വാഷിങ്ടൺ: പതിറ്റാണ്ടുകളോളം അമേരിക്കൻ നാവികസേനയിൽ സേവനമനുഷ്ഠിച്ച് ഉന്നതപദവിയിലെത്തിയ വനിതയെ പ്രതിരോധ സെക്രട്ടറി പീറ്റ് ഹെഗ്‌സെത്ത് അധികാരത്തിൽനിന്ന് നീക്കി. പതിനഞ്ച് മാസങ്ങൾക്കുശേഷം അതേ പ്രതിരോധ സെക്രട്ടറിയുടെ പ്രവർത്തനങ്ങളെ ചോദ്യം ചെയ്യാൻ അധികാരമുള്ള അമേരിക്കൻ കോൺഗ്രസിലേക്കുള്ള പ്രവേശനത്തിന്റെ വക്കിലാണ് ആ വനിത. അമേരിക്കൻ രാഷ്ട്രീയത്തിൽ ദ്ധ്രേയമായ ഈ തിരിച്ചുവരവിന്റെ കേന്ദ്രകഥാപാത്രം മുൻ നേവി റിസർവ് മേധാവിയും ത്രീസ്റ്റാർ വൈസ് അഡ്മിറലുമായ നാൻസി ലാകോറാണ്.

2025 ഓഗസ്റ്റ് 22നാണ് അമേരിക്കൻ പ്രതിരോധ സെക്രട്ടറി പീറ്റ് ഹെഗ്‌സെത്ത് നാൻസി ലാകോറിനെ നേവി റിസർവ് മേധാവിസ്ഥാനത്തുനിന്ന് നീക്കിയത്. പുറത്താക്കലിന് വ്യക്തമായ കാരണം പരസ്യമായി നൽകിയിരുന്നില്ല. തനിക്കെതിരെ യാതൊരു കുറ്റവും ചുമത്താതെയാണ് പുറത്താക്കിയതെന്ന് ലാകോർ പിന്നീട് വ്യക്തമാക്കിയിരുന്നു.

അമേരിക്കൻ നാവികസേനയിൽ 35 വർഷത്തെ സേവനപാരമ്പര്യമുള്ള ലാകോർ ഹെലികോ്ര്രപർ പൈലറ്റായാണ് ഔദ്യോഗിക ജീവിതം ആരംഭിച്ചത്. പിന്നീട് ത്രീസ്റ്റാർ വൈസ് അഡ്മിറൽ പദവിയിലെത്തിയ അവർ അറുപതിനായിരത്തോളം നേവി റിസർവ് സൈനികരുടെ നേതൃത്വവും വഹിച്ചു.

ട്രംപ് ഭരണകൂടത്തിന്റെ കാലത്ത് ഉന്നത സൈനിക ഉദ്യോഗസ്ഥരെ മാറ്റുന്ന നടപടികളുടെ ഭാഗമായിരുന്നു ലാകോറിന്റെ പുറത്താക്കലും. എന്നാൽ അവരുടെ പുറത്താക്കലിന് ലിംഗവിവേചനമോ മറ്റേതെങ്കിലും പ്രത്യേക കാരണമോ ഉണ്ടായിരുന്നതായി സ്ഥിരീകരിക്കപ്പെട്ടിട്ടില്ല.

സൈനികജീവിതം അപ്രതീക്ഷിതമായി അവസാനിച്ചെങ്കിലും പൊതുസേവനം അവസാനിപ്പിക്കാൻ ലാകോർ തയ്യാറായില്ല. 2026 ജനുവരി 20ന് സൗത്ത് കരോലിനയിലെ ഒന്നാം കോൺഗ്രസ് മണ്ഡലത്തിൽ ഡെമോക്രാറ്റിക് സ്ഥാനാർഥിയായി മത്സരിക്കുമെന്ന് അവർ പ്രഖ്യാപിച്ചു.

2024ലെ പ്രസിഡന്റ് തിരഞ്ഞെടുപ്പിൽ ഡൊണാൾഡ് ട്രംപ് ഏകദേശം 13 ശതമാനം പോയിന്റിന്റെ ഭൂരിപക്ഷം നേടിയ റിപ്പബ്ലിക്കൻ ശക്തികേന്ദ്രമായിരുന്നു ഈ മണ്ഡലം. റിപ്പബ്ലിക്കൻ ജനപ്രതിനിധിയായ നാൻസി മെയ്‌സ് ഗവർണർ സ്ഥാനത്തേക്ക് മത്സരിക്കാൻ തീരുമാനിച്ചതോടെയാണ് മണ്ഡലത്തിൽ പുതിയ പോരാട്ടത്തിന് വഴിയൊരുങ്ങിയത്.

