ഇന്ത്യൻ സൂപ്പർ ലീഗിന്റെ 2026-27 സീസൺ ഒക്ടോബറിൽ ആരംഭിക്കാൻ പോവുകയാണ്. ഇതിന് മുന്നോടിയായുള്ള കൂടുമാറ്റങ്ങളും പടയൊരുക്കങ്ങളും ടീമുകൾ ആരംഭിച്ച് കഴിഞ്ഞു. കേരള ബ്ലാസ്റ്റേഴ്‌സ് എഫ്‌സിയും പുതിയ സീസണിനായുള്ള മുന്നൊരുക്കങ്ങളിലേക്ക് കടന്നിട്ടുണ്ട്. എന്നാൽ പുതിയ നിക്ഷേപകരെ കണ്ടെത്താത്തതിനെത്തുടർന്നുള്ള സാമ്പത്തിക പ്രയാസമാണ് ടീമിനെ അലട്ടുന്നത്.

ഇപ്പോഴിതാ കേരള ബ്ലാസ്റ്റേഴ്‌സ് എഫ്‌സി പുതിയ സീസണിൽ കൊച്ചി വിടാനൊരുങ്ങുകയാണെന്നാണ് വിവരം. അവസാന സീസണിൽ കൊച്ചി ജവഹർലാൽ നെഹ്‌റു സ്റ്റേഡിയത്തിൽ ബ്ലാസ്റ്റേഴ്‌സിന്റെ മത്സരം നടത്തുന്നത് സംബന്ധിച്ച് ചില വാടക തർക്കങ്ങളുണ്ടായിരുന്നു. പിന്നീട് രാഷ്ട്രീയമായ ഇടപെടലുകളടക്കം നടത്തിയ ശേഷമാണ് ഈ പ്രശ്‌നത്തിന് പരിഹാരമായതും പിന്നീട് കൊച്ചിയിൽത്തന്നെ ബ്ലാസ്റ്റേഴ്‌സിന്റെ മത്സരങ്ങൾ നടന്നതും.

എന്നാൽ ഇത്തവണയും വലിയ വാടകയ്ക്ക് കൊച്ചിയിൽ കളിക്കാൻ ബ്ലാസ്റ്റേഴ്‌സിന്റെ സാമ്പത്തിക സ്ഥിതി അനുവദിക്കുന്നില്ല. അതുകൊണ്ടുതന്നെ മലപ്പുറം മഞ്ചേരിയിലെ പയ്യനാട് സ്റ്റേഡിയം ഹോം ഗ്രൗണ്ടാക്കാനുള്ള നീക്കമാണ് ഇപ്പോൾ ബ്ലാസ്റ്റേഴ്‌സ് നടത്തുന്നത് എന്നാണ് വിവരം. എന്നാൽ ഇവിടെ ഐ.എസ്.എൽ നടത്താൻ സ്റ്റേഡിയത്തിന്റെ നവീകരണമടക്കം നടത്തേണ്ടതായുണ്ട്.

ഇതിന് കേരള ബ്ലാസ്റ്റേഴ്‌സ് എങ്ങനെ സാമ്പത്തികം കണ്ടെത്തുമെന്നതാണ് പ്രധാനപ്പെട്ട ചോദ്യം. കേരള ബ്ലാസ്റ്റേഴ്‌സിനെ സംബന്ധിച്ച് പുതിയ നിക്ഷേപകരെ കണ്ടെത്താനാവാത്തത് ആശങ്ക ഉയർത്തുന്ന കാര്യമാണ്. ലുലു ഗ്രൂപ്പുമായടക്കം ചർച്ചകൾ നടന്നെങ്കിലും ഒന്നും ഫലം കണ്ടിരുന്നില്ല. എന്നാൽ ഇപ്പോൾ വിദേശ കമ്പിനിയുമായി ബ്ലാസ്റ്റേഴ്‌സിന്റെ ചർച്ചകൾ പോസിറ്റീവായി നടക്കുകയാണെന്നാണ് വിവരം.

