യു.കെ പൗരത്വം നേടിയ മുഹമ്മദ് ആമിർ ഐ.പി.എൽ ലേലത്തിന് പേര് രജിസ്റ്റർ ചെയ്‌തേക്കും

NOVEMBER 3, 2026, 1:39 AM

യു.കെ പൗരത്വം നേടിയതിനെ തുടർന്ന് പാകിസ്ഥാൻ ഇടംകൈയ്യൻ പേസർ മുഹമ്മദ് ആമിർ 2027 ലെ ഐ.പി.എൽ ലേലത്തിനായി രജിസ്റ്റർ ചെയ്യാൻ സാധ്യതയുണ്ടെന്ന് റിപ്പോർട്ടുകൾ. നവംബർ 3ന് നടക്കുന്ന അഫ്ഗാനിസ്ഥാൻ പ്രീമിയർ ലീഗ് (എ.പി.എൽ) ഡ്രാഫ്റ്റിൽ ആമിർ യു.കെ പൗരനായാണ് രജിസ്റ്റർ ചെയ്തിരിക്കുന്നത്. ഐ.പി.എല്ലിലും സമാനമായ രീതിയിൽ അദ്ദേഹം ലേലത്തിൽ പങ്കെടുത്തേക്കുമെന്നാണ് കരുതുന്നത്.

34 കാരനായ ആമിർ പാകിസ്ഥാനുവേണ്ടി 159 അന്താരാഷ്ട്ര മത്സരങ്ങൾ കളിച്ചിട്ടുണ്ട്. യു.കെ പൗരയും അഭിഭാഷകയുമായ നർജിസ് ഖാനെ വിവാഹം കഴിച്ചതിലൂടെയാണ് അദ്ദേഹത്തിന് യു.കെ പൗരത്വം ലഭിച്ചത്. ആവശ്യമായ നിയമപരമായ നടപടിക്രമങ്ങളും റെസിഡൻസി വ്യവസ്ഥകളും പൂർത്തിയാക്കി, ഇംഗ്ലീഷ് ഭാഷാ പരിശോധനയും യു.കെ ചരിത്ര/സംസ്‌കാര പരീക്ഷയും ഉൾപ്പെടുന്ന പൗരത്വ ടെസ്റ്റ് പാസ്സായതിന് ശേഷം 2026 മെയ് മാസത്തിലാണ് അദ്ദേഹത്തിന് ഔദ്യോഗികമായി ബ്രിട്ടീഷ് പാസ്‌പോർട്ട് ലഭിച്ചത്.

ബ്രിട്ടീഷ് പാസ്‌പോർട്ട് ലഭിച്ചതോടെ ഇംഗ്ലീഷ് ക്രിക്കറ്റിൽ (കൗണ്ടി ക്രിക്കറ്റിലും ദി ഹൺഡ്രഡിലും) ഇനി മുതൽ വിദേശ താരത്തിന് പകരം ആഭ്യന്തര താരമായാണ് ആമിർ രജിസ്റ്റർ ചെയ്യപ്പെടുക. അതേസമയം, പാകിസ്ഥാൻ സൂപ്പർ ലീഗിൽ (പി.എസ്.എൽ) ഇതുവരെ നാട്ടിലെ താരമായിരുന്ന അദ്ദേഹത്തിന്റെ പദവി ഇനി മുതൽ ഒരു വിദേശ താരത്തിന്റേതായി മാറും.

2008ലെ ഉദ്ഘാടന സീസണിന് ശേഷം പാകിസ്ഥാൻ താരങ്ങൾ ആരും ഇന്ത്യൻ പ്രീമിയർ ലീഗിൽ (ഐ.പി.എൽ) കളിച്ചിട്ടില്ല. 2008ലെ മുംബൈ ഭീകരാക്രമണത്തെ തുടർന്ന് ഇന്ത്യയും പാകിസ്ഥാനും തമ്മിലുണ്ടായ രാഷ്ട്രീയ, നയതന്ത്ര ഉരസലുകളെത്തുടർന്ന് പാകിസ്ഥാൻ താരങ്ങൾക്ക് ഐ.പി.എല്ലിൽ ഫലത്തിൽ വിലക്കേർപ്പെടുത്തുകയായിരുന്നു. ആമിറിന് ലേലത്തിനായി രജിസ്റ്റർ ചെയ്യാൻ കഴിയുമെങ്കിലും, ഫ്രാഞ്ചൈസികൾ അദ്ദേഹത്തെ പരിഗണിക്കുമോ എന്നത് അവരുടെ താൽപ്പര്യത്തെ ആശ്രയിച്ചായിരിക്കും. ഏതെങ്കിലും ഒരു ഫ്രാഞ്ചൈസി താൽപ്പര്യം പ്രകടിപ്പിച്ചാൽ ഡിസംബർ 16ന് ഗോവയിൽ നടക്കുമെന്ന് പ്രതീക്ഷിക്കുന്ന ലേലത്തിൽ അദ്ദേഹത്തിന് ഉൾപ്പെടാൻ സാധിക്കും.

പാകിസ്ഥാനു വേണ്ടി 21 ടെസ്റ്റുകളും 143 ഏകദിനങ്ങളും കളിച്ചിട്ടുള്ള അസ്ഹർ മഹമൂദ് ആണ് ഇതിനുമുമ്പ് ഐ.പി.എല്ലിൽ കളിച്ച അവസാന പാക് വംശജനായ താരം. 2012ലും 2015ലും കിങ്‌സ് ഇലവൻ പഞ്ചാബിനും കൊൽക്കത്ത നൈറ്റ് റൈഡേഴ്‌സിനും വേണ്ടിയാണ് അദ്ദേഹം കളിച്ചത്. യു.കെ പൗരയായ എബ്ബ ഖുറേഷിയെ വിവാഹം കഴിച്ചതിലൂടെ ബ്രിട്ടീഷ് പാസ്‌പോർട്ട് കരസ്ഥമാക്കിയാണ് അസ്ഹർ മഹമൂദും ഐ.പി.എല്ലിൽ കളിച്ചിരുന്നത്.