കൃത്രിമബുദ്ധി മനുഷ്യന്റെ ഭാവിയെ മാറ്റിമറിക്കുമെന്ന് നാം കേള്ക്കാന് തുടങ്ങിയിട്ട് നാളുകളേറെയായി. എന്നാല് അത്രയും കാലം നമ്മള് കണ്ട സ്വപ്നങ്ങളെയെല്ലാം ഭീതിയുടെ നിഴലിലാക്കിക്കൊണ്ട്, സാങ്കേതികവിദ്യയുടെ സ്രഷ്ടാക്കള് തന്നെ ഇന്ന് യുണൈറ്റഡ് നേഷന്സിന്റെ വാതിലുകളില് മുട്ടുകയാണ്. 'ഈ രാക്ഷസനെ അടക്കിനിര്ത്താന് ഞങ്ങളെ സഹായിക്കൂ' എന്ന അഭ്യര്ത്ഥനയുമായി, കനേഡിയന് എഐ പയനിയര് യോഷുവ ബെഞ്ചിയോ, പ്രമുഖ എഐ കമ്പനികളായ ആന്ത്രോപിക്കിന്റെ സിഇഒ ഡാരിയോ അമോഡെയ്, ഓപ്പണ് എഐ സിഇഒ സാം ആള്ട്ട്മാന് എന്നിവര് ഐക്യരാഷ്ട്രസഭയുടെ രക്ഷാസമിതിക്ക് മുന്നില് നടത്തിയ അവതരണങ്ങള് ആഗോളതലത്തില് വലിയൊരു ചര്ച്ചയ്ക്കാണ് തിരികൊളുത്തിയിരിക്കുന്നത്.
എഐ ഉയര്ത്തുന്ന അപകടങ്ങള് വെറുമൊരു ശാസ്ത്ര കഥയല്ലെന്നും അത് ഉടനടി നേരിടേണ്ട യഥാര്ത്ഥ ഭീഷണിയാണെന്നും അവര് ലോക നേതാക്കളെ ബോധ്യപ്പെടുത്തി. ഏതെങ്കിലും ഒരു രാജ്യത്തിന് ഒറ്റയ്ക്ക് തടഞ്ഞുനിര്ത്താന് കഴിയാത്തതും ഭൂപടത്തിലെ അതിര്ത്തികളെ മാനിക്കാത്തതുമായ സമാനതകളില്ലാത്ത പ്രതിസന്ധിയാണ് എഐ സൃഷ്ടിക്കാന് പോകുന്നതെന്ന് യോഷുവ ബെഞ്ചിയോ മുന്നറിയിപ്പ് നല്കി. മനുഷ്യരാശിയുടെ കയ്യില് നിന്ന് ഭാവിയുടെ നിയന്ത്രണം പൂര്ണ്ണമായും നഷ്ടപ്പെടാന് പോവുകയാണെന്ന സാം ആള്ട്ട്മാന്റെയും ഡാരിയോ അമോഡെയുടെയും വാക്കുകള്, എഐ രംഗത്ത് നാം എത്തിനില്ക്കുന്ന അപകടകരമായ സാഹചര്യത്തെയാണ് വരച്ചുകാട്ടുന്നത്.
സാങ്കേതികവിദ്യ വികസിപ്പിക്കുന്നവര് തങ്ങളുടെ നേട്ടങ്ങളെക്കുറിച്ച് വാതോരാതെ സംസാരിക്കാറുള്ള ലോകത്ത്, സ്രഷ്ടാക്കള് തന്നെ ഇത്തരമൊരു മുന്നറിയിപ്പുമായി രംഗത്തുവരുമ്പോള് അത് തള്ളിക്കളയാനാവില്ല. ഇത് വെറുമൊരു മാര്ക്കറ്റിംഗ് തന്ത്രമല്ലെന്നും, സ്വതന്ത്ര വിദഗ്ദ്ധര് തെളിവുകള് സഹിതം ശരിവെച്ച അപകടങ്ങളാണെന്നും ബെഞ്ചിയോ എടുത്തുപറയുന്നുണ്ട്. ഈ മുന്നറിയിപ്പുകളെ സാധൂകരിക്കുന്ന ശക്തമായ ചില സംഭവ വികാസങ്ങള് അടുത്തകാലത്തായി പുറത്തുവന്നിട്ടുണ്ട്.
മനുഷ്യര് നല്കുന്ന നിര്ദ്ദേശങ്ങളെയും സുരക്ഷാ മാനദണ്ഡങ്ങളെയും എഐ സംവിധാനങ്ങള് പരസ്യമായി ലംഘിക്കാന് തുടങ്ങി എന്നതാണതില് പ്രധാനം. മനുഷ്യന്റെ യാതൊരുവിധ നിര്ദ്ദേശവുമില്ലാതെ, ഓപ്പണ് എഐയുടെ എഐ ഏജന്റുകള് സ്വയം പ്രവര്ത്തിച്ച് ഹഗ്ഗിംഗ് ഫേസ് എന്ന എഐ സ്റ്റാര്ട്ടപ്പിനെ ഹാക്ക് ചെയ്ത സംഭവം ഈ അപകടത്തിന്റെ ആഴം വ്യക്തമാക്കുന്നു. സുരക്ഷാ പരിശോധനകളെ മറികടക്കാനും കമ്പ്യൂട്ടര് സിസ്റ്റങ്ങളിലെ തകരാറുകള് കണ്ടെത്തി അതിലൂടെ അനധികൃതമായി കടന്നുകയറാനും എഐക്ക് കഴിയും എന്ന് തെളിഞ്ഞതോടെയാണ് ശാസ്ത്രലോകം ഞെട്ടിയത്.
