വാഷിങ്ടണ്: അമേരിക്കയുടെ അത്യാധുനിക എഫ്-35 യുദ്ധവിമാനത്തിന്റെ നിര്ണായക ഭാഗങ്ങള് റൂട്ട് മാറി ഹോങ്കോങ് വഴി ചൈനയുടെ കൈവശമെത്തിയ സംഭവം ആഗോളതലത്തില് വന് നയതന്ത്ര ചര്ച്ചകള്ക്ക് വഴിതുറക്കുന്നു. മൂന്ന് ദിവസത്തെ ഔദ്യോഗിക സന്ദര്ശനത്തിനായി അമേരിക്കയിലെത്തിയ ചൈനീസ് പ്രസിഡന്റ് ഷി ജിന്പിങും അമേരിക്കന് പ്രസിഡന്റ് ഡൊണാള്ഡ് ട്രംപും തമ്മില് നടക്കുന്ന നിര്ണ്ണായക കൂടിക്കാഴ്ചയില് ഈ വിഷയവും ഉയര്ന്നുവന്നേക്കുമെന്നാണ് റിപ്പോര്ട്ടുകള് സൂചിപ്പിക്കുന്നത്.
ഓസ്ട്രേലിയന് സൈന്യത്തിന്റെ എഫ്-35 വിമാനത്തിന്റെ കോക്ക്പിറ്റ് കനോപ്പിയും വെപ്പണ്സ്-ബേ ഡോറും പരിശോധനയ്ക്കായി അമേരിക്കയിലേക്ക് അയച്ചതായിരുന്നു. എന്നാല് യാത്രാമധ്യേ തെക്കന് കൊറിയയിലും തുടര്ന്ന് ഹോങ്കോങിലും അപ്രതീക്ഷിതമായി റൂട്ട് മാറിയെത്തിയ ഈ ഭാഗങ്ങള് ചൈന കസ്റ്റഡിയിലെടുക്കുകയായിരുന്നു. ഓസ്ട്രേലിയയില് നിന്നുള്ള വിവരങ്ങള് പ്രകാരം തെറ്റായ റൂട്ടിങിലൂടെയാണ് ഇവ ഹോങ്കോങില് എത്തിയതെന്ന് വ്യക്തമാക്കുന്നു.
യു.എസ് പ്രതിരോധ ആസ്ഥാനമായ പെന്റഗണും ഓസ്ട്രേലിയന് പ്രതിരോധ മന്ത്രാലയവും എഫ്-35 ജോയിന്റ് പ്രോഗ്രാം ഓഫീസും സംഭവത്തില് അന്വേഷണം ആരംഭിച്ചിട്ടുണ്ട്. റഡാറുകളില് പതിയാതിരിക്കാന് സഹായിക്കുന്ന സ്റ്റെല്ത്ത് സാങ്കേതികവിദ്യ ഉള്ക്കൊള്ളുന്ന അപൂര്വ്വ കോട്ടിങുള്ള ഭാഗങ്ങളാണ് കാണാതായിരിക്കുന്നത്. കാണാതായ ഭാഗങ്ങളില് തന്ത്രപ്രധാനമായ സാങ്കേതികവിദ്യകള് അടങ്ങിയിട്ടില്ലെന്ന് ഓസ്ട്രേലിയന് പ്രതിരോധ മന്ത്രി റിചാര്ഡ് മാര്ലെസ് വ്യക്തമാക്കിയെങ്കിലും, പ്രസ്തുത ഭാഗങ്ങള് സുരക്ഷിതമായി തിരിച്ചെടുക്കാനുള്ള ശ്രമങ്ങള് അമേരിക്കന് അധികൃതര് ഊര്ജ്ജിതമാക്കിയിരിക്കുകയാണ്. എന്നാല് ചൈനീസ് വിദേശകാര്യ മന്ത്രാലയം ഈ വിഷയത്തില് ഔദ്യോഗികമായി തങ്ങള്ക്ക് അറിവില്ലെന്നാണ് പ്രതികരിച്ചിട്ടുള്ളത്.
ലോക്ക്ഹീഡ് മാര്ട്ടിന് കമ്പനി വികസിപ്പിച്ച എഫ്-35 വിമാനങ്ങള് നിലവില് ലോകത്തിലെ തന്നെ ഏറ്റവും അത്യാധുനിക യുദ്ധവിമാനങ്ങളില് ഒന്നാണ്. ദക്ഷിണ കൊറിയ, ജപ്പാന്, സിംഗപ്പൂര്, ഓസ്ട്രേലിയ ഉള്പ്പെടെ ഇരുപതോളം രാജ്യങ്ങള് ഉപയോഗിക്കുന്ന ഈ വിമാനം ഇറാന് എതിരായ സൈനിക നീക്കങ്ങളിലും സജീവമായി പങ്കാളിയായിട്ടുണ്ട്.
ഒരു പതിറ്റാണ്ടിന് ശേഷമാണ് ചൈനീസ് പ്രസിഡന്റ് ഷി ജിന്പിങ് അമേരിക്കയിലെത്തുന്നത്. വാഷിങ്ടണിലെ ജോയിന്റ് ബേസ് ആന്ഡ്രൂസില് എത്തിച്ചേര്ന്ന ഷി ജിന്പിങിനെ ട്രംപും പ്രഥമവനിത മെലാനിയ ട്രംപും ചേര്ന്ന് സ്വീകരിച്ചു. വ്യാപാരം, നിര്മ്മിത ബുദ്ധി, തായ്വാന്, ഇറാന് വിഷയം എന്നിവയ്ക്കൊപ്പം ലോകശ്രദ്ധ നേടിയ ഈ വിമാനഭാഗങ്ങളുടെ കാണാതാകലും ഇരു നേതാക്കളും തമ്മിലുള്ള ചര്ച്ചകളില് പ്രധാനവിഷയമായേക്കും.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260701122032.jpg)
-20260924032416.jpg)
-20260924024515.jpg)