നവംബർ മൂന്നിന് നടന്ന തിരഞ്ഞെടുപ്പിൽ റിപ്പബ്ലിക്കൻ സ്ഥാനാർഥി ജെന്നി കോസ്റ്റ ഹണികട്ടിനെതിരെ ലാകോർ അപ്രതീക്ഷിത മുന്നേറ്റം നടത്തി. ലഭ്യമായ അനൗദ്യോഗിക ഫലമനുസരിച്ച് ലാകോറിന് 161,878 വോട്ടുകളും ഹണികട്ടിന് 158,570 വോട്ടുകളുമാണ് ലഭിച്ചത്. 3,308 വോട്ടുകളുടെ ഭൂരിപക്ഷത്തോടെ ലാകോർ വിജയം പ്രഖ്യാപിച്ചു. ഹണികട്ടിന്റെ പ്രചാരണസംഘം പരാജയം സമ്മതിച്ചതായും റിപ്പോർട്ടുകളുണ്ട്. എന്നാൽ അന്തിമ ഔദ്യോഗിക സ്ഥിരീകരണം പൂർത്തിയായിട്ടില്ല.

ലാകോറിന്റെ വിജയം സ്ഥിരീകരിക്കപ്പെട്ടാൽ അമേരിക്കൻ രാഷ്ട്രീയത്തിൽ ശ്രദ്ധേയമായ ഒരു അധികാരമാറ്റത്തിനാകും അത് വഴിയൊരുക്കുക. ഒരിക്കൽ പ്രതിരോധ സെക്രട്ടറിയുടെ തീരുമാനപ്രകാരം സൈനിക നേതൃത്വത്തിൽനിന്ന് പുറത്തുപോകേണ്ടിവന്ന ഉദ്യോഗസ്ഥ, അതേ പ്രതിരോധ വകുപ്പിന്റെ പ്രവർത്തനങ്ങൾ പരിശോധിക്കാൻ ഭരണഘടനാപരമായ അധികാരമുള്ള കോൺഗ്രസിലെ അംഗമാകും.

കോൺഗ്രസിലെ അംഗങ്ങൾക്ക് പ്രതിരോധ വകുപ്പിന്റെ നയങ്ങൾ, ചെലവുകൾ, സൈനിക നേതൃത്വവുമായി ബന്ധപ്പെട്ട തീരുമാനങ്ങൾ എന്നിവയിൽ മേൽനോട്ടം വഹിക്കാനും വിശദീകരണം ആവശ്യപ്പെടാനും അവസരമുണ്ട്. എന്നാൽ ലാകോറിന് സായുധസേനാ സമിതിയിൽ അംഗത്വം ലഭിക്കുമോ, ഹെഗ്‌സെത്തിനെ നേരിട്ട് ചോദ്യം ചെയ്യാനുള്ള അവസരം ഉണ്ടാകുമോ എന്നത് നിലവിൽ വ്യക്തമല്ല.

പുറത്താക്കലിന് പതിനഞ്ച് മാസങ്ങൾക്കുശേഷം കോൺഗ്രസിലേക്കുള്ള വഴിതുറന്നിരിക്കുന്ന ലാകോറിന്റെ രാഷ്ട്രീയ തിരിച്ചുവരവ് അമേരിക്കൻ തിരഞ്ഞെടുപ്പിലെ ദ്ധ്രേയ സംഭവങ്ങളിലൊന്നായി മാറിയിരിക്കുകയാണ്.

സൈനികസേവനത്തിൽനിന്ന് പുറത്താക്കിയ ഉദ്യോഗസ്ഥ ഒരുനാൾ തന്നെ പുറത്താക്കിയ പ്രതിരോധ സെക്രട്ടറിയോട് വിശദീകരണം തേടുന്ന ജനപ്രതിനിധിയായി മാറിയേക്കാം എന്നതാണ് ഈ രാഷ്ട്രീയ സംഭവവികാസത്തിന്റെ ഏറ്റവുംശ്രദ്ധേയമായ വശം.

അനിൽ മറ്റത്തിക്കുന്നേൽ

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്