ഗോൾകീപ്പർ അമരീന്ദർ സിങ് കേരള ബ്ലാസ്റ്റേഴ്‌സിൽ. അമരീന്ദർ സിങ് ബ്ലാസ്റ്റേഴ്‌സിലെത്തുമെന്ന് നേരത്തെ തന്നെ സൂചനകളുണ്ടായിരുന്നെങ്കിലും, കഴിഞ്ഞ ദിവസമാണ് ക്ലബ് ഔദ്യോഗികമായി പ്രഖ്യാപിച്ചത്.

ഐ.എസ്.എല്ലിൽ വിപുലമായ പരിചയസമ്പത്തുള്ള അമരീന്ദർ ഒഡീഷ എഫ്‌സിയിൽ നിന്നാണ് ബ്ലാസ്റ്റേഴ്‌സിലേക്ക് എത്തുന്നത്. 2022 മുതൽ താരം ഒഡീഷയുടെ താരമായിരുന്നു. പൂനെ എഫ്‌സിയുടെ യൂത്ത് ടീമിന്റെ ഭാഗമായിരുന്ന താരം, ക്ലബിന്റെ സീനിയർ ടീമിനായി കളിച്ച ശേഷം ഐ.എസ്.എൽ 2015 സീസണിൽ എ.ടി.കെയിലെത്തി. അതിനുശേഷം ഐ ലീഗിൽ ബംഗ്‌ളൂരു എഫ്‌സിക്കായും കളിച്ചു. ഐ.എസ്.എൽ 2016 സീസണിൽ മുംബൈ സിറ്റിയുടെ ഭാഗമായി. മുംബൈയ്ക്കായി കളിച്ച ആറ് മത്സരങ്ങളിൽ അഞ്ചിലും ക്ലീൻ ഷീറ്റ് നിലനിർത്തുകയും ഗോൾഡൻ ഗ്ലൗ പുരസ്‌കാരം സ്വന്തമാക്കുകയും ചെയ്തു.

2017-18 സീസണിലും താരം മികച്ച പ്രകടനമാണ് പുറത്തെടുത്തത്. ആ സീസണിൽ ഏറ്റവും കൂടുതൽ സേവുകൾ (59 എണ്ണം) നടത്തിയ ഗോൾകീപ്പർ അമരീന്ദറായിരുന്നു. 2018-19 സീസണിൽ 19 മത്സരങ്ങളിൽ നിന്നു ഏഴു ക്ലീൻ ഷീറ്റുകളും, 2019-20 സീസണിൽ നാലു ക്ലീൻ ഷീറ്റുകളും താരം സ്വന്തമാക്കി.

2020-21 ഐ.എസ്.എൽ സീസണിൽ മുംബൈ സിറ്റിയുടെ മികച്ച താരങ്ങളിൽ ഒരാളായിരുന്നു അദ്ദേഹം. 23 മത്സരങ്ങളിൽ 10 ക്ലീൻ ഷീറ്റ് സ്വന്തമാക്കി. മുംബൈ സിറ്റി 'ലീഗ് വിന്നേഴ്‌സ് ഷീൽഡും' 'ഹീറോ ഐ.എസ്.എൽ ട്രോഫിയും' സ്വന്തമാക്കുന്നതിൽ നിർണായക പങ്കുവഹിച്ചു. എന്നാൽ, 2021 മെയ് മാസത്തിൽ അദ്ദേഹം എ.ടി.കെ മോഹൻ ബഗാനിൽ ചേർന്നു.

നിലവിൽ ബ്ലാസ്‌റ്റേഴ്‌സ് ടീമിനൊപ്പം ചേർന്ന 33കാരൻ പരിശീലനം ആരംഭിച്ചിട്ടുണ്ട്. താരം പരിശീലനം നടത്തുന്ന ദൃശ്യങ്ങൾ കേരള ബ്ലാസ്റ്റേഴ്‌സ് സോഷ്യൽ മീഡിയയിലൂടെ പങ്കുവെച്ചിട്ടുണ്ട്.
മുൻ ആസ്റ്റൺ വില്ല വിങർ ആന്ദ്രേ ഗ്രീനും ബ്ലാസ്‌റ്റേഴ്‌സിലെത്തിയേക്കും. സൈനിങ് ഏതാണ്ട് പൂർത്തിയായെന്നാണ് വിവരം. 28കാരനായ താരം ഫ്രീ ഏജന്റായിരുന്നു. പുതിയ സീസണിലെ ബ്ലാസ്റ്റേഴ്‌സിന്റെ ആദ്യത്തെ വിദേശ സൈനിങാണ് ഇത്.

അൽ ഫുർസാൻ സ്‌പോർട്‌സ് ഇൻവെസ്റ്റ്‌മെന്റ് ബ്ലാസ്‌റ്റേഴ്‌സിന്റെ ഉടമസ്ഥാവകാശം ഏറ്റെടുത്തതിന് പിന്നാലെ ആരാധകർ പ്രതീക്ഷയിലാണ്. പുതിയ സീസണിലേക്കുള്ള താരങ്ങളുടെ ഷോർട്ട്‌ലിസ്റ്റ് തയ്യാറാക്കിയതായി ടീം വൃത്തങ്ങൾ അറിയിച്ചിരുന്നു. ആഷ്‌ലി വെസ്റ്റ്‌വുഡ് പരിശീലകനായി തുടരും.

മുഹമ്മദ് സനൻ, സാഹിൽ തവോര, റാംലുൻചുങ്ക, മുഹമ്മദ് യാസിർ എന്നിവരും ബ്ലാസ്റ്റേഴ്‌സിലെത്തിയേക്കും. ഐബൻ ഡോഹ്‌ലിംഗുമായുള്ള കരാർ നീട്ടാനും കേരള ബ്ലാസ്റ്റേഴ്‌സ് ഒരുങ്ങുകയാണ്. കഴിഞ്ഞ സീസണിൽ ലോണടിസ്ഥാനത്തിൽ ടീം വിട്ടിരുന്ന അഡ്രിയാൻ ലൂണയും ബ്ലാസ്‌റ്റേഴ്‌സിനൊപ്പം തുടരും.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്