തടവിലാക്കിയ യു.എസ് പൗരന്മാരുടെ മോചനം: ഷി ജിൻപിങ്ങുമായി ട്രംപ് ചർച്ച നടത്തും

SEPTEMBER 23, 2026, 9:45 PM

വാഷിംഗ്‌ടൺ : ചൈന തടങ്കലിൽ വെച്ചിരിക്കുന്ന രണ്ട് അമേരിക്കൻ പൗരന്മാരെ മോചിപ്പിക്കാൻ പ്രസിഡന്റ് ഡൊണാൾഡ് ട്രംപ് ചൈനീസ് ഭരണാധികാരി ഷി ജിൻപിങ്ങിനോട് ആവശ്യപ്പെടുമെന്ന് പ്രതീക്ഷ. എന്നാൽ ടിബറ്റ്, ഉയിഗുർ മുസ്ലിം സമുദായം, ചൈനയുടെ പുതിയ വംശീയ ഐക്യ നിയമം എന്നിവയുമായി ബന്ധപ്പെട്ട വിശാലമായ മനുഷ്യാവകാശ വിഷയങ്ങൾ ചർച്ചയിൽ വരുമോ എന്ന് വൈറ്റ് ഹൗസ് വ്യക്തമാക്കിയിട്ടില്ല.

വിദേശങ്ങളിൽ അനധികൃതമായി തടങ്കലിൽ കഴിയുന്ന അമേരിക്കക്കാരുടെ മോചനം ഉറപ്പാക്കുന്നതിന് ട്രംപ് മുൻഗണന നൽകുന്നുണ്ടെങ്കിലും, ചൈനയുടെ മനുഷ്യാവകാശ ലംഘനങ്ങളെക്കുറിച്ച് പരസ്യമായി സംസാരിക്കാൻ അദ്ദേഹം സാധാരണയായി മുതിരാറില്ല. മറ്റ് ലോകനേതാക്കളുമായുള്ള കൂടിക്കാഴ്ചകളിലും സമാനമായ നിലപാടാണ് അദ്ദേഹം സ്വീകരിച്ചിട്ടുള്ളത്.

2024ന്റെ അവസാനത്തോടെ തടവിലാക്കപ്പെട്ട വടക്കൻ കൊറിയൻ ആണവ പരീക്ഷണ വിദഗ്ദ്ധൻ യൂലിൻ ചെൻ, കഴിഞ്ഞ ജൂണിൽ അറസ്റ്റിലായ ഗവേഷകൻ മിൻ സിൻ എന്നീ രണ്ട് അമേരിക്കൻ പൗരന്മാരുടെ മോചനമാണ് ട്രംപ് ആവശ്യപ്പെടുക. മുൻപ് ബീജിങ്ങിൽ വെച്ച് നടന്ന കൂടിക്കാഴ്ചയിലും ട്രംപ് ഈ വിഷയം ഉന്നയിച്ചിരുന്നെങ്കിലും കാര്യമായ പുരോഗതി ഉണ്ടായിരുന്നില്ല.

എന്നാൽ, ചൈനീസ് ഭരണകൂടം തടവിലാക്കിയിരിക്കുന്ന തങ്ങളുടെ പൗരന്മാരുടെ മോചനത്തിനൊപ്പം ടിബറ്റുകാർക്കും ഉയിഗുറുകൾക്കും എതിരെയുള്ള അടിച്ചമർത്തലുകൾക്കെതിരെയും ട്രംപ് ശബ്ദമുയർത്തണമെന്ന് മനുഷ്യാവകാശ സംഘടനകളും ഡെമോക്രാറ്റിക് ജനപ്രതിനിധികളും ആവശ്യപ്പെടുന്നുണ്ട്. അന്താരാഷ്ട്ര വിഷയങ്ങളിൽ ട്രംപ് കച്ചവടപരമായ സമീപനമാണ് സ്വീകരിക്കുന്നതെന്നാണ് അവരുടെ വിമർശനം.

ഉയിഗുറുകളെ നിഷ്ഠൂരമായി തടങ്കൽപ്പാളയങ്ങളിൽ പാർപ്പിച്ചിരിക്കുകയാണെന്ന് മനുഷ്യാവകാശ സംഘടനകൾ ആരോപിക്കുമ്പോൾ, ഭീകരവാദവും തീവ്രവാദവും തടയുന്നതിനുള്ള പരിശീലന കേന്ദ്രങ്ങൾ മാത്രമാണ് ഇവയെന്നാണ് ചൈനയുടെ വിശദീകരണം. ഇതോടൊപ്പം ടിബറ്റിലെ ചൈനീസ് ഭരണത്തിനെതിരെയുള്ള ആരോപണങ്ങളും ബീജിങ് തള്ളിക്കളയുന്നു.