ഈ ദശകത്തിന്റെ അവസാനത്തോടെ എഐ മനുഷ്യരാശിയെ ഇല്ലാതാക്കുമെന്ന് സാങ്കേതിക വിദ്യ കെട്ടിപ്പടുക്കുന്നവര് തന്നെ ആത്മാര്ത്ഥമായി വിശ്വസിക്കുന്നുവെന്ന പ്രമുഖ ഗവേഷകന്റെ വെളിപ്പെടുത്തല് ഇതിനോട് ചേര്ത്തു വായിക്കേണ്ടതാണ്. എന്നാല് ഈ യാഥാര്ത്ഥ്യം മുന്നില് നില്ക്കുമ്പോഴും ലോക രാഷ്ട്രങ്ങള്ക്കിടയിലെ രാഷ്ട്രീയ ഭിന്നത സാങ്കേതിക സുരക്ഷയ്ക്ക് വലിയൊരു തടസ്സമായി നില്ക്കുന്നു. കാനഡ പ്രധാനമന്ത്രി മാര്ക്ക് കാര്ണിയുടെ നേതൃത്വത്തില് അയര്ലന്ഡ്, ജര്മ്മനി, നോര്വേ, തുര്ക്കി തുടങ്ങി ഇരുപതോളം രാജ്യങ്ങള് എഐക്ക് മേല് അന്താരാഷ്ട്ര മേല്നോട്ടവും കൂട്ടായ്മയും വേണമെന്ന് ആവശ്യപ്പെട്ട് യുഎന് പൊതുസഭയില് സംയുക്ത പ്രസ്താവനയിറക്കി.
എഐയുടെ സുരക്ഷ പരിശോധിക്കാനും അതിരുകടക്കുമ്പോള് ഇടപെടാനും ശക്തമായ ഒരു അന്താരാഷ്ട്ര സ്ഥാപനം രൂപീകരിക്കണമെന്നാണ് ഈ രാജ്യങ്ങളുടെ ആവശ്യം. എന്നാല് ആഗോളതലത്തില് ഇത്തരം നിയന്ത്രണങ്ങള് കൊണ്ടുവരുന്ന ഏത് നീക്കത്തെയും നിരസിക്കുന്ന നിലപാടാണ് അമേരിക്കന് പ്രസിഡന്റ് ഡൊണാള്ഡ് ട്രംപ് സ്വീകരിച്ചത്. ലോകത്തിലെ ഏറ്റവും വലിയ ശക്തികളായ അമേരിക്കയും ചൈനയും സഹകരിക്കാതെ ഇത്തരം നിയന്ത്രണങ്ങള് പ്രായോഗികമല്ലെന്ന് നയതന്ത്ര വിദഗ്ദ്ധര് അഭിപ്രായപ്പെടുന്നു. കാനഡയെപ്പോലുള്ള ഇടത്തരം ശക്തികള്ക്ക് ഇതില് വിരലിലെണ്ണാവുന്ന കാര്യങ്ങളേ ചെയ്യാന് കഴിയൂ.
ഒരു സങ്കീര്ണ്ണമായ ഉടമ്പടിയേക്കാള് ഉപരി അന്താരാഷ്ട്ര തലത്തില് സ്വയംഭരണാധികാരമുള്ള സൂപ്പര് ഇന്റലിജന്സ് സംവിധാനങ്ങള് വികസിപ്പിക്കുന്നത് തടയാന് യുഎസും ചൈനയും തമ്മില് ഒരു അടിസ്ഥാന ധാരണയിലെത്തുകയാണ് ആദ്യം വേണ്ടത്. സാങ്കേതിക വിദ്യ നിര്മ്മിക്കുമ്പോള് തന്നെ അതില് സുരക്ഷയും നിയന്ത്രണവും ഉള്പ്പെടുത്തുന്ന രീതിയിലേക്ക് ആഗോള ശാസ്ത്രലോകം മാറേണ്ടതുണ്ട്. ഇല്ലെങ്കില് നമ്മള് നിര്മ്മിച്ച യന്ത്രങ്ങള് തന്നെ നമ്മുടെ അന്ത്യം കുറിക്കുന്ന നാളുകള് വിദൂരമല്ലെന്ന മുന്നറിയിപ്പാണ് ഐക്യരാഷ്ട്രസഭയില് ഉയര്ന്ന് കേട്ടത്.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260924032416.jpg)
-20260924024515.jpg)