ബ്ലാസ്റ്റേഴ്‌സിനെ സംബന്ധിച്ച് വലിയ പ്രതിസന്ധിയാണ് മുന്നിലുള്ളത്. ഐ.എസ്.എല്ലിൽ പങ്കെടുക്കാൻ ആദ്യ ഘട്ട തുക എ.ഐ.എഫ്.എഫിന് കൈമാറിയെങ്കിലും തുടർ പ്രവർത്തനങ്ങൾക്കുള്ള പണം കണ്ടെത്തേണ്ടിയിരിക്കുന്നു. ബ്ലാസ്റ്റേഴ്‌സിന്റെ നിലവിലെ പരിശീലകനായ ആഷ്‌ലി വെസ്റ്റ് വുഡുമായി കരാർ പുതുക്കിയിട്ടില്ല. പരിശീലകന്റെ സീറ്റ് ഉറപ്പിച്ചാലേ അടുത്ത ഘട്ടത്തിലേക്ക് കടക്കാൻ ബ്ലാസ്റ്റേഴ്‌സിന് സാധിക്കൂ.

ആഷ്‌ലിയെ നിലനിർത്താൻ കോടികൾ ബ്ലാസ്റ്റേഴ്‌സിന് ആവശ്യമായി വരും

ആഷ്‌ലി വന്നാലെ ടീമിൽ ആരൊക്കെ വേണമെന്നും ഇവരെ ടീമിലേക്കെത്തിക്കാനുള്ള നടപടികൾ ആരംഭിക്കാനും സാധിക്കൂ. ഇതിനോടകം കേരള ബ്ലാസ്റ്റേഴ്‌സിന്റെ പല പ്രധാന താരങ്ങളും ടീം വിട്ട് കഴിഞ്ഞു. അഡ്രിയാൻ ലൂണയടക്കം കേരള ബ്ലാസ്റ്റേഴ്‌സിലേക്ക് തിരിച്ചുവരവിന് കാത്തിരിക്കുകയാണ്.

എന്നാൽ ഇത് സാധ്യമാകാൻ ആദ്യം മികച്ചൊരു നിക്ഷേപകനെ കണ്ടെത്താൻ ബ്ലാസ്റ്റേഴ്‌സിന് സാധിക്കേണ്ടതായുണ്ട്. ഇത് നടക്കാത്ത പക്ഷം വരുന്ന ഐ.എസ്്.എൽ സീസണിൽ കേരള ബ്ലാസ്റ്റേഴ്‌സ് കളിക്കുന്ന കാര്യം പോലും സംശയമാണ്. ബ്ലാസ്റ്റേഴ്‌സ് വലിയ ആരാധക പിന്തുണയുള്ള ടീമാണെങ്കിലും ഇതുവരെ കപ്പിലേക്കെത്താൻ അവർക്ക് സാധിച്ചിട്ടില്ല.

അവസാന സീസണിൽ ബ്ലാസ്റ്റേഴ്‌സ് മാനേജ്‌മെന്റും കേരള ബ്ലാസ്റ്റേഴ്‌സിന്റെ ആരാധക കൂട്ടായ്മയായ മഞ്ഞപ്പടയും തമ്മിൽ ഉടക്കുന്ന സാഹചര്യവും ഉണ്ടായിരുന്നു. കേരള ബ്ലാസ്റ്റേഴ്‌സിന് നിലവിലെ സാമ്പത്തിക പ്രതിസന്ധികളെല്ലാം മറികടക്കാൻ വരുന്ന സീസണിൽ കിരീടം അത്യാവശ്യമാണ്. എന്നാൽ അതിനായി ഈ സീസണിൽ കളിക്കാനാവശ്യമായ വെല്ലുവിളികളെ ബ്ലാസ്റ്റേഴ്‌സ് മറികടക്കേണ്ടതായുണ്ട്. അതിന് സാധിക്കുമെന്ന് തന്നെ കരുതാം.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്