വിവാഹം നേരത്തെ വെളിപ്പെടുത്താതിരുന്നത് എന്തുകൊണ്ട്? കാരണം വ്യക്തമാക്കി നടി അനുമോൾ

AUGUST 17, 2026, 10:47 PM

സീരിയൽ താരം അനുമോൾ വിവാഹിതയായി. തമിഴ് നടൻ ഭുവനേഷാണ് അനുമോളുടെ ജീവിതപങ്കാളി. ചൊവ്വാഴ്ച പുലർച്ചെ ഗുരുവായൂർ ക്ഷേത്രത്തിൽ വെച്ചായിരുന്നു ഇരുവരുടെയും വിവാഹം. വിവാഹവാർത്ത പുറത്തുവന്നതിന് പിന്നാലെ വിവാഹം നേരത്തെ അറിയിക്കാതിരുന്നതിന്റെ കാരണം വ്യക്തമാക്കിയിരിക്കുകയാണ് അനുമോൾ.

സ്വന്തം യൂട്യൂബ് ചാനലിലൂടെയാണ് നടി ഇക്കാര്യം പങ്കുവെച്ചത്. ഭുവനേഷിനൊപ്പമുള്ള പുതിയ ജീവിതത്തിൽ തങ്ങൾ ഏറെ സന്തോഷത്തിലാണെന്നും എല്ലാവരുടെയും പ്രാർഥനയും അനുഗ്രഹവും വേണമെന്നും അനുമോൾ പറഞ്ഞു. വിവാഹം പ്രണയവിവാഹമാണോ അറേഞ്ച്ഡ് മാരേജാണോ എന്നതടക്കമുള്ള കാര്യങ്ങൾ പിന്നീട് വിശദമായി പറയുമെന്നും താരം വ്യക്തമാക്കി.

വിവാഹത്തിന് മുന്നോടിയായുള്ള തിരക്കുകളെക്കുറിച്ചും അനുമോൾ സംസാരിച്ചു. പുലർച്ചെ തന്നെ ഒരുക്കങ്ങൾ ആരംഭിച്ചെന്നും പിന്നീട് നാലുമണിയോടെ ക്ഷേത്രത്തിലെത്തിയെന്നും താരം പറഞ്ഞു. ഭുവനേഷ് അധികം സംസാരിക്കുന്ന കൂട്ടത്തിലല്ലെന്നും അനുമോൾ കൂട്ടിച്ചേർത്തു.

വിവാഹവിവരം നേരത്തെ പുറത്തുവിടാതിരുന്നതിന് പിന്നിൽ പ്രത്യേക കാരണമുണ്ടെന്നും താരം വ്യക്തമാക്കി. വിവാഹം പോലൊരു സന്തോഷകരമായ കാര്യം മുൻകൂട്ടി പ്രഖ്യാപിച്ച് ആഘോഷമാക്കുന്നതിനേക്കാൾ, എല്ലാം പൂർത്തിയായ ശേഷം സന്തോഷം പങ്കിടാനായിരുന്നു തനിക്ക് താൽപര്യമെന്ന് അനുമോൾ പറഞ്ഞു.

തന്നെ ഇഷ്ടപ്പെടാത്തവരും കാര്യങ്ങൾ വളച്ചൊടിച്ച് പറയുന്നവരുമുണ്ടാകാമെന്ന ആശങ്കയും വിവാഹവിവരം രഹസ്യമാക്കി വെക്കാൻ കാരണമായതായി താരം വ്യക്തമാക്കി. വിവാഹത്തിന് മുമ്പ് വിവരം പുറത്തുവന്നാൽ അനാവശ്യമായ ചർച്ചകളും പ്രതികരണങ്ങളും ഉണ്ടാകാനുള്ള സാധ്യതയുണ്ടായിരുന്നുവെന്നും അനുമോൾ പറഞ്ഞു.

അതിനാലാണ് വിവാഹം കഴിഞ്ഞതിന് ശേഷം മാത്രമായി വിവരം എല്ലാവരെയും അറിയിക്കാൻ തീരുമാനിച്ചതെന്നും നേരത്തെ പറയാതിരുന്നതിൽ ആരും തെറ്റിദ്ധരിക്കരുതെന്നും താരം അഭ്യർഥിച്ചു. തനിക്ക് നല്ലത് സംഭവിക്കണമെന്ന് ആഗ്രഹിക്കുന്നവരും മോശം സംഭവിക്കണമെന്ന് ആഗ്രഹിക്കുന്നവരുമായ നിരവധി പേരുണ്ടെന്നും അതുകൊണ്ടാണ് സ്വകാര്യത കാത്തുസൂക്ഷിച്ചതെന്നും അനുമോൾ പറഞ്ഞു.