ഐ.എസ്.എൽ പ്രതിസന്ധിയിലേക്ക്?

NOVEMBER 8, 2025, 7:09 AM

ആൾ ഇന്ത്യ ഫുട്‌ബോൾ ഫെഡറേഷൻ ഇന്ത്യൻ സൂപ്പർ ലീഗിന്റെ വാണിജ്യ അവകാശങ്ങൾക്കായി നടത്തിയ ടെൻഡറിൽ ഒരു ബിഡ്ഡും ലഭിക്കാത്തതിനെ തുടർന്ന് രാജ്യത്തെ പ്രമുഖ ഫുട്‌ബോൾ ലീഗ് (ഐ.എസ്.എൽ) വലിയ പ്രതിസന്ധിയിലേക്ക് കൂപ്പുകുത്തിയിരിക്കുകയാണ്.

എഫ്.എസ്.ഡി.എൽ., ഫാൻകോഡ്, കോൺഷിയന്റ് ഹെറിറ്റേജ് ഗ്രൂപ്പ്, ഒരു വിദേശ കൺസോർഷ്യം എന്നിവരുൾപ്പെടെ നാല് പാർട്ടികൾ തുടക്കത്തിൽ താൽപ്പര്യം പ്രകടിപ്പിച്ചിരുന്നെങ്കിലും, നവംബർ 7നകം ഒരു ഔദ്യോഗിക ബിഡ്ഡും സമർപ്പിക്കപ്പെട്ടില്ല.

റിപ്പോർട്ടുകൾ പ്രകാരം, ആൾ ഇന്ത്യ ഫുട്‌ബോൾ ഫെഡറേഷൻ മുന്നോട്ട് വെച്ച സാമ്പത്തിക വ്യവസ്ഥകളും റിസ്‌ക് ഘടനയും താൽപ്പര്യകക്ഷികൾക്ക് താങ്ങാനാവാത്തതായിരുന്നു.
പ്രതിവർഷം 37.5 കോടി രൂപ അല്ലെങ്കിൽ 15 വർഷത്തേക്ക് മൊത്ത വരുമാനത്തിന്റെ 5% നിർബന്ധമായും നൽകണമെന്ന വ്യവസ്ഥയാണ് പ്രധാനമായും പ്രശ്‌നമായത്. ഈ ലേലം പരാജയപ്പെട്ടത് ഇന്ത്യൻ ഫുട്‌ബോളിന്റെ ഭാവിയിൽ ആശങ്കയുണർത്തുന്നു. വാണിജ്യ പങ്കാളിയില്ലാത്ത സാഹചര്യത്തിൽ ഐ.എസ്.എൽ. സാമ്പത്തിക അനിശ്ചിതത്വം നേരിടുകയാണ്.