ഉത്തേജക മരുന്ന് ഉപയോഗം പാകിസ്ഥാൻ ഓൾറൗണ്ടർ മുഹമ്മദ് നവാസിന് മൂന്ന് മാസത്തെ വിലക്ക്

JULY 18, 2026, 5:19 AM

ഈ വർഷം നടന്ന ടി20 ലോകകപ്പിനിടെ ഉത്തേജക മരുന്ന് പരിശോധനയിൽ പരാജയപ്പെട്ടതിനെ തുടർന്ന് പാകിസ്ഥാൻ ഓൾറൗണ്ടർ മുഹമ്മദ് നവാസിന് അന്താരാഷ്ട്ര ക്രിക്കറ്റ് കൗൺസിൽ (ഐസിസി) മൂന്ന് മാസത്തെ വിലക്കേർപ്പെടുത്തി

എന്നാൽ താരം ലഹരിവസ്തുക്കളുടെ ദുരുപയോഗത്തിനുള്ള പുനരധിവാസ പരിപാടി വിജയകരമായി പൂർത്തിയാക്കിയാൽ സസ്‌പെൻഷൻ കാലയളവ് ഒരു മാസമായി ചുരുക്കുമെന്നും ഐസിസി വെള്ളിയാഴ്ച പുറത്തിറക്കിയ വാർത്താക്കുറിപ്പിൽ അറിയിച്ചു. കായികരംഗത്തെ പ്രകടനം മെച്ചപ്പെടുത്താൻ സഹായിക്കുന്ന തരത്തിലുള്ള മരുന്നല്ല താരം ഉപയോഗിച്ചതെന്നും 'ദുരുപയോഗ പദാർത്ഥങ്ങളുടെ' ഗണത്തിൽപ്പെടുന്നതാണെന്നും ഐസിസി വ്യക്തമാക്കിയിട്ടുണ്ട്.

മെയ് 1 മുൻകാല പ്രാബല്യത്തോടെയാണ് സസ്‌പെൻഷൻ നിശ്ചയിച്ചിരിക്കുന്നത്. താരം സ്വമേധയാ താൽക്കാലിക സസ്‌പെൻഷൻ സ്വീകരിച്ചിരുന്നതിനാൽ ഇതിനകം തന്നെ രണ്ടര മാസത്തെ വിലക്ക് കാലാവധി പൂർത്തിയാക്കിയിട്ടുണ്ട്.

ഇന്ത്യയും ശ്രീലങ്കയും സംയുക്തമായി ആതിഥേയത്വം വഹിച്ച ടി20 ലോകകപ്പിൽ, ഫെബ്രുവരി 7ന് ശ്രീലങ്കയിൽ വെച്ച് നടന്ന നെതർലാൻഡ്‌സിനെതിരായ മത്സരത്തിന് ശേഷമാണ് 32 കാരനായ മുഹമ്മദ് നവാസിനെ ഉത്തേജക പരിശോധനയ്ക്ക് വിധേയനാക്കിയത്. കഞ്ചാവ് ഉപയോഗിക്കുമ്പോൾ ശരീരത്തിലുണ്ടാകുന്ന 'കാർബോക്‌സിടിഎച്ച്‌സി' എന്ന ഘടകമാണ് താരത്തിന്റെ സാമ്പിളിൽ കണ്ടെത്തിയത്.

ഐസിസിയുടെ ആന്റി ഡോപ്പിംഗ് നിയമങ്ങൾ ലംഘിച്ചതായി നവാസ് സമ്മതിച്ചിട്ടുണ്ട്. എന്നാൽ മത്സരത്തിന് പുറത്തുള്ള സമയത്താണ് ഇത് ഉപയോഗിച്ചതെന്നും കായിക പ്രകടനത്തെ മെച്ചപ്പെടുത്താൻ വേണ്ടിയല്ല ഇതെന്നും താരം തെളിയിച്ചു. കുറ്റസമ്മതവും പുനരധിവാസത്തിനുള്ള സമ്മതവും കണക്കിലെടുത്താണ് താരത്തിന്റെ താൽക്കാലിക സസ്‌പെൻഷൻ ഐസിസി നീക്കിയത്.

എങ്കിലും കടുത്ത അച്ചടക്ക നടപടിയുടെ ഭാഗമായി, ഫെബ്രുവരി 7ലെ നെതർലാൻഡ്‌സിനെതിരായ മത്സരം മുതൽ മെയ് 1 വരെയുള്ള കാലയളവിലെ മുഹമ്മദ് നവാസിന്റെ കരിയറിലെ എല്ലാ മത്സര റെക്കോർഡുകളും റൺസും വിക്കറ്റുകളും ഐസിസി റദ്ദാക്കിയിട്ടുണ്ട്. ഇത് താരത്തിന്റെ അന്താരാഷ്ട്ര കരിയറിന് വലിയ തിരിച്ചടിയായി മാറും.