യോഗി ബാബു, മിർണ, റിത്വിക് എന്നിവർക്കൊപ്പം എസ്.ജെ. സൂര്യ, മിഥുൻ ചക്രവർത്തി, സുരാജ് വെഞ്ഞാറമൂട്, വിദ്യാ ബാലൻ തുടങ്ങിയവരും ചിത്രത്തിലുണ്ട്.

ഇതിനുപുറമെ മോഹൻലാൽ, ശിവ രാജ്കുമാർ, ജാക്കി ഷ്രോഫ്, വിജയ് സേതുപതി, ഹൃതിക് റോഷൻ എന്നിവരുടെ കാമിയോ വേഷങ്ങളും ചിത്രത്തിലുണ്ടാകുമെന്നാണ് സൂചന. അനിരുദ്ധ് രവിചന്ദർ ആണ് ചിത്രത്തിന് സംഗീതം നൽകിയിരിക്കുന്നത്. കേരളത്തിലും വിദേശത്തുൾപ്പെടെ ചിത്രത്തിന്റെ അഡ്വാൻസ് ബുക്കിംഗ് ഇതിനോടകം കോടികളുടെ കളക്ഷൻ നേടി മുന്നേറുകയാണ്.